1 Korin
Lovoang Avot At Ne Pol
Ti Limixin Nunu To Korin
Levelinga Loklox Axasep
Lamaares 57 A.D.
Ne Pol gak lok to Epesas la ni ga malagan na levelinga rinedi limixin nunu ro Korin. Korin neni lemenemen gak lok gomgo to lenep silok Grik. La keneng at nai lemenemen lentaba luvuttadi nedi leme Grik la lentaba nedi me Judaia. Mo luvuttadi digak lok go buaang atnedi digap novos aleng la diga ruuna buaang laxampanga solo la diga ruuna bok levenakleklen silok, ketla nedi diga lotu parap lempoovo vanga la levesumsuma xapmek bok at na lavatbung menemen ga umsu nga xeneng at levendoxoma atdi.
At lavatpas sepsev agepura at ne Pol, neni ga vaase asu avot mo Lagale Lavavang tinedi limixin to Korin. Neni ga anasa go at lamaares kudun la loxot atat. (Leven Gugu 18:1-17) Melemu at nai Apolos gat pas ugo la ga vavang. La ne Pol ga ronga levelinga mumu nedi limixin nunu boro Korin do goxo lok nunuan. La nedi bok limixin me Korin diga malagan aonon lovoang ti ne Pol la diga sue i mi lentaba lempanga bok. Kuren la ne Pol ga lox aonon na lovoang tinedi la ga malagan li levelinga lolos tidi mumu leveloklok kakapmek atdi, la ga vorang bok levesusue atdi.
Lengkot silok keneng at na lovoang
1:1-9 Lempapaase loklok momo at ne Pol tinedi.
1:10–4:21 Pol ga vaase sok di mila digat kis epeseves.
5:1–7:40 Lorooro at laradi nunu la lavaun epot.
8:1–11:1 Leventuptuvuk diba mu asu i.
11:2–14:40 Limixin nunu di lok ngan labantuxu at ne Iesu.
15:1-58 Laxakatu kaxat amlong at ne Iesu boro at lanmet.
16:1-4 Lempilas uto at limixin boro Jerusalem.
16:5-24 Pol ga lox axap levelinga ren.
1
Lavapaase Axasep
Nenia ne Pol. Nema mi ne Sositenes, neni neton dik at laasen at ne Karisito, ma vaase momo rinimi. Moroa ga ro ka ia kusu ana paase asu Lagale Lavavang at ne Iesu Karisito ngan lun pavang teren.
* 1 Ko 6:11; Gu 9:14A malagan i na lovoang tinemi limixin at ne Moroa dom Korin. Moroa ga lox anmanton luruptuvuk atnimi at lekngen ne Iesu Karisito xusu nemi limixin manmanton teren. Moroa ga ro xaka vam nimi do ateren. La nemi mit kis esogo amisik mi ne Iesu Karisito, kerekngan limixin to at lengkot axap di lotu parap Leeme Silok atdik ne Iesu Karisito, neni Leeme Silok atdi la Leeme Silok bok atdik.
* Ro 1:7Letaba nabalamu mi lenmila rinimi boro at ne Temen nedik la Leeme Silok ne Iesu Karisito.
Leveloklok Anarong Ne Moroa Ga Raba Nedik Min
Do nia a ngising, a tong loklox avukat amisik ti ne Moroa mumu nimi, mila ni ga raba nemi mi letaba nabalamu ren keneng at laasen at ne Iesu Karisito. La kantubu at nom mirapnovos pam at leveloklox anarong at ne Moroa, i ngan laramtaba ri tong asu levelinga at ne Moroa la lakleklen nunuan at levelinga at Lovoang Kaala. La kerepmo neni ga lox asuusu i rinimi do lavavang mumu ne Karisito maga tong asu i rinimi ga ruturun. * Lu 17:30; 2 Ts 1:7; Ta 2:13La livipisik teren keretna, ne Moroa ira raba vam nimi mi leveloklox anarong axap la mi noxot kis pakpakes bok ba se at nom laaleng Leeme Silok atdik ne Iesu Karisito naba vor asaxaven, i ngan tai mo mi nemen tangais i mi lomomo. * Pl 1:6; 1 Ts 3:13; 5:23Neni bok naba lox alolos lununu atnimi se at laaleng kavaxap la kerepmo at laaleng ete at Leeme Silok ne Iesu Karisito neni noxo ven terek kaka laxakapmek atnimi. * 1 Jo 1:3; 1 Ko 10:13; 1 Ts 5:24Moroa ga ro xaka vam nimi xusu minat kis esogo mi ne Iesu Karisito, Nitna ne Moroa, neni Leeme Silok atdik. Moroa neni naba ruturun ti limixin teren la naba lox asoorun levelinga neni ga tong li i.
