Pol ile malueng ako i wat i a toko lemioongare nge ako o voth a rem a Kolosi
Kolosi
Ritetong nge a Kolosi
Ava Pol i voth a mang a midenga lemi ako a rem pomnga a Rom, na i wat malueng ake a toko lemioongare nge ako o voth a Kolosi ako a epee a Esia. (Pakekere ole Omaing 28:16-21) Nge wop lemi aken i wat mun malueng or aini, e a Pilemon nge, na e a Epesus angare nge. Na Kolosi anga pelie o velpol ini toko lemioongare ako nge a Pol ile panongpolong avele, ava ini inga a Epapras ako i nongpol Panongpolong Sivenga ako Pol i panongpol Epesus angare nge, mako i es ma i panongpol Kolosi angare nge. (1:7-8; Pakeke 19:10) Pol i wat malueng ake mo aro i tor Kolosi angare ole nge pamirealonga le apaltetongare ole riong le apaltetonga pulua. Ranga ve ako o paroro nang pelie, (2:16) na o paroro mun enselre. (2:18) Na o sis ve aro toko alavusnga aro o panes a Moses ile patorong, (2:21, 26) naro o panes mun vothung ako nge toko ini peti isnga. (2:11) Na olo wom inga nge mire ulue anga panesnga, na o rivenga mire aken panesnga aro i sung mimiong sivenga a tokokoere nge. (2:4, 8, 18) Aveto Pol ilo wom rintet nge a Krais ipanesnga, na i ri ve ienga inga i pavurvur ako aro i el werer it, na ini inga a God ia sei. (1:15) Krais i pamenu ur alavusnga nomenga. (1:16) Na nge a Krais ile engenging ur alavusnga o voth pis a omei. (1:17) Krais ini toko teltelnga ako i los werera nge rinong. (1:18) Na Krais ome a God kene o thun inga. (1:19; 2:9) Krais i pamu werer ur alavusnga a God nge. (1:20-22) Maken Krais i mukal nge ur alavusnga, na i pavurvur rintet nge pamiminger. Aken ini ur aolonga ako malueng ake i ri nge.
Ur alavusnga i voth a Krais isa thewo, na God ile mimiong na ile vothung i vual a i nge
1
(Vonge 1:1–3:4)
Tho ini a Pol ako God i panes ilemi ma i ateal tho ve tho ini a Krais Jisas ile pakeke na titeir a Timoti i voth tomo nge tho.
Tho wat malueng ake a thomu titeikre ako ini a God ile toko riringare ako a Kolosi, thomu ako o teo a Krais nge na o panes senu i.
Aro Titemer a God aro i sungu ile themosaling na ile lemi moring a thomu nge.
Pol i ri sivengaing a God nge, nge Kolosi angare.
Na nge nang elonga ako them nong nge thomu, them ri sivengaing a God nge ako ini ar Pomnga a Jisas Krais Itema, eneke them nongpol nge lomu lemioong nge a Krais Jisas na nge lomu asaguong nge a God ile toko lemioonga alavusnga. Na nomenga nge wop lemi ako thomu o nongpol riong nunganga ako ini Panongpolong Sivenga na lomumuo nge, thomu o nongpol nge ur ako God i monsi i lale a Pen a Urvet ve aro i sungu i a thomu nge, mako o men sial i. Na lomu men sialing nge ur sivenga aken i pavelpol lomu lemioong na lomu asaguong aken. Na Panongpolong Sivenga ako i velpol a thomu nge, toko pulua a pen elonga ake ru a ulue o nongpol mun i, na i pavelpol monnga a ole mimiong ranga ve ako i pavelpol ol monnga a lomu mimiong, nomenga i patea nge nang ako thomu o nongpol i, na lomumu i nine nge ako God ile themosaling nge toko alavusnga i nunganga. Na Epapras kene i patoral thomu nge a God ile themosaling aken. Na ini a Krais ile umonga tomo nge them, na i oma senu a Krais ile omaing. Na ar sagu i na i opoal them nge lemem omaing. Ma i ritet them nge lomu asaguong ako Oni Riringa i pavelpol i a thomu nge.
Pol i nong a God nge mo i paengeng Kolosi angare olemi.
