POROPEPE
Wambu Kapa Palyuo Petengena Mana Pii Doko
Buku dakena Anatu baame pii leyamo dupwape wambu dupwa au pyuo karena lao mana pii lasi dupwanape lao pyasi palamo. Yulu yuu gii peparae pingi dupwana lao mana pii malu palamo. Pii wambo dopa lao palamo. Soo otarami lao wambo Anatu baame leyamuli pyuo pipengele. Pii dasipa lapeyamopa dee enakana Anatu rolo lakandena lao pii yulu mona palena piipi lao mawa pii warombo sinya lao piipi dupwa pyasi palamo. Namwa mana pii dupwa yaka laramano dokopa Isaraele wambunya dupwana rora ambasupi renge singi mana lenge akali dupwa mee wambu dupwa yulu rolaena lao soo nyiyaminyi doko serama. Seramano dokopa wambunya ree palu yalya kando palena pii wambu bisinase pingi pii wambu rara wakale wakale range yalya kando karenge pii wambu peparae mona palyuo karena piipi rara dupwa peparae pyasi palamo. Kuki ingyuo inyimungu doko angi iso karena yulu doko pendewa wambu dupwako yako lao ketae pyambungi doko puu minyingi dupwa mata kando laa nao mona retena yulu doko dupwana renge lao malu pyasi palamo.
Renge pii rara wakale peparae dupwa keta mana lasi pii pakirename iki yapo nyuo piyaminyi pyasi palamo.
1
Wambu Kapa Karo Palyuo Pirami Dokona Mana Pii
1 Dapitinya ikinyingi kiŋi Solomone Isaraele wambunya kiŋi dokona mana pii lasi palamo.
2 Palamo dupwa soo nyerami ramo dokopa pii wakale wakale laraminyi dupwana pii anjuku rolae lao soo dee pii anjuku keyange lao soo nyerami. Dopa pyuo soo dokopa renge angi koko palamo dupwa soo gisarami. 3 Mana pii lasi palamo dakena mana nyerami ramo dokome singinya renge palenge wambu ingyuo yulu katalunji nembo pyuo pii katalunji nembo lao pinya suu pyapala pirami. 4 Dokonako ingyuo sepa narami dupwame mana pii palamo dokona mana nyepala kendepuli ingyuo pirami. Dee wanyane akali dupwame mana nyepala dopa pipengelelyamo lao range koto nyuo pirami. 5 Dopa pyuo pii palamo dakena mana nyeraminyi dokome mona palenge soo nyingi akali dupwame kamame soo londaraminyipa mana nyisi wambu dupwa dee konda pyuo soo mana nyerami. 6 Dopa piramo dopaleko ingyuo mona palenge akalinya kongwalu dupwape mana pii lasi dokona renge angi palamo dupwape soo nyeramisa pira.
Parange Dupwa Elya Pyuo Karena Lao Mana Pii Isa Pingi Pingi Pii Doko
7 Wambo Kamongo baa andakeŋe lao suu pyapala dokopa nakama soo nyerami ingilyamo. Dee mona angi pali nange wambu dupwame mona palenge soo nyingi wambu dupwa meeŋe lao nyuo mambunya palyarami dokome mana nyii naramalyamo lao suu pyao karenge.
8 Rakane, embame rakane endakinyipame larambinyili pyuo soo pyuo karape. 9 Akali kalya pyuo eparamo doko kandapala au pyuo karengelamo lao suu pyarami. Doko suu pyao emba endakinyi rakanepana pii warombo soo karapala kapa palyuo karare dokopa auwo kandarami.
10 Rakane, yulu koo pingi akali dupwame emba koo pii lao makande piraminyi dokopa pii napipi. 11 Nakamame dopa lao langirami. Akali mende koto kando pyala monale. Wambu mee kamenge petaminyi dupwa male male lao pyao kumasemana. 12 Ene kandaparamano dokopa wambu petele larami doko kaepala pyarama dokopa kumasi pao serami ingilyamo. 13 Dopa pyuo pyapala nakamana pinji bange dupwa peparae namwana ingyuo nyuo retamanale. 14 Emba namwa ree jela ipu. Eparene dokopa pinji bange waa nyimwa dupwa mokwa soo nyerama lao langirami lyakande.
