SAMUEL
BUKA GINI—GUNANA
1
Elkana bona Hana
Efraim ororodia ai, hanua ta ladana na Ramataim-sofimi ai, tau tae nohova, ladana na Elkana. Ia tamana be Ierohama; Ierohama tamana na Elihu; Elihu tamana na Tohu; Tohu tamana na Sufu, Efraim iduhuna tauna ta. Elkana na e hodara: adavana ta ladana na Hana, ma ta ladana na Penina. Penina na mai natuna haida, a Hana na e gabani.
Ina tau na laḡani ta ta amo ena hanua e rakatania, Silo ela; unuseni ai ia ese Iehova Sabaota e toma henia diho, bona ena boubou ḡaudia e hahelaḡadia Iehova ena. Unuseni ai Eli natuna mamaruanedia raruosi, Hofni bona Fineha, na Iehova ena hahelaḡa taudia.
Ena boubou ḡaudia e hahelaḡadia dinana ai, Elkana ese adavana Penina bona ia natuna mamaruanedia bona hahinedia iboudiai na ahudia e henidia. A Hana be ahu tamona e henia; ena be e lalokau henia bada, to ahu tamona e henia, badina be Iehova ese gabana e ha-aukaia. Bena hari hahine ta ese e ha-uraia bona lalona e hahisia, Iehova ese gabana vada e ha-aukaia dainai. Laḡani iboudiai unu mo heto; Iehova ena dubu ela negadia ai, ia ese unu e ha-uraia tomava. Una dainai Hana e taitaiva, bonase anianiva. Bena adavana Elkana ese e nanadaia, eto, Hana e, dahaka dainai o taitaimu? Dahaka dainai so anianimu? Dahaka dainai lalomu e hisihisimu? Egu lalokau oiemu ai ese memero gwauta edia se hereaia a?
Hana ena ḡuriḡuri
Silo ai e aniani bona e inuinu murinai, Hana e tore isi. Una negana ai hahelaḡa tauna Eli na Iehova ena dubu iduarana badibadinai e helaiva. 10 Hana na lalona e hisihisi badava, bena Iehova e ḡuria mai taitaina ida. 11 Bona e gwau hamata, eto, Iehova Sabaota e, emu hesiai hahinena egu hisihisi boma itaia, boma lalogu tao, basioma lalogu boio, a natugu maruanena ta na emu hesiai hahinena boma henigu; bena lau ese Iehova ma bama henia lou, ena mauri dinadia iboudiai huina basinema utua.
12 Hahine na ma e ḡuriḡuri Iehova va vairanai; bena Eli ese uduna e itaia. 13 Hana na lalona ai mo e ḡuriḡuriva; bena bibinana e marere-marereva, to gadona na se hekamonaiva, taunabunai Eli banava eto hahine na vada e kekero. 14 Bena Eli ese e gwau henia, eto, Ba kekero ela bona edena negai? Vine ranuna na emu amo bavatoa siri. 15 A Hana ese e haere henia, eto, Ḡauka e, lasi. Lau na lalo-hisihisi hahinegu. Vine ranuna eiava kekeromuramurana ta asina inua, a lalogu anina na halasiamu Iehova vairanai. 16 Basio laloa emu hesiai hahinena na lebulebu hahinena; egu hereva iboudiai na lalogu ena hisihisi bona ena hekwarahi amo vada e vara. 17 Bena Eli ese e haere henia, eto, Mai mainomu ida aola; Israel Diravana ese o noilaia ḡauna na baine henimu. 18 Hahine ma eto, Emu hesiai hahinena ba hanamoa. Bena hahine na ena dala ela, e aniani, vairana danu se huaia lou.
Samuel e vara
19 Daba ai, idia na e tore isi haraḡa, Iehova vairanai e toma diho; bena edia ruma e lou henia, Rama ai. Bena Elkana na adavana Hana ida e eno bou, bona Iehova ese e laloa tao; 20 bena Hana e rogorogo, bena ena nega korikori ai e mara, mero ta e abia, ladana e hatoa Samuel;*“Samuel” anina be “Dirava ena amo e noia”. badina be ia eto, Lau ese Iehova ena amo na noia.
21 Hari Elkana mai ena ruma taudia iboudiai na ela, laḡani ta boubouna bae hahelaḡaia Iehova ena bona ena gwauhamata anina baine heni totodia. 22 A Hana na sela; ia ese adavana e hamaoroa, eto, Mero na rata baine topoa nege negana ai, lau ese baina laohaia, Iehova vairanai baine hedinarai, bona unuseni ai baine noho hanaihanai. 23 Adavana Elkana ese e haere henia, eto, Emu lalo-hadai heḡereḡerena ba karaia, a rata do baine topoanege guna. Ḡau tamona, Iehova ese ena hereva baine hamomokania. Taunabunai, hahine na e noho, natuna e ubua, ela bona rata e topoa nege.
24 Mero na rata e topoa nege murinai, sinana ese e laohaia; boromakau maruanena ta, laḡani toi ḡauna, bona flaoa efa“Efa” be Heberu taudia edia hahetoho ḡauna ta; anina be 18 litres sisivana. ta, bona vine ranuna kopi ta, danu e abi kau. E laohaia, ela bona Iehova ena dubu Silo ai e kau. Mero na do maraḡi. 25 Bena idia ese boromakau e alaia, bona mero na Eli dekena e hakaua lao. 26 Hahine na eto, Ḡauka e, oi o maurimu heḡereḡerena, ḡauka e, lau be gunaguna oi vairamu ai na gini bona Iehova na ḡuria hahinegu. 27 Ina mero dainai na ḡuriḡuri; bena Iehova ese na noia ḡauna e henigu. 28 Taunabunai, Iehova vada na henia; ena mauri dinadia iboudiai ia na Iehova ena. Bena idia ese Iehova e toma henia diho unuseni ai.

*1:20 “Samuel” anina be “Dirava ena amo e noia”.

1:24 “Efa” be Heberu taudia edia hahetoho ḡauna ta; anina be 18 litres sisivana.