1 KORINA
Pole baame Anatunya waili pii Korina wambu dupwa mana lamaiyamopa wambu lapome Yesu kapa ingingi lao suu pyapala Kurisene ingiyaminyi dokome Elyambu Pingi doko kanda siya. Enakana Elyambu Pingi dokona Kurisene wambu yulu lapo kopetame piyaminyisa Poleme nakama rolalana pepa pase dake pyao maiya. Yuu gii dokopa Giriki taone andake Korina dokona wambu yuu rara wakale wakale dupwa pyaso kareyami. Orome gapomane isiyamo doko yuu Akaya lenge dokona Korina doko taone mupwa ingiya. Korina dokona akali dupwa bisinase yulu andake piyami. Dee nakama rangena pii lengepe yulu nakamana rora ambasupi piyaminyi dupwape kame see nao lakanda lakanda pyuo minyuo kareyami. Yuu Korina dokona wambu malu mee kepo pingi yulu doko sooko misi rara wakale wakale dupwa epoko piya.
Pole baame Elyambu Pingi dokona wambu liti pilya pyana pyuo kepo pyuo kareyaminyi dokona pii lapo pyao reteya. Dee enda akalipa nyingipi monana doko rolae doko kyai lao letamo soo nyingipi au pyuo misi lengepe Imambu Poo Pyasimi mora pisingipi dee kumuo lopo epengepe renge dusipana lao Poleme pii malu lao pyao reteya. Baa soo manjo nyepala Anatunya Waili Pii Keyange dokome renge dusipana lao apa lao kapa yano pyakara ingyuo silyamo lao renge dusipa pyao reteya.
Rombo 13 doko Anatumi yulu jiyamo dupwana mona retenge renge doko angingyuo jiya ingilyamo lao palamo. Pii rombo dake wambu malu meeme angingyuo soo nyilyaminyi.
Buku Dakena Pii Palamo Dusipa
1. Pii kanda siya 1:1-9
2. Elyambu Pingi dokona sisu nyuo lao kareyami 1:10—4:21
3. Enda akalipa apa pyuo kapa palengepe ree palupi dolapona lao pyao reteya 5:1—7:40
4. Kurisene wambupi Anatu suu pyaa nange wambupi dupwana lao pyao reteya 8:1—11:1
5. Elyambu Pingi dokona Anatu apa pyuo misi lao lakandenge pii 11:2—14:40
6. Yesu Koraisa lopo epeyamo doko suu pyao Kurisene wambu lopo eparami 15:1-58
7. Korina wambu dupwame Kurisene wambu Jutia palenge dupwa nyiso kana mairami, leya 16:1-4
8. Baa range apa pirape lengepe ote pyuo piipi lao piya 16:5-24
1
Namba Yesu Koraisana aposele akali Pole Anatumi pipili lao suu piyamuli pyuo kee lao rombo palyiyamopa dee namwana yangonge kingi Sosatenisa baapa role pyao letambano.
Anatunya Elyambu Pingi wambu yuu Korina palenge dupwa Anatumi banya wambu ingyarami lao kee lao rombo palyiya. Rombo palyiya wambu dupwa Anatu Yesu Koraisapana ingyuo nakambana arapu dokona pakao karo wambu yuu muu dupwana peparae nakamanape namwanape Kamongo Yesu Koraisana kingi lenge dupwa kando letambano.
Namwana Rakane Anatu dee Kamongo Yesu Koraisapana mona keyange palyuo ipingi rengepe mona kyuu lao singi rengepe joo karena lao yako letambano.
Poleme Anatu Kando Sangyu Leya
Anatumi nakama Yesu Koraisa keta mona keyange palyuo ipingi doko jiyamosa yuu peparae nakamana lao Anatu ange lakao karo. Yesu Koraisapa yalya kando karenge dokome pii angipi soo gisingipi renge keyange dupwa nakama keta palamo. Koraisa nakama keta panala epara lao iso karo banya elyape renge nakama keta paleta karaminyi. Doko Kamongo Yesu Koraisana lao pii lenge dokome angi nakamana ingyaro karamo. Dee yuu gii lumwa piramopa kyawa minyara dokome Kamongo Yesu Koraisana yuu gii dokopa nakama mondo lao pisirami. Anatumi banya Ikinyingi Yesu Koraisa namwana Kamongo dokona lao yalya kando nyuo rombo palyiya doko baa rolae ingingi lao silyamano.
Elyambu Pingi Sisi Nyuo Leyami
10 Yangonemoo namwana Kamongo Yesu Koraisana porainya renge dokome langyuokondali pyuo leto. Sisi nyuo laa narami dokona lao nakamame pii mendakinya palyuo kata mendakinya pao angingyuo yalya kando karalu kararami. 11 Yangonemoo, enda Kolowi lengena ree palu lapome nakama apiyanda pyuo letaminyi lao rolo langiyaminyi siyu. 12 Dokona dopa pyuo leto. Nakama range pii mendakinya laa nalyaminyi. Mendeme lao dokopa namba Polena, mendeme namba Apolosana, mendeme namba Pitana, dee mendeme namba Koraisana ingyuo karo lao pilyaminyi. 13 Koraisa baa mendaki daase? Pole isa mamandona kumakayase? Polena kingi lao bapitisimo nyiyamisi?
