1 Ioane
Ioane Malele Epapua Kakaua Auga
1
Agu Pagai Maunina Iifaga
Ufainagai aagoa ufa fou akegama koa kai, aufalao agaꞌo agu pagai maunina iifaga epipeni auga eagu. Isa eake emai agofaꞌai aisama, lai iꞌina iifaga isa eegai aꞌo alogonia, ke ifomai maamaisai aisa. Ke ifomai imamaisai isafa isa aafi opogaina. Pau lai egaꞌina auga fouga aifafoua. Isa agu pagai maunina epipeni auga, Deo Ama auga fou keague. Isa lai eapakina penimai, ifomai maamaisai aisa. Ega puo lai isa kaisau auga koꞌa mo aifafoua. Ke pau auga isa lai agu pagai iifaga epeniimai auga aifafoua. Ke lai kapaꞌina aisa, ke aꞌo alogonia auga pau oi maamiai aifafoua. Ega koa oi isafa lai fou agaꞌomo famia aoma. Ke lai auga Amaꞌa Deo, ke Gauga Iesu Kristo fou agaꞌomo amia. Lau iꞌina kapaꞌi fouꞌi lapapuaꞌi oi eemiai laulaisa, ega koa lai kapaꞌina maamiai aifafouꞌi auꞌi agokapaꞌi aisama, alomai agegama alogaina, emai alogama agepagai.
Deo Ega Eaeai Fopea
Lai isa eegai iꞌina iifaga aꞌo alogonia, ke pau oi maamiai aifafoua. Egaꞌina iifaga auga, Deo eaea, ke kapa maꞌoai koꞌaꞌi mo iꞌa epakinaiꞌa. Ke Isa alogai umina agaꞌo laaꞌi. Ega puo iꞌa agaifa, iꞌa Deo fou agaꞌomo amia agaoma kai, uminagai mo agaagu laomai apalaꞌi agakapaꞌi paisa koa aisama, iꞌa pifoge auꞌa. Ke iꞌa Deo ega iifa koꞌaꞌi auꞌi kaiꞌiai alapea. Kai Deo eaea puo, iꞌa Deo ega iifa koꞌaꞌi auꞌi kaiꞌiai mo agapea, ke laomai feloꞌi mo agakapaꞌi aisama, iꞌa maꞌoai opoꞌa agaꞌomo, ke fou kaiꞌalao apea. Ke Deo Gauga Iesu iꞌa fauꞌaisai kolotiai ifa efaka auga, iꞌa aꞌa laomai apalaꞌi maꞌoai eikulaiꞌi.
Ke iꞌa agaifa, iꞌa aꞌa agu alogai laomai apalaꞌi agaꞌo alakapaꞌi agaoma aisama, ifoꞌa afogeiꞌa. Ke ega koa akapa aisama, Deo ega iifa koꞌaꞌi aloꞌaisai akeka. Ke iꞌa laomai apalaꞌi akapaiꞌi auꞌi Deo maagai agaifafouꞌi koa aisama, Deo iꞌa aꞌa apalaꞌi egaꞌina auꞌi ageꞌagegeainiꞌi, ke laomai apalaꞌi maꞌoai aloꞌaisai ageikulaiꞌi. Gome Deo auga kapaꞌina eifania agekapa eoma auga agekapa paisa, ke Isa auga afa felo mo epipeni. 10 Ke iꞌa agaifa laomai apalaꞌi alakapaiꞌi agaoma aisama, Deo eifa iꞌa laomai apalaꞌi akapaiꞌi eoma puo, iꞌa Deo pifoge auga apamia. Ega koa akapa aisama, iꞌa Deo ega iifa alaafia aloꞌaisai aeka.