Pol ile malueng ako i wat i a toko lemioongare nge ako o voth a rem a Epesus
Epesus
Ritetong nge a Epesus
Pol ile malueng ake i ritet nge pasealing sivesivengare ako tokokoe areko o teo a Krais nge o el i. (1:3-14) Nge ler teoong a Krais nge, God i ateal it mo te voth toko vengvengare a itheki, (1:4) na i patu it, (1:5) na i el werer it na i pavthopot it nge ler vothung kerenga olalnga, (1:7) na ilemi simikal ler vothung kerenga, (1:7) na i paateal it nge Ioni Riringa ve it ini ile, (1:13) mo aro lemir mire ako ve, aro i pasealu it nge ile ur sivesivengare. (1:14) Na God i pamimi it venen aken mo aro tokokoere o risea i. (1:6, 12, 14) Mako Pol i nong nge a God ve aro it toko lemioongare aro lemir mire senu nge mimiong ponganga aken. (1:15-23) Nomenga ler vothung kerenga i kin it, aveto God i themosal it (2:1-7) mo ako toko kathnga ako ilemio nge a Krais, God aro i pasealu i nge mimiong ponganga aken, na toko e avele i pavurvur ako aro i el mimiong ponganga aken, nge isivenga ile engenging. (2:8-10) Nomenga it areko ini Judare avele, te voth mela nge a God, aveto nge ler teoong a Krais nge, God i veliloa it tomo nge Judare na ponange te velpol ol ini toko riringa nge mitong omole a itheki. (2:11–3:13) Na ler velilopeling nge mitong omole aken ini ur aolonga ako i ngo pat avele nge tovu po pulua (3:3-6) na Pol i nong nge a God ve aro te pavurvur aro te ate senu a Krais ile asaguong sivenga aken. (3:14-21) Na God pasealu it nge mimiong ponganga aken lale, aken aro te naktet ler esong mo i panes mimiong ponganga a vothung. (4:1–6:20) Aro te ate senu ako it alavusnga te velpol ini a Krais ilopat omole inga, (4:1-16) naro te teuna ler mimiong ponganga aken ranga ve ini tekruk. (4:17-32) Aro te mimi a pen lalanga lemi, (5:1-21) naro te oma vothung sivenga nge ewiworre, tuturre, ninerre, titemerre, ler mukalingare na nge ler toko um polpolongare. (5:22–6:9) Na Pol i patopalal ile riong nge riong engenga ako aro te teun punonga a teunong sivesivenga ako i es a God nge me, mo aro te pun tomo nge tamata kerengare mo te mit engeng na te voth mela nge vothung kerenga omanga. (6:10-20) Na ur aolonga nge malueng ake i vene: Aro it toko lemioongare aro ler mimiong i panes mimiong ponganga ako God i sungu i a it nge, ako nge ler teoong a Krais nge.
God i oma it mo te velpol ini toko ponganga ako nge ler teoong a Krais nge
1
(Vonge 1:1–3:21)
1 Tho ini a Pol ako God i panes ilemi ma i ateal tho ve tho ini a Krais Jisas ile pakeke.
Tho wat malueng ake a thomu areko ini a God ile tokokoere nge ako a Epesus, ako o engeng nge a Krais Jisas ipanesnga.
2 Aro thomu o el themosaling na lemi moring a Titemer a God tomo nge ar Pomnga a Jisas Krais nge.
God i oma senu nge it, eneke te teo a Jisas nge.
3 Te risea a God ako ini ar Pomnga a Jisas Krais Itema ako i oma senu nge it nge ile sungong Pen a Urvet anga elonga ako i opoal onir nge, ako nge ler teoong a Krais nge.
