Tarou ta
LUK
Sahou Tanan
Sahou Luk atorou taha anyolom Jises iy ndramak ta akohok iri Isra-el, ma iri lau mwan ma badih rayah ja ame hamon. Udu bolo len ma bwena Jises mene amekes gok tan, iy tiye iri lau mwan ma badih i buku doh, Malawin Ndrabun badeh tutuni iy ta tiye sahou mwasin ta Kindrei ili tiri lau ndra-in tiri lakou bwe (ou anyolom sahou udu ta kalan 4:18). Ma handru labai, udu bolo buk dah Luk asehek kundruh solo-an ta Jises tikisi iri mwan ma badih bwese iri maha-an solo-an labai, ma iy eme amekes mwasin ili tiri.
Iri lakou Jises amekes, eme bwidi iri lau tan sekesek tinan labai i tan. Udu bolo len mene Mariya edeu Jises, iri lau mwan ma badih badeh, sekesek, (ou anyolom sahou udu ta kalan 1:42-48, ma 2:10), ma ta ano ta buk, ta len mene Jises iu i loken ili kandrah, iri lau badeh, sekesek tinan labai (ou anyolom sahou udu ta kalan 24:52).
Lakou solo-an ta nyala Jises Luk le ari asehek kundruh ta aliy. Sahou ta nyala iri lakou marakon nane doh bado bolo iri buk rayah ja bwe. Luk le ari badeh, asehek iri kundruh ta iri lakou solo-an mene asahan na len ta Jises eme asahan kon munyak. Luk le ari asehek sahou sokek Jises asehek kundruh ta ndramak ari badu Samariya aseben ndramak ari iri lalou adai iy udu san, ma sahou sokek ta kundruh ta nah ari iy ruwani taman ma iy edek laleyah na budon tan, ma iri sahou sokek ta Jises rayah ja. Luk le ari badeh, asehek kundruh ta iri lakou marakon mene asahan ta Sakiyas, iy doh ta akohok luk tiri lau.
Iri lakou rayah Luk asehek sahou solo-an ta aliy, idoh iri kandriyen ta salom, ma gok ta Malawin Ndrabun, ma kandriyen ta Kindrei ta mani kandriyen ndra-in ta iri lau mwan ma badih. Sahou ta Luk solo-an sese ta lakou ale iri badih amekes.
Ta buk dah sahou ta Luk badeh, bano bwe le. Luk ale atorou buk ari taha aloh Lahou toro Aposel, buk doh badeh, asehek kundruh ta iri lakou mene iri aposel amekes na len Jises ndra-au ndrala loken ndra kandrah.
Iri Sahou Tinan
Tasah handru Luk atorou buk dah (1:1-4)
Len ta adeu Jon ta alomwa uru Jises (1:5–2:52)
Sahou eme boho Jon ta alomwa (3:1-20)
Jon inyu Jises ano ma balik none iy (3:21–4:13)
Jises amekes gok tan ma bwena handru udu Galili (4:14–9:50)
Jises ere Galili edek ili Jerusalem (9:51–19:27)
Jises ili Jerusalem buku kabin ano iy imek. (19:28–23:56)
Jises ndramak ja. (24:1-12)
Jises amai laleyah. Kindrei andrei iy ili kandrah (24:13-53)
1
1 Jo ai, Tiyopilus. Jo atorou la-ukei dah ewek tam:
Iri lau solo-an mene ndratorou sahou solo-an ta nyala lakou mene asahan bolo ndrokowa taha. 2 Oro atorou ta nyala lakou mene to ndranuhun bwena mene ndra-au. Ya lakou doh mene, oro atou na mada oro amwenen, udu ndra bada katin eme, eme ma oro a lohowan ta atiye. 3 Ou le ai, Tiyopilus, i buku jo mene ndratakalahei lakou mari doh, ndramwenen udu ndra bada katin eme. Eme jo abudon mwasin handru ta jo katorou sarada lakou mari doh, ki tam. 4 Jo atorou ewek tam, ta ou atanam kamwenen handru ta nyala lakou mene ou ndranuhun ndra-au.
