ESERA
Buku 1 Koronekelese 2 Koronekelesepa dolapona lao oteyamopa dee dokona piso enako buku Esera lenge dokona pii palamo. Isaraele wambu dupwa kingi mende Juu wambu dupwame yuu Bapilone dokona manda reyamo dokopa dee yuu Juta kamba kapu kyuo peyami. Papeyaminyipa yuu taone Jerusaleme dokona kamba Anatu lakando ee wara pyuo palyuo kareyami. Arome pii rema dasipa kunjisi pyasi palamo.
1. Rombo 1-2 Yuu Pesa kiŋi Sairoseme Juu wambu dupwa kiiramo yuu taone Jerusaleme dokona range kamba pena leyamosa peyami.
2. Rombo 3-6 Anatunya tembole anda kamba pipala dee Anatu keta sinya lao maiyami. Maiyaminyipa Anatunya kingi lakandenge yulu kamba kanda soo piyami.
3. Rombo 7-10 Ee kana malu enako epo papeyamopa Juu wambu dee lapo yuu Bapilone yaki nyuo yuu Jerusaleme dokona kamba epo pyaka siyami. Enako epeyaminyi dupwana rapu piyamo akali Esera lenge baame Anatunya mawa pii dupwa soo oto kareya. Soo oto karapala baame wambu dupwa nakamana Anatu lakandenge yulupi nakamana wambu yango pipya piso palyuo pingi yulu dupwape rolena lao nyiso mana lamaiya. Dopa pyuo nyiso kareyamosa Juu wambu dupwa Anatu kame see nao lakando kareyami.
1
Kiŋi Sairoseme Juu Wambu Dupwa Kapu Kyuo Nakamana Yuu Dokona Pena Leya
Ee kana mupwa dokopa Kiŋi Sairose baa yuu Pesa dokona kiŋi ingyuo kareyamo dokopa Kamongo dokome Sairosena monarename pyongo pyao lamaiyamopa baame lowa lapo lao wasapala pyao palyapala yuu muu baame rapu piyamo dusipana maiyuo kapa piya. Doo piyamo doko wamba Kamongo Anatumi poropeta Jeremaya keta lamaiyamo pii dupwa angi kinyi ingyuo peya. Kiŋi Sairose yuu Pesa range dokome pii dake dapa lao leto. Kamongo Anatu yake panda karenge dokome namba rombo palyapala yuu muu peparaena rapu pyuo karo tembole anda andake doko yuu Juta singi dokona yuu Jerusaleme dokona karamo doko kamba pyakape, langiya. Nakamba Anatunya wambu dupwa Anatu role pyao karena. Dopa piramopa nakama yuu Jerusaleme dokona papala Isaraele wambunya Anatu yuu Jerusaleme dokona lakandenge Kamongo dokona tembole anda doko kamba pyakamipwape. Anatunya wambu karapusi palyuo kareyaminyi dupwana lapo anda kamba panya nyisarami lao suu pyarami ramo doko nakamana wambu parali maki dupwame dapa pyuo nyisarami. Nakamame kana kulingipi golope nengepe dee mena matana bange pinji reto minyuo paraminyi dupwape mairami. Dupwa mairaminyipape Jerusaleme Anatunya tembole anda dokona baa mairamili dupwa mairamiko, leya.
Juta Benjamenepana rara dokona akali kyawa dupwamepe purisi akali dupwape Lipae akali dupwape dee wambu menge dupwana lapo Kamongo dokome nakamana monarena pyongo pyao lamaiyamo dupwape rapa rapa pipala Kamongona tembole anda Jerusaleme dokona kamba pyakamila parami ingiya. Dokopa wambu parali maki dupwame nyiso bange malu maiyami. Kana kulingimi wasisi bangepe golope mena matana bange pinji minyuo paraminyi dupwape mee bange keyange lapope dee tembole anda dokona Anatu lakando mairamili bange lapo opetae maiyami.
Kiŋi Nepukatenesame kapope dee bange warake disi yalepe lapo Jerusaleme siyamo nyuo pao banya tembole anda mee bange dupwa anatu lao lakandenge dokona reteya dupwa kiŋi Sairoseme nyuo maiya. Kiŋi baame bange dusipa akali Mitiretate baa kiŋinya bange peparae iso kareyamo doko keta maiya. Maiyamo dokopa baame bange peparae au pyuo yaka lao pepa pyao nyepala yuu Juta gapomane akali mupwa Sesepasa doko maiya. 9-10 Yaka leyamo dusipa pere malawai lasi kana golome wasisi lapo Anatu rae maiyuo maingi bange retenge akalisa rema: 30
pere warake kana kulingimi wasisi lapo Anatu rae maiyuo maingi bange retenge taosande mendaki: 1,000
mee pere malawai lasi akalisa lama dee mange mendaki karo: 29
pere kuki golome wasisi akalisa rema: 30
dee pere kana kulingimi wasisi kuki andete kisima dee akalisa mendaki: 410
dee mee bangeme nenge Anatu pyao kiso maingi dupwa taosande mendaki: 1,000
dusipa ingiya.
11 Sesepasamoo wambu karapusi palyuo kareyaminyi dupwa pipya yuu Bapilone yaki nyepala Jerusaleme peyaminyipa bange peparae nyuo pyaso golome wasisi pere dupwape kana kulingimi wasisi pere dupwape dee bange wakalepe ama malu (5,400) ingiya.
2:1-70 Juu wambu rarape akalyandape yuu Bapilone karapusi ingyuo pisipala kapu kyuo yuu Juta anda epeyami dupwa.