2 TIMOTI
KUIMP TEPA IK KɄⱠ
Ya Buk Ei Nga Puⱡ Ei:
Pol ndi, Timoti ik man ngumba nimba ronduⱡ mundrum.
Ya Buk Ei, Nam Ndi Rurum:
Ya buk ei, Pol ndi, mon rurum
Mon Ropa Nam Ngurum:
Pol ndi mon ei ropa, Timoti ngurum.
Ui Nant Ila Rurum:
Pol, Rom kona ila kan manga ila pepa, mon kʉⱡ rurum. Ei, Kraist metʉng ei nga mbuldung orunga pana 66 mba 67 ila mon kʉⱡ rurum. Ei kʉn, Pol kan manga ila wak roⱡnga, pana ti moⱡnga, wote aldpa, wu nuim mumuk Niro murum ui ila, Pol aldpa imp molk, wote rok kondrung.
Ik Ronduⱡ: 2 Timoti 2:15
Nim kongun ei teng ndukʉn itana, Got ndi, kʉnangga kapⱡa itangga. Pipil kuⱡi nalkʉn, Got nga ik kupa ei, petʉm mel, kun mbo indi!
IK PENG KɄⱠ
Rump
1:1-2 - Pol ndi, Timoti mon akil tepa ropa ngurum ei
1:3-18 - Timoti nga mondpa pili orunga nimba ronduⱡ mundrum
2:1-13 - Jisas nga el wu kupa
2:14-26 - Got nga kongun wu ei, Got ndi, kapⱡa nilinga morum
3:1-9 - Uⱡ kit mbʉ, ui pora nim ei kʉn, ekit omba
3:10-17 - Man ik ronduⱡ kʉⱡ
4:1-5 - Got nga ik ei, ronduⱡ mundkʉn nindi
4:6-8 - Na nga kongun ei, akup pora nimba enim
4:9-18 - Man ik koⱡmung mat
4:19-22 - Rawe ik kai mbʉ
1
Pol Ndi, Timoti Mon Akil Tepa Ropa Ngurum Ei
1-2 Ya mon kʉⱡ, na Pol Got ndi, pilinga mor ei. Kraist Jisas nga kitip kʉni wu ndi, ya Kraist Jisas kʉn rʉp ropʉn moⱡpʉn, uⱡ nga kʉnt nga kont mul uⱡ ei, wote Got kʉn timin ei nga, ik nangga nʉk, tʉk mundrʉng wu ei ndi, mon ei rop, Timoti na nga kangʉm kang tenda ei kʉn ngont. Got Tipam kʉn, wote tʉn nga Nuim Kraist Jisas raⱡ nga wamp poⱡ ti uⱡ ei kʉn, kont kuⱡi uⱡ ei kʉn, wote moⱡpa kundi uⱡ kʉⱡ, nim kʉn kan piyangga!
Timoti Nga Mondpa Pili Orunga Nimba Ronduⱡ Mundrum
Na nga anda kouwʉmʉn kʉⱡ, Got pep rorung ei mel ku, na pep ront. Na Got kʉn rumbuldi rʉnggilmʉ raⱡ, angge nimp atinga rop, nim pilip ku et. Na nim nga ka mong ni kʉⱡ, tʉpa pinditim ei kʉn, na nim omp kandʉp kʉn ambʉⱡʉp paⱡʉp moⱡamp ka ei nʉmp pʉt. Nim nga mondpa pili kun kai ei, na pilip mint mor. Mondpa pili ei, unt nim nga manʉm nga manʉm amp Lowis kʉn, wote nim nga manʉm amp Yunis kʉn, mondʉk pʉtʉnggil ni mel ku, akup na pʉnt ei, nim kʉn tetʉm ku. Uⱡ puⱡ ei nga, na nim kʉn ronduⱡ mundʉp nʉnt. Na ndi, nim ki oⱡa ndupa memp pendpa atinga roⱡʉmba, Got nga ronduⱡ ti tʉtʉn ni, akup ronduⱡ mundkʉn ʉmbʉⱡi! Got ndi, tʉl Muⱡnga Wingti ngurum ni, tʉl mel ti nga mundmong itimbil nimba ngui ngʉnggʉrʉm. Ei mon! Muⱡnga Wingti ei ndi, tʉl ronduⱡ ngumba, wamp numan ngui uⱡ ei ngumba, wote numan kai ei ngumba etʉm.