Kundruh tiri lakou mene asahan kabatana Elisabet edeu Jon ta alomwa ma Mariya edeu Jises
(Kalan 1:5–2:52)
Sahou nyala Jon ta alomwa asahan
5 Na len kabin Herot atondrok munyak badu Judiya, pris* Pris badeh, iri lau ta ndrokowa lau hawe Kindrei ta asolom ma ta asun salom udu mada koto-ok. Ma iri ale udu bolo jaha ari ari asun ndrelekei i ta Kindrei udu asiu tinan ta Kindrei. ari udu aliy. Nyaran Sekaraya. Iy asahan ta lundriye pris Abijah oro. Ya udun badeh, nyaran Elisabet, lundriye Aron oro badu hawe oro pris ale. 6 Uru ma la-uh badeh, bamekes se kandriyen ndra-in bandra-i ta mada Kindrei bwe. Uru badeh, an hamon handru ta sahou batanau ta Laban, ma an hamon ta kandriyen ta Laban mari. 7 Uru badeh, ndra alon labai, ya uru bato-ou ari nah bwe. Tasah, Elisabet badeh, kis.
8 Eme na len ari, Sekaraya hawe oro lau badu hawen, amekes lahou ta pris, i ta Kindrei. 9 Eme i buku none in hamon ta kandriyen tiri pris, oro asoh nyek, ta are handru ki bolo bosoh ndrabun udu bolo asiu tinan ta Kindrei, ta asun ndrelekei udu mada koto-ok. Eme nyek badeh, tiye Sekaraya. 10 Ano len ta asun ndrelekei asahan, Sekaraya i bolon, ya iri lau ame are manan atudun, ma amekes salom.
11 Eme angelo† Angelo badeh, iri lau rayah badu hawe Kindrei ta ndrahu so-ok tan. Iri doh badeh ndrabun ale. ari ta Kindrei badu loken eme, ales udu loboho lim salin bilisiu ta ndrelekei nane, anya udu mada koto-ok dah. 12 Sekaraya atou iy le badeh, iy toroyani iy ma iy inoh. 13 Arile angelo dah tiye i tan, “Sekaraya, ou sanoh. Kindrei ndranuhun salom tam, udum kameh atehei nah mwan ari. Eme ou tondrohani nyaran ki Jon. 14 Buku atehei iy eme len, ado kameh sekesek, ma hawe iri lau mari kameh sekesek ale. 15 Ya udu mada Kindrei, iy kameh asahan ndramak ari tinan handru. Iy sa-un waen hawe gwa boto-on, ndri-iy labai. Atehei iy eme len le badeh, iy kameh idih na Malawin Ndrabun. 16 Iy le kameh tiyani iri lau badu Isra-el kameh ame hamon ja, ame hawe Laban Kindrei tiri. 17 Ma idah kameh iy i bwena ta Laban na boto-on, ma hawe nyaran i tinan i buku none propet Alaija. Ma idah kameh iy kameh tubuni ndrine tama iri nah eme hamon ja, aseken nadu iri; ma iy kameh tubuni ndrine iri lau ta banuhun sahou bwe, ame hamon ta budon lewen ta lau mwasin; ma hawe idah kameh iy lowosa iri lau ta Laban, ado abe-en iy.”
18 Eme Sekaraya tiye i ta angelo, “Ki buku sah kameh jo ki tanan lakou handru dah kasahan? Tasah, aru uduk ma la-uh badeh, ndra alon labai.”
19 Eme angelo dah tiye, “Jo dah, angelo Gabiriyel. Jo ales udu mada Kindrei eme dah, ta asehek nyalam ta sahou mwasin dah. 20 Ma idah kameh ou winiyan basehek sahou bwe; winiya le len ta aliy barasahan. Tasah, ou batehei budon tam handru ba-en ta sahou tek bwe.”
21 Eme iri lau abe-en Sekaraya, abe-en abe-en labwe. Eme iri lomondra anya, “Iy ndra luluwen labai udu bolo asiu tinan ta Kindrei.” 22 Ano Sekaraya eme len badeh, iy winiyan basehek sahou bala tiri bwe. Eme iy asehek sahou na andra lim le i tiri. Eme iri anya, “Iy kede-eh nane amekes lele in asiu tinan ta Kindrei.”
23 Lahou tan ta amekes ano, iy iu i asiu tan. 24 Udu len rayah ano iu, Elisabet nah ere tan. Eme iy udu le asiu winiya bun ma limeh. 25 Eme Elisabet tiye, “Kabwai, Laban ndrasebenei jo i san dah. Iy ndrabwidi maha-an ta bwilima udu tek badeh, ndra-au!”
