1 Hua ihahituna dinana iharuahui-tana ai, Iehova ena hereva na peroveta tauna Hagai enai e kau, eto: 2 Serubabele Sealtiele, Iuda lohiana, bona Iosua Iehosadak, hahelaḡa tauna badana, bona taunimanima kwabukwabudia iboudiai ba hereva henidia, baoto, 3 Daika daika doini nonoho umui bogaragimui ai ese ina dubu na ena hairai gunana ai e itaia? Harihari be ede o itaia tomamu? Umui vairamui ai ina na dia ḡau ta ani? 4 Iehova na e tomu, Ḡau tamona, Serubabele e, harihari a boga auka! Hahelaḡa tauna badana, Iosua lehosadak e, a boga auka! Iehova Sabaota na e tomu, A gaukara, badina be lau na umui ida, 5 Aigupto amo o raka lasi negana ai na henimui gwauhamatana heḡereḡerena. Egu Lauma na bogaragimui ai e nohomu; basio gari. 6 Badina be Iehova Sabaota ini e gwau tomamu: Asi vanahana guba bona tanobada bona davara bona tano kaukauna baina haheude-heudedia lou; 7 bona bese iboudiai baina haheude-heudedia, bena bese iboudiai edia taḡa na bae siaidia mai, bena ina dubu na baina hahairaia ḡuḡuru. Iehova Sabaota na e herevamu. 8 Iehova Sabaota na e tomu, Silver na lauegu, bona gold na lauegu. 9 Iehova Sabaota na e tomu, Ina dubu hairaina gabena ese hailaina gunana baine hereaia, bena ina gabu ena noho-namo baina habadaia. Iehova Sabaota na e herevamu.

10 Darauese ena lohia laḡanina iharuana lalonai, hua ihataurahani-tana dinana iharuahui-hanina ai Iehova ena hereva na peroveta tauna Hagai enai e kau, eto, 11 Iehova Sabaota ini e gwau tomamu: Hahelaḡa taudia ba nanadaidia, bena bae hereva maoro. Baoto, 12 Tau ta ese vamu helaḡana na ena dabua gevena ai baine abia kau, bena ena dabua na ilaoa eiava vasiahu eiava vine ranuna eiava dehoro eiava aniani ḡauna ta enai baine kau, una ḡau baine helaḡa a? Hahelaḡa taudia eto, Lasi. 13 Hagai ma eto, Tau ta bema miro, tau-ani masena ta e daua toho dainai, bena una tau ese unu aniani ḡaudia ta bema daua toho; una ḡau baine miro a? Hahelaḡa taudia eto, Baine miro. 14 Bena Hagai eto, Iehova na e tomu: Ina bese bona ina basileia na unuheto lau vairagu ai; bona imadia ḡaukaradia iboudiai danu unuheto; bona unuseni ai e henimu herahiana na mai mirona. 15 Mani emui kara ba haeroa, hari ina dina amo bainela dahaka baine vara. Iehova ena dubu ai nadi ta na nadi ta latanai do se heato kau negana ai, 16 emui noho na edeheto? Ta ese irau ruahui isenudia e lao henia negana ai, gwauta hona mo mimia; ta ese vine ranuna e haboua gabuna ela, hodu imahui baine utu eto, a ruahui hona mimia. 17 Iehova na e tomu, Umui na rahumui mase, bona emui ḡaukara anidia na hogohogo bona valavala bona medu-hetarina amo na hadikadia, ḡau tamona umui na asio lou henigu. 18 Ina dina, hua ihataurahani-tana dinana iharuahui-hanina, amo bainela, do ba haeroa. Iehova ena dubu badidia nadidia na gabudia ai e atodia ema bona hari danu ba haeroa. 19 Uhe na roge ai doini mimia eiava? Vine bona suke bona rimono bona olive audia na do asi huahuadia a? Hari ina dina amo bainela, lau ese baina hanamomui.

20 Iehova ena hereva na nega iharuana Hagai enai ma e kau, hua dinana iharuahui-hanina ai, eto, 21 Serubabele, Iuda lohiana, ba hereva henia, baoto: Lau ese guba bona tanobada ba haheude-heudeamu, 22 bona basileia teronodia danu ba tahodia dobimu; bese idau-idau basileiadia edia goada ba ha-oreamu, bona kariota mai taudia ida ba hahebubudiamu; hosi bona hosi-gui taudia na bae mase, ta ta bamona bamona edia dare ai. 23 Iehova Sabaota na e tomu: Serubabele e, egu hesiai tauna, Sealtiele natuna, una dina ai lau ese baina abimu. Iehova na e tomu, Lau ese ima-kwakikwaki vagivagina, toa ḡauna, heḡereḡerena ai baina halaomu, badina be vada na abimu hidi. Iehova Sabaota unu e gwau tomamu.