Mako i patea nge nang ako Epapras i ritet them nge thomu, na them pesrou nge nongong nge thomu avele. Na them nong a God nge ve aro i panine lomu mire mo i aolonga nge Ioni Riringa ile omaing, maken aro lomu mire i nine senu nge ur ako God i sis ve aro thomu o oma i. 10 Na them nong venen aken, mo aro thomu o nak menong ako aro Toko Pomnga ilemi i sivenga nge, naro ilemi i sivenga mun nge lomu omaing alavusnga, naro thomu o pavelpol omaing sivesivengare, naro lomu mire nge a God aro i aolonga. 11 Na them nong nge a God mo aro i paengeng thomu nge ile engenging elonga mo i pavurvur nge ile engenging aolonga ako i pathengal i a tokokoere nge lale, mo aro thomu o mit engeng mun nge matheongre potunnga, naro keumu a riong nge avele, naro lomumu i ngo senu inga nge. 12 Na them nong mun ako aro thomu o ri sivengaing a Titemer nge ako i oma thomu mo aro thomu o el mun ur areko i ateal i nge ile tokokoere ako a Pen a Urvet ako i vual nge pen lalanga. 13 Na thomu o pavurvur nge ur aken elnga, eneke i eltetpot it a Satan imeni a mideng lemi, mako i paeso it a Itun ako ia sagu rintet i, a imeni nge. 14 Na nge Itun ile omaing, ilemi simikal ler vothung kerengare ma i ol werer it.
Pol i ri nge a Krais ile mimiong na ile omaing.
15 Na toko e avele i pavurvur aro i thopol a God, aveto te thopol a God ia sei ako a Itun nge. Na God ia tengen aken i voth tel, na i mukal nge ur alavusnga ako i pamenu ir. 16 Eneke ini ur alavusnga opateanga ma i pamenu ur alavusnga ako a Pen a Urvet na ulue, ur areko te thopol ir, tomo mun nge ur areko te thepol ir avele, ranga ve ini ensel engengare, na tamata kerengare, na meleunre, na ur engenga ako o voth a malang po. Na Itun i pamenu ur alavusnga mo aro ur alavusnga o pavothal nge i. 17 Na ur e avele i velpol rongan, na Krais i voth tel lale, na nge ienga inga ur alavusnga o voth pis a omei. 18 Na ini ile toko lemioongare opounga. Na toko lemioongare o ranga ve ini ilopat na o el mun ole mimiong a i nge, eneke ini a God ia tengen ako i palos werera tel i nge rinong mo aro i mukal nge ur alavusnga. 19 Ma ini a God ia sei, eneke God i ateal i ve aro isivenga i vual rintet a i nge. 20 Na God ilemi ako ve, aro ur alavusnga ako i voth a ulue na Pen a Urvet, aro o lo werer a i nge la, mako i sungpot Itun mo aro i rin a won ngoronga nge mo ia mla i pavelpol lemi moring a it nge.
21 Na nomenga thomu o voth mela a God nge, na lomu ngarang mun i, eneke nge lomu lemi rumong kerenga na lomu vothung kerengare. 22 Aveto ponange i pavelpol titeinpeling tomo nge thomu, nge Itun ile rinong ako o pun rin i alamimminga. Na i oma venen aken mo aro thomu o riri rintet, na o vengveng, na omu theki e avele, 23 tova ve lomu lemioong i voth engeng inga ako a i nge, na o mit engeng, na o men sial engeng nge ur ako o nongpol i nge Panongpolong Sivenga. Ma tho a Pol, tho ini a God ile umonga nge Panongpolong Sivenga ake. Na Panongpolong Sivenga ake i kimapot a pen elonga ake ru a ulue.
Pol i ritet nge ile omaing ako God i sungu i a i nge.
24 Na nge wop lemi ake, lemik sivenga inga nge sisisong ako tho el i nge lek omaing ako tho panongpol areko or ini Judare avele, ranga ve ini thomu. Na tho patopalal sisisong ako rongan i voth, ako Krais i ateal i ve aro tho el i, mo aro tho opoal ile toko lemioongare. Or kene o ranga ve ini ilopat. 25 Na God inga ako i ateal tho ve tho ini toko lemioongare ole umonga ako aro tho panongpol thomu areko thomu ini Judare avele nge a God ile riong elonga. 26 Ako nge ile riong inkinenga ako nomenga i ngo kine a pompomere nge, aveto ponange God i pathengal ol i a ile tokokoere nge. 27 Na i ateal or ve aro olemi mire ako ve, ile riong inkinenga aken i ri ve, God aro i oma senu rintet mun nge areko or ini Judare avele. Na ile omaing aken i mirenga ve, aro ve Krais i voth a opomu lemi, aro thomu o men sial ol nge ur sivesivengare ako a Pen a Urvet.
28 Make them panongpol toko alavusnga nge a Krais. Na them tor ole na them pamireal or nge mire elonga ako God i sungu i a them nge, mo aro nge lemem omaing aken aro o motu nge ole teoong a Krais nge tova o mit a God itheki. 29 Na ake ini lek omaing ako lok vur rintet nge omanga, nge a Krais ile engenging aolonga alavusnga ako i voth a tho nge.