Lau atanan Jises eme len
26 Eme nah udu ta Elisabet asahan bun onoh badeh, Kindrei suni angelo Gabiriyel ja, ili kon Nasaret, udu loboho Galili. 27 Iy anya katiye sahou ta tandrakan ari, anya ki ta badih ari bakohok mwan bwe le, san tan ndra ta ndramak ari nyaran Josep. Ya Josep doh, badu boho kamen ta kabin Debit oro. Ya nyara badih doh, Mariya. 28 Eme angelo Gabiriyel ili asahan hawen ma asumon iy anya, “Bada-an tam! Laban udu hawem, ma iy atehei nyosowan laba tinan ewek la-um!”
29 Eme Mariya manin atur ta sahou ta angelo dah, eme iy lomondra saba sahou tan doh kameh. 30 Eme angelo dah anya, “Mariya, ou sanoh. Kindrei badeh, sekesek tam handru. 31 Idah kameh, ou tuwi nah mwan ari ere ndrinem, eme ou tondrohani nyaran ki Jises. 32 Iy kameh asahan ndramak tinan, ma idah kameh aloh iy Nadu Kindrei udu loken labai. Laban Kindrei kameh mesekei iy asahan kabin, i buku none tubun Debit mene, 33 ma idah kameh iy asahan kabin ta atondrok lundriye Jekop oro, udu le buku doh; ma tondrok tan kameh winiyan bano bwe!”
34 Eme Mariya tiye i ta angelo, “Jo badeh, bakohok ari mwan bwe. Idah kameh ki buku sah handru?”
35 Eme angelo dah anya, “Malawin Ndrabun kameh ewek la-um, ma hawe boto-on ta Kindrei ewek la-um. Ta katin doh le, nah doh kameh i ndrabun ma aloh iy Nadu Kindrei. 36 Ou tanam boram Elisabet, iri asehek anya iy kameh nadun bwe; iy badeh, ndra alon labai. Arile na len dah badeh, nah udu tan bun tan ndrasahan onoh ai. 37 Lakou mari kede-eh Kindrei winiyan mesekei le ai.”
38 Eme Mariya anya, “Jo dah, jo lohowan ta Laban, kasahan ki buku ou asehek badeh!” Eme ma angelo dah iu ai.
Mariya ili selesen Elisabet
39 Ano udu hamon ja, Mariya alokou iy, ano iy edek suwi iu ili bolo ndrondro-ou, badu kon tinan ili kon ari udu bolo Judiya. 40 Iy ma sekesek tan edek iu ili bolo asiu ta Sekaraya atou Elisabet. 41 Eme Elisabet anuhun sahou sekesek ta Mariya, ma nah udu ndrinen nyokolokon. Eme Elisabet idih na Malawin Ndrabun, 42 ma iy asehek sahou boto-on anya, “Ou badeh, nyosowan tam, sakalawi nyosowan tiri badih mari, ma nyosowan ki la-u nah, na len ou kameh adeu iy eme len! 43 Lakou laba tinan dah, asahan eme tek, ta sasah handru? Ya eme tine Laban eme selesen jo dah. 44 Jo anuhun sahou sekesek tam le badeh, ma nah udu ndrinek nyokolokon ta sekesek. 45 Idah kameh ou sekesek handru, tasah budon handru tam ndra-en ta sahou mene Laban ndrasehek tam.”
Wari ta Mariya ta atudun nyara Kindrei
46 Eme Mariya iyah wari ma tiye i buku doh:
“Ndrinek atudun nyara Laban;
47 ma kohak handru sekesek ta Kindrei, ta aseben jo,
48 tasah jo badeh, lohowan tan ma iy tondrokei jo!
Na dah kameh iri lau rebesem, ano rebesem kameh aloh jo akohok nyosowan.
49 Tasah, Kindrei tinan labai, iy mesekei lakou tinan labai ndrame tek, ya nyaran badeh, ndrabun.
50 Iy leheya tikisiy tan i tiri lau heh anoh iy; ano ili ta lau rebesem au, ano lau rebesem au, i le buku doh.
51 Iy amekes kalem tinan na bohan;
ma iy tikahei iri lau ta budon, udu ndrine iri anya iri le ai, badeh iu.
