1 TESALONAIKA
KUIMP TEPA IK KɄⱠ
Ya Buk Ei Nga Puⱡ Ei:
Pol ndi, mon ei, mondpa pili wamp kont nga mat kʉn ropa ngurum. Ei wamp mbʉ mbun mindil orum mbila nimba ronduⱡ mundpa, molk kai mondʉk, en enim nga kongun mbʉ rʉk rʉk etʉk, wote Kraist yant omba ei nga man ngurum.
Ya Buk Ei, Nam Rurum:
Ya buk ei, Pol ndi, mon rurum.
Mon Ropa Nam Ngurum:
Pol ndi, mon ei ropa, Tesalonaika kona ila Got nga rapa tenda wamp kʉⱡ kʉn ngurum.
Ui Nant Ila Rurum:
Pol ndi, mon ei, Korin kona ila moⱡpa, mon kuimp tepa rurum mbʉ nga mon ti ya ei. Ei Kraist metʉng ei kʉn, mbuldung orunga pana 51 ila mon kʉⱡ rurum.
Ik Ronduⱡ: 1 Tesalonaika 4:14
Tʉn wamp mbʉ pora, mondʉp pʉtmʉn ei, Jisas koⱡpa, wote ⱡoporpa omba purum. Ei mel ku, tʉn akup mondʉp pʉtmʉn ei, Got kʉn mondʉk pilik korung wamp mbʉ, Jisas yant om ei kʉn, Got ndi, wamp mbʉ pʉi, tʉpa mundangga mepa omba.
IK PENG KɄⱠ
Rump
1:1 - Pol ndi, Tesalonaika wamp mon ti, kuimp tepa ropa ngurum ei
1:2-1:10 - Tesalonaika wamp kʉⱡ nga mondpa pili orunga ronduⱡ puⱡnga, molk kai nondrʉng
2:1-2:16 - Pol, Tesalonaika kon ila kongun itim mel
2:17-2:20 - Pol, Tesalonaika wamp kʉⱡ, aldpa mbo kʉnimp nimba pitim
3:1-3:5 - Timoti, Tesalonaika kona ila purum
3:6-3:13 - Timoti nombuⱡa rung ik kai mat, mon ropa mepa omba Pol nguⱡnga, Pol numan ngurum
4:1-4:12 - Got numan ngurum uⱡ mbʉ mel itʉi
4:13-4:18 - Nuim ei, yant omba
5:1-5:11 - Nuim ei, yant omba ei nga tʉk kʉn etʉk muⱡʉi
5:12-5:28 - Man ik kai mat
1
Pol Ndi, Tesalonaika Wamp Mon Ti Kuimp Tepa Ropa Ngurum Ei
1 Mon ei, na Pol, Sailas, Timoti kʉn, moⱡpʉn ropʉn enim. Got Tipam ei kʉn, Nuim Jisas Kraist raⱡ nga wamp mbʉ met Tesalonaika Got nga rapa tenda ila mormin wamp kʉⱡ kʉn rop ngonmʉn. Got nga wamp poⱡ ti uⱡ ei kʉn, wote moⱡpa kundi uⱡ ei, enim kʉn kan piyangga!
Tesalonaika Wamp Kʉⱡ Nga Mondpa Pili Orunga Ronduⱡ Puⱡnga, Molk Kai Mondrung.
2 Tʉn rʉk rʉk enim wamp mbʉ nga, Got kʉn angge nimbun, tʉn nga atinga rormʉn mbila, enim nga pendʉp mint rondurmʉn. 3 Omba, enim nga mondpa pili ei, ronduⱡ puⱡnga, numan uⱡ kun kai mbʉ etʉk, Kraist numan ngormʉn uⱡ ei ndi, kongun ronduⱡ etʉk, Jisas Kraist yant omba, ei nga ronduⱡ mundʉk, nokundʉk mormin uⱡ ei, tʉn Got Tipam ei kʉn, kundʉp nimin ei nga, enimp kuⱡi nakʉrmʉn.
4 Angmʉn, tʉn pʉnmin ei, Got ndi, enim numan ngumba, elim nga wamp mendpʉⱡ kʉⱡ nimba mbi ropa titim. 5 Tʉn ndi, enim Rʉnang Ik Kai ei, nimbun ngurmʉn ni, ik nʉmʉ ti mon! Ik ei nga ronduⱡ ei kʉn, Muⱡnga Wingti kʉn, rak ndupʉn ik nilmina, enim nga mundmong ila mondpa pili uⱡ ei, ronduⱡ purum. Tʉn unt enim kʉn pep murmʉn ei kʉn, tʉn nga puⱡ orunga, enim pilik mormin ei, enim nga nʉndpʉn itmin ni ka! 6 Enim tʉn nga uⱡ itmin mbʉ kʉn, wote Nuim ei nga uⱡ etʉm mbʉ pep rormin. Uⱡ ei ndi ku, enim mindil mam mbʉ nok, Muⱡnga Wingti nga numan kai pili uⱡ ei ndi, kongun ronduⱡ mundʉk etʉk ik ei pilik numan ngorung. 7 I etʉng uⱡ kai mbʉ, ya Masaroniya kʉn, Gris kona raⱡ ila, mondpa pili wamp mormin mbʉ, waka nduk etʉng. 8 Wote, Got nga ik ei, enim kʉn tepa, Masaroniya kʉn Gris kona raⱡ ila mendpʉⱡ pi nʉpʉrʉm, mon! Enim Got kʉn mondʉk pʉtmin uⱡ ei, kona mbila pora, kui ndip mel nomba puⱡnga, wamp ndi, pilik kapⱡa endʉtʉng. Ei kʉn, akup tʉn ndi, aldpa Tesalonaika mondpa pili wamp kʉⱡ kʉn, aldpa ik ti nimin mel mon. 9 Wamp mbʉ ndi ku, enim Tesalonaika wamp kʉⱡ nga ik mat nʉtʉng ei, tʉn enim kʉn ormʉn ei kʉn, tʉn rawe etʉk uⱡ kai mat etʉng. Wote, enim nga kur atinga rormin uⱡ mbʉ, wak rok, Got wu kupa ei nʉk pilik, kongun kindmant endʉtʉng. 10 Wote, elim nga Kangʉm wi muⱡ kona ila moⱡpa, yant omba ei nga nokundurmin ei, elim nga kangʉm Jisas, ya wamp kuⱡi uⱡ ila, ⱡoporpa tʉpa kont mundrum. Uⱡ ei ndi, tʉn etpa tʉtʉm. Wote, Got nga popʉⱡ akil tepa ekit omba ila, tʉn etpa tʉmba.