Nim Got nga Rʉnang Ik Kai nin ei nga, pipil kuⱡi nʉⱡi! Wote na ya, Got nga kongun ila nʉmp kan manga pit ei nga, pipil kuⱡi nʉⱡi mon ku. Ei mon! Nim Got ndi, ronduⱡ ngurum ni, tekʉn molkʉn, Got nga Rʉnang Ik Kai kʉⱡ nga, na mbun koma ronduⱡ mundʉp, koma ront. Ei mel, nim i ku etkʉn koma rui! Got ndi, tʉn etpa, peng kont tʉpa omba, tʉn elim nga wamp mbʉ nʉtʉm ei, tʉn nga uⱡ kai etmin nimbila mon. Got ndi, uⱡ etʉm ei, elim nga numan ila, wote elim nga wamp poⱡ ti uⱡ ila mint etʉm. Muⱡ mʉi raⱡ iti nʉti kʉn, Got nga wamp poⱡ ti uⱡ ei, Jisas Kraist kʉn to ropa, tʉn wamp mbʉ ngurum. 10 Wote, akup tʉn nga Etpa Ti Wu Kraist Jisas ei ndi, uⱡ mbʉ etpa tʉpa, pena ila pinditim kʉndʉrmʉn. Wamp kuⱡi peng ei nga ronduⱡ ei, ropa mana ndupa, wote Rʉnang Ik Kont mba mul uⱡ ei tʉpa, pena ila pendʉtʉm.
11 Got ndi, elim nga Rʉnang Ik Kai ei, na ik mbo wu moⱡʉp, wote elim nga nombuⱡa rung wu muⱡeimp nimba na kandpa titim. 12 Uⱡ puⱡ ila mint, na mindil ou ndupa nont. Wote, ei nga nʉmp, na wak rui nʉrimp. Ei nambuⱡ emel, na Got mondʉp pilip, tʉp ou ndup et wu ei ndi, Nuim yant omba Ui Ou ila, na etpa peng kont tʉmba. 13 Na ik kupa mat, nim mbo indʉt nimbʉ, ambulkʉn gi ndukʉn, pep rokʉn, mondpa pili uⱡ ei kʉn, wote wamp numan ngui uⱡ raⱡ, Kraist Jisas kʉn tekʉn muⱡi! 14 Uⱡ kai mat, Muⱡnga Wingti nga ronduⱡ ei ndi, tʉn ngurum ei, akup nim kʉn tetʉm nimbʉ, ambulkʉn gi ndui!
15 Nim pilik morʉn ei, ya Eisiya kona ila wamp nimbʉ, na wak rok porung. Wote, wu Pigelas kʉn Ermoginis raⱡ kunda, na wak rok purʉnggil. 16 Wu Nuim ei ndi, wu Onisiporas kʉn, elim nga wamp mbo tenda kʉⱡ, etpa numan wang ndangga. Ei nambuⱡ emel, na kan manga pit ei nga, pipil kuⱡi naⱡʉpa, na nga numan orunga etpa, ndoimp rundrum. 17 Wote, Rom kona ila urum ei kʉn, na andpa kurpa, wote kandpa titim. 18 Wu Nuim ei ndi, Nuim yant omba Ui Ou ila, wu Onisiporas kandpa kont kuⱡangga! Nim pilik morʉn ei, Episis kona ila, na wu ei ndi, minal tʉpa rapʉndrʉm.