1 JON
Jon pepa muno namba 1 Boglkwa
Ka mongo yegl ende okuna ongwa
Pirngi dumga yomba ambuglange mina wan mogltre ana tisa kimbi wagle ka dinaglkwa pirkramga. Tisa kimbi wagle i eremogl okuna pirngi dingwa yomba bakagl teingwa.
Ka i muno boglkwa yagle kangiye Jon. Ye Sebedi wam. Ye aposel mogltre ana kamambuno wakai yaglmo i muno bogltre te pepa Ka Teke Pangwa akiye muno boglkwa. Ana yomba tau pirkwa pepa muno i buglayungu A.D. 90 mina boglmedi pirkwa.
Ka mem kande yegl pangwa: Jon nomane kande suwo pango ana pepa muno i boglkwa.
1) Tisa kimbi wagle mokono tenaglkwa.
2) Yesus wu yomba kaima pindre kor aimande moramga norkwa i pirngidi te God wakai kaima kan ana yomba ta wakai kaima kanaglkwa.
1
Kor aimande ka wu pene ongwa
1 Kamo i okuna imbo mambuno bogl pai ungwa, i no kinano mina pirtre te ongumutno mina kandre te kandime dindre ana onguno pagl ake pirtre ounga. Ipre kor aimande kamo i no dipene endumga. 2 Kor aimande kamo i wu pene ongo no kandre ana kor aimande moramga kamo i no boglo kugl ana dipene ende ene tomga. Kamo i okuna imbo Nem mina moglkwa ana erme no mina wu pene ongwa. 3 No pirtre te kandre ounga i ama ene ditomga, ene no mina nomano suwara yei meglmbi ana nono prapra Neno Kande ya Wam Yesus Krais mina nomano suwara yei moramga. 4 Nono gun yomga i kaima yene kausi panambuka pre kamo i pepa bounga.
Ambuglange mina suna wanmoramga
5 Kamo i ye Wam mina no punga pre ana dipene ende ene tomga. God, yene ambuglange moglkwa, ye mina mim kaima ta paikrukwa. 6 Nono God bogl tapsi moune dindre ana mim mina suna wanmoun, ana nono kanno kakimbi orkwa pre nono ka kaima pamara suna wanmoglkunga. 7 Ba ye ambuglange mina moglmere kuno yegl nono ama ambuglange mina suna mouno ana nono yomba tau bogl tapsi mounga, ana ye Wam Yesus bormaimo i nono tandaglmeno prapra koko endungo nono nomano pesi yongwa.
8 Ba nono tandaglmeno paikrume dumuno, ana no nono kakimbi di yumga, ipre ka kaima nono nomano mina suna yeikrukwa. 9 Ba nono tandaglmeno dipene endumuno, ana God nono kondokre yene mambunomo du-wakai mina nono tandaglmeno ya mambunono kinde prapra koko ende noran ana nono nomano pesi yenambuka. 10 Ba nono tandaglme ta erekune dumuno ana nono kanno i mina, God kakimbi yomba we dumga. Yeglpre ye kamo kaima i nono nomano suna paikrukwa.* Kamambuno pepa mina bange tau mere ka pangwa i yomba prapra tandaglme erikwa. Buk Song 14:3 ya Aisaia 53:6 te 64:6 kanamga.
*1:10: Kamambuno pepa mina bange tau mere ka pangwa i yomba prapra tandaglme erikwa. Buk Song 14:3 ya Aisaia 53:6 te 64:6 kanamga.