52 Iy tikahei iri kabin tinan ame andri ta koyeu tiri;
ma iy tutuni iri lau, amekes lahou i buku iri nah a loken.
53 Iy nyohonei iri lau ta son na lakou mwasin;
ma tikahei iri lau, tiri lakou solo-an au, na luka lim ma na luka kati.
54-55 Eme iy tawi tandrakan tan i tiri lau badu Isra-el,
ma iy bamani tikisiy tan i ta Abraham ma lundriyen oro bwe, ta udu le buku doh, i buku iy mene ndratiye ta tubu ahi iri mene ndra-au.”
56 Mariya udu hawe Elisabet udu gwek winiya bun taloh, ano iy iu i hamon ja ili kon tan.
Elisabet edeu Jon eme len
57 Eme len ano ta Elisabet anya kedeu nadun, iy atehei nah mwan. 58 Eme ya iri lau asiu tiri udu mirihik tan, hawe lowan oro ndranuhun ta Laban amekes mwasin i tan handru. Eme ya oro mari ame sekesek hawen.
59 Ano udu, nah dah len tan asahan ndru la-uh badeh, oro ala ta asan ku-in; eme oro anya katondrohon nyaran, ki nyara taman Sekaraya. 60 Arile tinen anya ja, “Bwe! Nyaran kameh aloh iy Jon.”
61 Eme oro tiye i tan, “Nyara lowa ado ari bala buku aliy, bwe oh!” 62 Ano oro amekes kalem i ta taman ta nyaran nah dah, ki are lau handru. 63 Eme Sekaraya edeu kalem anya, “Ari barak keme, ya jo katorou nyaran.” Eme iy torowenei nyaran badeh, Jon. Eme oro mari, boho oro asak! 64 Eme na le liliy, Sekaraya asehek sahou ja, ma iy atudun Kindrei. 65 Eme iri lau badu mirihik badeh, boho iri asak labai. Eme ma nyala lakou dah aseker ili bolo ndrondro-ou, kon tinan loboho Judiya. 66 Iri lau anuhun nyala aliy, eme iri lomondra ma ndremenya, “Iy nah doh kameh asahan sah handru kameh?” Oro badeh, lomondra i buku doh, tasah boto-on ta Laban udu bwele-en.
Sahou propet ta Sekaraya
67 Ano tama Jon Sekaraya idih na Malawin Ndrabun, ma iy asehek sahou ta lele.
68 “Taha katudun Laban Kindrei ta Isra-el!
Tasah, iy ndrame ta akunoh iri lau tan.
69 Iy atehei ndramak ari boto-on eme ta seben taha, badu boho kamen ta lohowan tan Debit,
70 i buku none iy mene atehei sahou kani iri propet ndrabun, bwena mene ndratiye ndra-au,
71 Ya iy aseben taha are mine iri lau ta amekes bahun eme tataha,
ma aseben taha ado mine iri lau, ta ato-ou kaliu eme tataha, ame len.
72 Ma iy kameh leheya tikisiy i ta tama taha iri,
ma ta budon ta sahou randra le tan mene,
73 ta sahou tandrakan tan mene iy tandrakan i ta Abraham:
74 Ta aseben taha ado mine iri lau ta amekes bahun eme bada taha,
ma mesekei taha sanoh ta amekes lahou tan.
75 Ma taha ka ndrabun,
ma kado mwasin ta mada Kindrei na len mari, udu bolo manyah tataha.
76 Ya idah kameh ou naduk kameh, aloh ou propet ta Kindrei, udu loken labai;
Ma ou kameh au ala bwena atehe san ta Laban,
77 ma atiye sahou tanan i tiri lau tan ta nyala seben, ndrame.
Ya iy kameh balen mani karei ma lomondra ndra-in tiri.
78 Tasah, ta tikisiy mwasin ta Kindrei tataha, iy kameh mesekei lomadan ta aseben kameh eme loke la-u taha.
79 Ma anya udu kandrah eme la-u iri lau badu heh, badu heh, are bolo lulik ta imek, ma leheya san ta kati taha, eme san mwasin ta bahun bwe.”
80 Eme iy nah dah, i tinan, ma hawe boto-on ta Malawin Ndrabun udu la-un, ma manyah tan badeh, badu lomale an winiya iy le barasahan barame lewan, mada lau mari badu Isra-el.