JON
KUIMP TEPA IK KɄⱠ
Ya Buk Ei Nga Puⱡ Ei:
Got kangʉm Jisas ei kupa mana urum, ei mondpa pili wamp mbʉ oⱡnga kʉnt nga molk mint ping ei nga mon ndurum.
Ya Buk Ei Nam Ndi Rurum:
Jon ei kitip kʉni wu ei, wu Sepeti kangʉm ei, Jeims ʉngʉn.
Mon Ropa Nam Ngurum:
Mon ei ropa, Kraist kʉn mondpa pili wamp na, mondpa pili nʉpili wamp mat, mondpa uⱡ ei nga andʉk kurʉrʉng mbʉ kʉn, ropa ngurum.
Ui Nant Ila Rurum:
Ei Kraist metʉng ei kʉn, mbuldung pana 85 mba 90 AD ila mon kʉⱡ rurum.
Ik Ronduⱡ: Jon 20:30-31
Jisas ndi, elim nga kitip kʉni wu kʉⱡ mondpa, uⱡ wengʉndupa mat minal itim mbʉ, ya Buk ila, mon rok pindi napʉndʉtʉng. Wote, ya ik mbʉ rorung ei, Jisas ei, Got nga kangʉm, wote Got nga ngurum wu ei, mondʉk pileing! Wote enim ndi, elim nga mbi ila mondʉk piling ndam, enim uⱡ nga kʉnt nga kont mul uⱡ ei ting.
IK PENG KɄⱠ
Rump:
1. Wamp nu tindi wu, Jon ndi, ik mbʉ nimba mot ndurum
2. Jisas ni kongun puⱡ mondpa itim
3. Jisas kʉn Nikondimas raⱡ ik nʉtʉnggil
4. Jisas ni, Sameriya amp ti kʉn ik nitim
5. Jisas ndi, kui pitim wu ti etpa titim
6. Jisas ndi, wamp 5000 rʉng itim
7. Jisas kʉn elim nga ʉngʉn wu kʉⱡ kʉn
8. Amp ti wam mondpa kelpa mba wapra rurum
9. Jisas ndi wu mong titim ti etpa titim
10. Kng sipsip rʉp wu ti nga ik ek
11. Lasarus ni kurum
12. Amp ti ndi Jisas nga kʉmp ila kopung kʉndrʉm
13. Jisas ndi, kitip kʉni wu ni kʉⱡ nga kʉmp ⱡumʉi rundrum
14. Got kʉn mbin ei nga nombuⱡa mam ei Jisas
15. Jisas ei nde wain kupa morum
16. Muⱡnga Wingti nga kongun etʉm mel
17. Jisas ndi elim nga kitip kʉni wu kʉⱡ nga atinga rundrum
18. Jisas ni, tʉk imp morung
19. Jisas ni, nde Peta ila pendʉk rorung
20. Jisas ni ⱡoporpa omba purum
21. Kitip kʉni wu 7 morung ila Jisas mot nga urum
1
Jisas Ni, Got Nga Ik Ei
Unt kor nga Got ndi, muⱡ mʉi raⱡ mim iti nʉti kʉn, Ik ei titim. Ik ei, Got kʉn murum. Omba Ik ei, elim Got. Ama unt kor nga puⱡ mondpa, Ik ei, Got kʉn murum. Ik ila mendpʉⱡ, Got ndi, mel mbʉ pora itim. Mel mbʉ nga ti, nombuⱡa mam elpa tila, oⱡa ui nawʉrʉm, mon! Ik ei, el elim kont mba mul uⱡ ei nga Puⱡ Wu ei. Wote, kont mba mul uⱡ ei, tepa omba, tʉn wamp mbʉ rʉⱡang ngurum. Rʉⱡang ei ndi omba, rumbʉⱡ ila rʉⱡang ngurum. Wote, rumbʉⱡ ei nga ronduⱡ ei ndi, rʉⱡang ei, ropa mana ndui nandrʉm. 6-7 Got ndi, elim nga nombuⱡa rung wu ti, tʉpa mundrum. Wu ni nga mbi ei, Jon. Wu ni ndi, rʉⱡang ei nga pora ndupa nangga. Wamp mbʉ ndi, ik ei pilik mondʉk, pileing nimba, tʉpa mundrum. Jon elim ni, rʉⱡang ei mon. Wote elim ndi, rʉⱡang ei, mat ndumba nimba, mat ndumba ei nga urum. Rʉⱡang kupa ei, mʉi kona mana omba, wamp mbʉ pora, rʉⱡang ngurum. 10 Got nga ik ni, mʉi kona ila mana urum. Got elim moⱡpa, muⱡ mʉi mbʉ pora itim. Wote, wamp mbʉ ndi, elim kandʉk, mbi ndui nandrʉng. 11 Elim nga mʉi ila rukʉr urum. Wote, elim nga wamp nimbʉ ndi, elim rawe etʉk, ti natʉtʉng. 12 Wote, wamp mat ndi, elim rawe etʉk tʉk, elim mondʉk pilik etʉng nimbʉ, ronduⱡ nguⱡnga, Got nga kangambuⱡa rarʉng. 13 Got nga kangambuⱡa rarʉng mbʉ, wamp mema ei ndi, mon! Wamp nga numan ei ndi, mon ku! Wote, Got elim ndi itim. 14 Ik ei, wamp raⱡpa, tʉn kʉn omba pitim. Elim eng noⱡnga, kʉndʉrmʉn. Elim nga Tipam kʉn moⱡpa, mana urum kangʉm kang ei, eng nurum. Wamp poⱡ ti uⱡ ei kʉn, ik kupa ei kʉn, elim kʉn pitim.