14 Namba akali Kirisapasa dee Gayasapa iki bapitisimo nyakamiyu dokona Anatu ange lao karo. Wakale dupwa bapitisimo nyakami nayo. 15 Mendeme Polena kingi lao bapitisimo nyiyama lao kapa laa narami. 16 (Yea, nambame Setepanasa dee banya ree palu bapitisimo nyakamiyulyamo. Dopa piyunupape nambame dee mendali bapitisimo nyakamiyu lao suu pyaa nalyo.) 17 Koraisame namba bapitisimo dokona nyakamiri puu laa naya. Baame namba waili pii enenge dokona lao lamaila puu leya. Dee wambunya singi renge dokona pii dupwame nyuo laa nare langiya. Namba dopa leyoli dokopa Koraisa baa isa mamandona kumuyamo dokona porainya renge palamo doko isa nembeyoli.
Koraisa Baa Anatunya Porainya Rengepe Singinya Rengepe Doko
Karapyamo Pilyamo
18 Koraisa isa mamando dokona kumakayamo waili pii doko wambu baa mona mai nange dupwame mee bange inginyi pyambulyaminyi. Dee namwa mona maingi wambu dupwame waili pii doko Anatunya porainya renge dokoŋo lao soo nyilyamano. 19 Dokona Anatunya pii poo pyasi dopa letamo.
Wambu kendepuli ingyuo singi dupwana singinya renge doko kokwa sinyi nembakamyuo
wambu soo gisinginya singi renge dupwa mee inginyi nembakamyuo piru,
letamo. 20 Dopa piramo dokopa wambu kendepuli ingyuo singi dupwape dee wambu soo gisingi dupwape wambu pii mondo lao lenge dupwape apa piramisi? Wambu yuu muu dupwana peparae karenge dupwana singinya renge doko kopyali ingilyamo lao Anatumi lasaka piya.
21 Wambumi nakamana singinya renge dokome Anatunya lao see nange. Dopa lao Anatu banya singinya renge dokome lao piya. Namwana waili pii lao karamano wambumi kopyali lao suu pilyaminyi dakeme Anatu baa mona maingi wambu lete wai pyao nyero lao suu piya. 22 Juu wambu dupwame yulu Anatumi iki pilyamopa wambumi kapa pii nange dopale piramo kandalana isaro karenge. Giriki wambu dupwame singinya renge dokona selana isaro karenge. 23 Dopa pinya lapala namwame Koraisa isa mamandona paleyamo dokona lao polo letamano. Dopa lao letamano dokona Juu dupwame sepala mona rando imbwuange. Imbwualyaminyipa Giriki wambu dupwame pii letamano doko sepala kopyali ingilyamo lao suu pingi. 24 Dopa lao suu pyao karaminyipape Juu wambu dee Juu daa rara wakalepe dolapo laparae Anatu rombo palyuo kyakale leyamo dupwame waili pii doko Koraisa baaŋa lao letaminyi. Koraisa baa Anatunya porainya rengepe singinya rengepe doko. 25 Anatunya pii doko wambumi kopyali lao suu pilyaminyipape akalinya singinya renge dokopa Anatunya pii dokopa kapa manda manjira ingya nange. Anatunya yulu doko wambumi pyuku lasi lao suu pilyaminyipape akalinya porainya renge dokopa Anatunya yulu dokopa kapa manda manjira ingya nangeko.
26 Yangonemoo, Anatumi nakama kanda soo rombo palyuo kee leyamo dokopa apa piyama lao suu pyalapape. Mange dokopa wambumi nakama mendasipa iki kendepuli ingyuo karo dee mendasipako iki mupwa ingyuo karo pilyaminyi lao siyami. Dopa pyuo soo dokopa nakama mendasipa iki kamongo ingyuo karaminyi lao kandeyami. 27 Wambu dupwame pii doko kopyali ingilyamo letaminyi doko Anatumi minyuo kendepuli lao suu pingi wambu dupwa elyanyi pyambungi. Dee Anatumi yulu pyuku lasi lao masingi dokome minyuo akali poraingi dupwa elyanyi nembenge. 28 Baame mee wambumi kando nembo mupwa daaŋa lapala koo ingilyamo laope dee kwao silyamopa lao suu pingi dupwa Anatu rombo palyuo nyingi. Dopa pyuo dokopa baame mee wambumi mupwa lao suu pingi dupwa nyuo kokwa singi. 29 Dokona lao wambu mendeme Anatunya lenge kambu dokona namba range mupwa lao lakandara ingya nange. 30 Anatumi nakama nyuo Yesu Koraisa keta pyamalyiya. Dopa pyuo dokopa Anatumi Koraisa baa namwana singinya renge inginyi pyambuya. Koraisapa lapolapo lao Anatumi namwa nyuo baapa rolae inginyi pyambuya. Dopa pyuo namwa kiiramo nyepala Anatu rangena wambu inginyi pyambuya. 31 Dokona lao Anatunya pii poo pyasi letamuli pyuo mendeme lakandalana suu pyara ramo doko Kamongome yulu piyamo dokoko lakandapenge ingilyamo.