15 Rakane, emba dopa langirami ramo dokopa wambu dopalena pii sakami nao wakale nyokonyuo karape. 16 Yulu koo pinya kambu nakepanyi nembo pyaraminyi dokonako suu pyaro karaminyi. 17 Yaka lyinya lao kone makaramo doko kando pisiramo dokopa makara doko kapa ingya nara. 18 Yaka dokome kendepuli ingyuo wanjepala paramopape akali yango mende randa mainya anga pyuo karapala nakama range kame seraminyisa kone makarami dokome mangena minyarasa kumarami. 19 Doko suu pyao akali kendepo nenge nakama yale lapome nakama waa nenge dupwako pyao kumakarami lao letamo.
Mona Palenge Singinya Renge Dokome Wambu Ingyuo Pii Lao Kee Letamo
20-21 Kote lao karenge mare dokonape makete yuu dokonape yuu wambu epo malu palyuo karenge peparae dupwanape mona palenge singinya renge dokome wambu ingyuo kyakale lao karamo. Doko kale yukupala selapape.
22 Mona palenge singinya renge dokome wambu ingyuo pii dapa pyuo letamo. Mona pali nange wambu dupwa yuu gii akipare mona pali nange ingyuo karalana suu pilyamisi? Yuu gii akipare soo nyingi wambu dupwa kando meeŋe lao giyalya giyana pyuo nyuo mambunya palyuo kararamisi? Anjokorape mana nyelana pyuo kararamisi? 23 Kopetame pilyaminyi lao pyalana pyuo laro dokopa warombo selapape. Dokopa dopa pyuo role pipa lao nakama pii angi mana langiru. 24 Nambame nakama panda joo ipupwa lao kyakale lapunupape nakama kale yukupala see nalyaminyi. Doko mende lalyane lao wangu lakapala selana suu pyaa nalyaminyi. 25 Nambame nakama dopa pyuo pipingi lapunu doko sili see nale lao karaminyi. Nambame dopande piralyamo lao langyuo rolapuliŋi lao suu pyapunu doko nakamame langipili lao suu pyaa nalyaminyi. 26 Dokona lao nakama randa nyerami dokopa nambame giyalya giyana piru. Dopako pyuo nakama keta paka renge sukusa eparamo dokopa giyalya giyana pyuo kopyali inginyi nembaro. 27 Randa renge andake porambaiye koo minyuo epenge dopale ingyuo epo randa jeramo koo keta palyuo pisirami. 28 Dopa pyuo piso nakamame namba kyakale laraminyipape dusa karoŋo lao isingi laa naro. Karepe lao koto paeyo kararaminyi panda dupwana kararono kando nyeraminde daa. 29 Nakama soo nyingi akali ingyuo karapuli lao suu pyao kara nalyaminyi. Kamongo baa pakale pakale lao lakando kara nalana suu pyao karaminyi. 30 Nakamame nambame dopa pyuo pipingi lao langya napili lao suu pyao karaminyi. Dee nambame dopande piralyamo lao langipunu dokopa sili see nale lao karaminyi. 31 Dopa pyuo karo koo piminyi dokona lao koo doko nakama keta epara ingilyamo. 32 See nange wambu dupwa mona palenge ingyuo kara namwali lao suu pyapala kumasi ingyuo karaminyi. Wambu angi rolae suu pyaa nao mee male male lao kopyali ingyuo palyuo karo pingi dupwa kwaeyo paramisa pira. 33 Dopa piraminyipape mendeme doko mende lalyane lao soo nyerami dupwa range kyawa lete nyerami. Mona seramo pisipala nakama keta koo epasara lao paka narami. Dopa lao mona palenge singinya renge dokome wambu ingyuo kyakale lao karamo.