15 Jon ndi, wu ei nga para ndupa, nimba mel, “Wu ei nga kundʉp nit ni, Wu Nuim akil tepa onum. Ei ndi, na tʉpa mana ndumba. Nambuⱡ emel, na muⱡi nʉmbʉr kʉn, elim ni, unt murum,” nitim. 16 Nambuⱡ emel, elim nga poⱡ ti uⱡ ei nga mur ila, tʉn memp titmin. Wote, pol ila aldpa, memp tʉpʉn ku etmin. 17 Nambuⱡ emel, Got nga mi ik kʉⱡ, Moses kʉn pilpʉn titmin. Wote, wamp poⱡ ti uⱡ ei kʉn, ik kupa ei kʉn, uⱡ raⱡ Jisas Kraist kʉn tʉtmʉn. 18 Wamp ti ndi, Got kʉni nakʉndrʉm. Elim nga kangʉm mendpʉⱡ ei ndi, Tipam kʉn nondpa moⱡpa, Tipam nga puⱡ ei nimba, mot ndurum.
Wamp Nu Tindi Wu, Jon Ndi Ik Mbʉ Nimba Mot Ndurum
19 Jerusalem, kona ila Jura wu morung nimbʉ ndi, wu Pris na, Lipai wu kat, tʉk mundʉⱡina ok, Jon waldʉk nʉk mel, “Nim wu nam?” nʉtʉng. 20 Jon elim ndi, nimba mot ndupa, “Na Kraist mon!” nitim. 21 Ama minal waldʉk nʉk mel, “Nim wu nam? Nim Ilaija muna? Nilingina, “Mon ku!” nitim. “Muna, nim painui wu ei?” Nʉk waldʉlingina, “Mon ku!” nitim. 22 “Wote nim wu nam? Tʉn kundkʉn ni! Wote, tʉn tʉk mundung wu mbʉ, int mbun kundpʉn nimin,” nʉtʉng. 23 Jon ndi, ik punt ropa nimba mel, “Painui wu Aisaiya nga ik ti, unt nimba pinditim. Ik ei ndi, ei mel nitim,
“Kona kui waka ila wamp ti, wi ronum ei, na Nuim ei, omba ei nga nombuⱡa mam ei, rok tʉk kun mundangina, wu Nuim ei wangga!” nitim.
24-25 Perisi wu nimbʉ, tʉk mundrʉng wu ni kʉⱡ ndi, Jon waldʉk nʉk mel, “Nim Kraist ei mon. Ilaija kep, mon ku. Painui wu ti kep, mon ku ndam, wote nambuⱡ emel, wamp nu tʉndʉn?” nʉtʉng. 26-27 Ei mel nilingina, Jon ndi, punt ropa nimba mel, “Na ndi, wamp mbʉ, nu ila mint nu tʉndʉnt. Wote, enim nga rʉk ting ila, wu kʉni nʉkʉni ti morum. Wu ei, na nga mbuldung orunga, akil tepa onum. Wu ei nga kʉmp rʉk kan ei, na ndi pilinga, nduimp mel kapⱡa mon!” nitim. 28 Uⱡ etʉng nimbʉ pora nilinga, Betani kona ila, ekit oⱡungina, nu Joran al orunga, Jon wamp nu tinditim kona nila itim.
Jisas Ni, Got Nga Kng Sipsip Waⱡ Mel
29 Wote, mʉkʉlmʉ orunga, Jisas ni, Jon murum nila, oⱡnga kandpa, nimba mel, “Got nga kng sipsip waⱡ, mʉi kona ila wamp mbʉ nga uⱡ kit mbʉ, pendpa kelmba ei nga onum kʉnʉi! 30 Enim wu ei nga kundʉp nit ni, wu akil tepa omba ei, wu oⱡa orunga mel ti, na kʉn kapⱡa mon. Nambuⱡ emel, na mi nʉmi kʉn, elim ni, kump kor nga murum. 31 Na ndi, elim pili nʉpʉt mon. Wote na ndi, Isrel wamp mbʉ, wu ei nga kandʉk, pilik poⱡ ndeing nʉmp kʉn omp, wamp nu tindint,” nitim. 32 Wote ni kʉn, Jon ndi, ekit ndupa nimba mel, “Muⱡnga Wingti ei, muⱡ ila, kʉi imil mel raⱡpa, mana omba, elim kʉn moⱡnga, kundung nitim. 33 Na elim pili nʉpʉt, mon ku. Wote Got ndi, na wamp nu tʉndeimp nimba, tʉpa mundrum ei ndi, na ndoimp rondpa, nimba mel, ‘Muⱡnga Wingti ei kinana, mana omba, wu ti kʉn moⱡum ndam, wu ei ndi wamp mbʉ, Muⱡnga Wingti kʉn pendpa, nu tʉndʉmba,’ nitim. 34 Nitim ei mel, na ndi, kʉndʉr ei mel, enim kundʉp namp, “Wu ni, Got nga kangʉm waⱡʉm ei,” nitim.
