EKELESIYASITISI
Renge Mana Nyisi Akalinya Pii
Renge mana nyisi akali mende baame wambu peparae moŋo nyuo luu palyuo karengepe dee wambu lapo koo pii nangepe dupwa kote lao randa nyingi dokona lao suu pyaokondali piyamosa namwa wambu akipamo liti pyuo karelyamano kumapengele lao suu piya. Renge singi akali dake Anatu yuu wamba dopa pinya leyamuli pyuo soo ota nao pyuo kareya. Soo ota nayamopape wambu dupwa lamaiyuo, Nakamana ee poraiyuo wara piraminyi nengepe wane wanake dupwape bange peparae Anatumi jingi dupwa rae maiyuo minyalu minyuo minyarami, leya.
Pii yapasi dusipana namwa kinyi pii lama lasaka pilyamo. Kinyi pii mendaki doko Anatu baame yulu wakale wakale dupwa yuu gii mendaki mendaki lao rombo palyuo maiyamo dokona lao dee kinyi pii lama dake namwa wambu peparae namwa rangena yuu dokona mee bange dupwame mee wambu menge dupwame rae maiyuo mona soo karena doko opetae lasaka pilyamo.
Renge mana nyisi akali dake banya suu pingi malu namwa mona kendanyi pyambulyamo. Dopa pilyamopape buku dake Buku Baepole sukusa pyasi palipyamosa Kurisene wambu akali dake dopale ingyuo kararami lao silyamano. Wambu malu mana nyisi akali dakena pii yaka lapala namba akali dake sukusa paro ingilyamo suu piyamosa mona minyarambu peyami. Dopa pyuo peyaminyipa Buku Baepole pii wakale yaka lao Anatu baame akipamo doko nakama rangena monarename nyinyi pyambuo rae maiyuo mona sipyamo kareyami.
3
Yulu Peparae Pira Lao Yuu Gii
Reteyamo Doko
Reteyamo Doko
1 Yulu peparae isa yuu muu dapwana pilyamo dupwa Anatumi yuu gii rombo palyinginyili pyuo pingi.
2 Mandenge yuu gii dokope kumungi yuu gii dokope
ee wara pingi yuu gii dokope manjo nenge yuu gii dokope
dusipa baame rombo palyuo retenge.
3 Yuu gii pyao kumakaraminyi dokope yuu gii pyuo lete nyeraminyi dokope
yuu gii anda wambarae lalyaraminyi dokope yuu gii anda enenge piraminyi dokope
baame rombo palyuo retenge.
4 Anjokorape mona rando karope dee rae maiyuo karope
dee kumanda ee lao pisope dee rae maiyuo malya pyao kararami
dusipape baame rombo palyingi.
5 Yuu gii enda akalipa mendakinya palenge dokope dee yuu gii pali nange dokope
yuu gii bange maingi dokope yuu gii bange mai nange dokope baame pyuo waso retenge.
6 Yuu gii bange nembengepe yuu gii nembapala koto nyingipi
yuu gii kana nyuo retengepe yuu gii kana pyao nembengepe
baame rombo palyingi.
7 Anjokorape komau kangurami dokope kii pirami dokope
romo napyuo mee pisirami dokope dee pii lao pisirami dokope
dusipa baame waso retenge.
8 Yuu gii mona retengepe yango palyuo epe kanda nangepe
yuu gii yanda pingipi yuu gii kui lao mona silyamo karengepe
dusipa baame waso retengeko.
9 Namwa yulu andake pipala dokona aki mende nyingisi? 10 Anatumi kenda namwa keta retakayamo dupwa namba silyu. 11 Baame yulu peparae dupwana yuu gii angi rolae doko waso reteya. Retapala dokopa namwame rengya mende piraŋa lao soo nyimwali suu pingi doko Anatumi namwa keta palyakaya. Dopa piyamopape baame yulu pingi dupwana lapo namwame soo gisa narami lao piya. 12 Dokona lao namwa lete kararamano dokopa rae maiyuo yulu elyape pyuo kararama lao soo nyiyu. 13 Namwame yulu pipala nenge ipwape nyepala rae maiyuo narama. Dupwa Antumi jiya.
14 Anatumi yulu peparae pingi dupwa ama sulu seraŋa lao pingi doko namba silyu. Embame dokona mende konda pyuo pyuope dee dokona mende nyisa nyuo nembope pii nare ingilyamo. Anatumi namwame baa mupwa lao suu pyao pako paliramiŋi lao pingi. 15 Yulu lapo dakepa pilyamo dupwa wamba dopa piyako. Dee yulu lapo ene pira dupwa wamba dopa piyako. Anatumi wamba yulu pinginyili pyuo kamba kamba pyuoko pingi.
Isa Yuu Dakena Rolae Laa Nalyaminyi
16 Doko iki daa. Isa yuu dakena pii doko soo rolo lengepe rolaena rengepe panda nyeramuli pyuo koonya renge singi doko namba soo nyilyu. 17 Yulu peparae Anatumi yuu gii rombo palyiyamuli pyuo piramo dokona baame rolae pingipi koo pingipi peparae mendare kata dokona palyuo kote lara namba rangeme lao suu pyapu. 18 Anatumi namwa makande pyuo nakama mena dupwa pipya manda manja nalyamo lao lasaka pipyamo doko soo nyipu. 19 Mena wambupi kata mendakinya pao kumungi. Dokona nakamana lete karenge renge doko kapa kapa palenge. Lete karenge dokona nakama peparae renge mende see naminyi dokona wambu dupwa nakama kamame wakasa daa mena dupwa pipya kapa kapa ingyuo pelyamo. 20 Dokona mena wambupi panda mendare yuu sinjimu dokona parami. Doko nakama peparae yuu sinjimu dokonako wasiyamo dokome nakama kamba dokonako parami. 21 Dokopa menana imambu doko isa yuu donena paramopa wambunya imambu doko ketae panda paraŋa lao wambu mendeme apa pipala soo gisilyase? 22 Namwa kumaparamano dokopa mende piraŋa lao seramano kata mende see nalyamo dokona namwame yulu pyuo rae maiyuo palyuo kararama ingilyamo. Yulu mende wakale pirama ingya nalyamo lao kandapu.