4-5 Te risea a God, eneke nge wop lemi ako God i pamenu ur e rongan, i ateal it lale ve, aro te teo a Krais nge mo aro te riri na ar theki e avele a God itheki. Na i ateal it lale ve aro i patu ol it mo ini itutunre nge ler lemioong nge a Jisas Krais. Na i oma venen aken, eneke ilemi ve aro i oma i na i, panes inga ilemi aken. 6 Naro te risea a God nge ile themosaling aken ako i sivenga rintet, eneke i sung polpol ile sungong a it nge, ako ini Itun ako ia sagu rintet i. 7 Na Itun aken i rin mo aro i el werer it, na ia mla i eltetpot ler vothung kerenga a God itheki tova te teo a i nge. Na God i oma venen aken, eneke ile themosaling a it nge i aolonga rintet. 8 Ma i lel ranga ve ini thei a it nge tomo nge mire sivesivengare na lemi rumong sivengare. 9-10 Na God i pathengal ilemi inkinenga nge a Krais a it nge lale, eneke ilemi ve aro i oma venen aken. Na i pathengal it ako nge nang ako i ateal i lale ve aro i veliloalo ur alavusnga ake ru a ulue tomo nge ur alavusnga ako a Pen a Urvet lemi mo aro i sungu i a Krais imeni mo ini ur alavusnga ole nepes. Naro i oma ol ur aken vengtun nge nang ako i ateal i lale.
11-12 God ako i oma ur alavusnga mo aro o panes inga isivenga ilemi, i ateal tel them Judare ako aro them ini ile tokokoere ako nge lemem teoong a Krais nge, na i oma venen aken, eneke nomenga i ri ve mo i panes inga ilemi mo aro imonnga i velpol. Na i ateal them venen aken mo aro them risea a God nge ile sivengaing aken. 13-14 Na thomu tokokoe areko thomu ini Judare avele, thomu o teo mun a i nge, nge wop lemi ako thomu o nongpol ile riong nunganga ako ini Panongpolong Sivenga ako i pamimi thomu. Na nge wop lemi ako lomumuo nge a Krais, God i paateal thomu nge Ioni Riringa ve thomu ini ile, ranga ve ako i kin ile riong nge lale, mako thomu o teo a Krais nge. Na i sungtun it nge Ioni Riringa aken, na lemir mire ako panen aro i sungpot ol ur alavusnga ako i kin ile riong nge ve aro i sungu i a itutunre nge, ako ini it. Naro Oni Riringa aken aro i theal senu it i pavurvur nge nang ako aro God i ol werer ol ile tokokoere nge. Na te risea a God nge ile sivengaing aken.
Pol i nong nge a God mo i panine Epesus angare olemi.
15-16 Na lemik rum nge ur areko tho ri nge lale, make tho pesrou nge nongong nge thomu avele. Ma tho ri sivengaing a God nge, nge thomu, i patea nge nang ako tho nongpol ako ve, lomumuo nge a Toko Pomnga a Jisas, na ako omu sagu a God ile toko alavusnga. 17 Na rongan tho kisis lek nongong a ar Pomnga a Jisas Krais ile God nge ako ini Titemer ako i sivenga rintet, ve aro Oni Riringa aro i pavengveng lomu mire, naro i pathengal senu a God a thomu nge mo aro lomumu mire senu nge ur ako God i sis ve aro o oma i. 18 Na tho nong ve aro lomumu i thep mo aro lomumu mire senu nge ur areko i leng thomu ve aro lomumu i voth nge, na o men sial nge, na nge ur sivesivengare ako aro i sungu i a ile tokokoere nge ako olemio a i nge. 19 Na tho nong mun ve aro lomumu mire senu nge ile engenging ako i aolonga rintet, ako i voth tomo nge it areko lemiro nge a Krais. Na ile engenging aken, i ranga ve ini ile engenging aolonga 20 ako i oma i nge a Krais, nge ako i palos werera i nge rinong, ma i pamen ol i a imeni sivenga nge anga ako a Pen a Urvet lemi, ini pen ako o papompom i nge. 21 Na Krais ile engenging i mukal nge ur alavusnga areko ole engenging i voth, tomo mun nge enselre na tamatare. Na iion i kima na i mukal nge ioning alavusnga ponange na panen ako aro ile vusonga avele. 22 Na God i pathealu a Krais nge ur alavusnga mo aro o voth a isa thewo, na i oma venen aken mo aro i opoal toko lemioongare. 23 Na toko lemioongare o ranga ve ini a Krais ilopat na Krais ini opounga. Na aro ve toko lemioongare o teo a Krais nge, aken ilopat alavusnga i vurvura ol. Na Krais i patopalal ur alavusnga.