Jisas Ndi, Elim Nga Kitip Kʉni Wu Kuimp Tepa Rukʉr Titim Kʉⱡ
35-36 Ni kʉn, mʉkʉlmʉ orunga, Jon elim nga kitip kʉni wu raⱡ kʉn kunda moⱡʉngina, Jisas ni omba puⱡnga, Jon ndi kandpa, nimba mel, “Got nga Sipsip Waⱡ ei kʉnʉi!” nitim. 37 Kitip kʉni wu ni raⱡ, ik nitim ni pilkʉⱡ, Jisas purum ni mel, akil tekʉⱡ, pep rokʉⱡ purʉnggil. 38 Jisas ndi, tʉpa ropʉl ropa kundrum ni kʉn, wu ni raⱡ orʉnggil ila, waldpa nimba mel, “Namba mel ei, kurkʉⱡ onmbil?” nitim. Wote wu ni raⱡ ndi, punt rokʉⱡ nʉkʉⱡ mel, “Ik mbo wu ye! Nim kona nant ila pun?” nʉtʉnggil. 39 Wote Jisas ndi, nimba mel, “Okʉⱡ kunʉnggil wʉl!” nitim. Ant mong ni, tʉmbʉkak elinga, rʉp rok puk pitim kona ni, kandkʉⱡ elim kʉn rʉp rok, ant ei kʉn morung. 40-41 Jon ndi, ik nitim ni pilkʉⱡ, Jisas purum mel, akil tekʉⱡ purʉnggil. Wote, wu ni raⱡ nga ʉngʉn, Saimon Pita nga ʉngʉn wu Andru ni, ant tenda ila mba, ʉngʉn Saimon ni kandpa, tʉpa nimba mel, “Mesaiya, Kraist, nʉtmin wu ni raⱡ ndi, kandʉp tʉmbʉⱡ,” nitim. 42 Wote Andru ndi, Saimon tʉpa mepa, Jisas kʉn purum. Jisas ndi kandpa, nimba mel, “Nim Jon kangʉm wu Saimon. Nim mbi tep Sipas, nʉnt ropʉl ropʉn, Pita nimin.
Jisas Ndi, Pilip Kʉn Nataniyel Raⱡ Wi Ropa Rukʉr Titim
43 Wote mʉkʉlmʉ orunga, Jisas ni, Galili orunga purum. Wote, wu Pilip ni kandpa tʉpa nimba mel, “Na pep rokʉn ui!” nitim. 44 Pilip, Andru kʉn, Pita kʉⱡ nga mʉi mang kona ei nga, kona peng ei, Betseita. 45 Pilip ni mba, Nataniyel kurpa kandpa, tʉpa kundpa, nimba mel, “Moses ndi, wu ti nga nʉndpa mi ik ila, mon rurum. Wote, painui wu mbʉ ndi, rorung wu ni, tʉn ndi, kandʉp timʉn. Wu ni, Nasaret kona ila wu Jisas, Josep nga kangʉm”, nitim. 46 Wote Nataniyel ndi, waldpa nimba mel, “Nasaret kona ila, namba uⱡ kai ti ekit omba nda?” nitim. Nimba waldilinga, Pilip ndi nimba mel, “Okʉn kʉni!” nitim. 47 Jisas ndi, Nataniyel ni oⱡnga, kandpa nimba mel, “Wu ei, Isrel nga wu kupa ei. Ik kep nui uⱡ ti, wu ei kʉn pi napʉtʉm,” nitim. 48 Ei mel nilinga, Nataniyel ndi, Jisas waldpa nimba mel, “Nim na nga puⱡi etkʉn, pilkʉn nin mel nant?” nitim. Wote Jisas ndi, int ndupa, nimba mel, “Nim Pilip ndi, wi ropa ti nʉti kʉn, nde ui puⱡ ila moⱡina, kant ni ka!” nitim. 49 Nataniyel ndi, ik int ndupa, nimba mel, “Nim ik mbo wu ye! Nim Got nga kangʉm ei, Isrel wamp mbʉ nga Wu Nuim Mumuk ei!” nitim. 50 Jisas ndi, nimba mel, “Nim nde ʉi puⱡ ila, mʉn nʉnt ik kʉⱡ nga mendpʉⱡ, mondkʉn pilkʉn nʉn nda? Uⱡ ou mat, wote kʉnin an!” nitim. 51 Wote Jisas ndi, nimba mel, “Na ndi, ik kupa ei, enim kundʉp nʉnt. Muⱡ ei, kumba tʉpa tiyangga kʉn, Got nga anggelo mbʉ ndi, Muⱡʉl Wu Kupa ei kʉn, oⱡa mana etʉk endangina, kʉning!” nitim.