Pol Ga Vaase Lolos Mumu Lixitkis Ekarakat
10  * Pl 2:2Luvutnetak mi luvurinuk. At laasen at Leeme Silok atdik ne Iesu Karisito, a sing nimi do nemi axap mina etaba belen, kusu lixitkis epeseves noxo nemen kantubu atnimi. Nemi axap mina ru buru mi legeso doxoma la mi lumulus at lebelen nimi. 11 Luvutnetak mi luvurinuk. Nia a tong i na rinimi mila lentaba di nemen at loogu at ne Koloii digara tong asu vam i ria do lekarakat mo i nemen kantubu atnimi. 12  * 1 Ko 3:4; Gu 18:24-28; Jo 1:42Lekarakat atnimi i lok keretna. Nemi getgesara mi epaase mi levempapaase xopmen nak mokso. Lentaba di lok, “Nema at ne Pol.” La lentaba di lok, “Nema at ne Apolos.” La lentaba di lok, “Nema at ne Pita.” La lentaba di lok do, “Nema at ne Iesu Karisito.” 13 Kereva, i lox avukat do limixin at ne Karisito dina epeseves? Kereva, nenia ne Pol aga uu nop loklok atnimi rovana at laxaba? Kereva, miga lok ka lesep susu at laasen at ne Pol? Kopmen tinotno.
14  * Gu 18:8; Ro 16:23Nia a tong loklox avukat ti ne Moroa do nenia xopmen a goxo sep susu buaang tentaba atnimi, kusuk mun ne Krispas la ne Gaius. 15 Kuren la kopmen tara i epovo na tong i do miga lok ka lesep susu at laasen tarak la kerepmo nemi at ne Pol. 16  * 1 Ko 16:15Aga sep susu bok ne Stepanas eburu minedi diga nemen at loogu ren, ketla axo xasep do aga sep susu bok tentaba vetpes. 17  * Mt 28:19; Jo 4:2Karisito goxo riki ia xusu ana sep susu limixin. Ni ga riki ia xusu ana tong asu Lagale Lavavang. La nenia xopmen goxo tong asu i mi lakleklen at limixin mun. Do kuren, a lok laniu at ne Karisito ngan lavanga gamasa la kopmen tololos teren.
Lolos Mi Lakleklen At Ne Moroa Ne Iesu Ga Lox Asuusu I
18  * 2 Ko 4:3; Ro 1:16Lagale Lavavang mumu laniu at ne Iesu rovana at laxaba i lok ngan lavanga gamasa rinedi dinaba seeve. Ketla tinedik, limixin atanaba roo su, Lagale Lavavang i lok ngan lolos at ne Moroa rinedik. 19 At Lovoang Kaala Moroa ga lok keretna,
“Anaba sele utut kepe levendoxoma atnedi limixin dokdoxoma, la ana sok tixirixes kepe lakleklen atnedi limixin akleklen.” Ais 29:14
20  * Ais 19:12; 33:18; 44:25; Jop 12:17La kereva ba levelinga at limixin dokdoxoma? La kereva ba levelinga at limixin akleklen? La kereva ba levelinga at limixin di etep mi levelinga at na lavatbung menemen? Moroa ira lox asuusu vam i do levelinga at na lavatbung menemen ni lavanga gamasa.
21  * Mt 11:25Moroa i ruuna lakleklen solo la ni ga lok pe limixin akleklen kusu kopmen di noxo epovo na vuse sa ren mi lakleklen atdi xa. Ketla ne Moroa ga lok losoxovo do ni naba lox arooro nedi dina nunu at Lagale Lavavang, keke i do limixin di tong i do Lagale Lavavang ni lavanga gamasa. 22  * Mt 12:38; Gu 17:28,32Limixin me Judaia di vara tempanga sangsangu ri lox amuat Lagale Lavavang. La limixin me Grik di vara mene levendoxoma nunuan. 23  * Ro 9:32; 1 Ko 2:14Ketla nema ma vavang mene mi laniu at ne Karisito ga uu rovana at laxaba. I lolos aleng do leme Judaia dina nunu do Lanarong ga uu xerepmo, kuren la di noxo nunu at ne Karisito. La mo laniu i ngan lavanga rangtangku ri limixin me Grik. 24  * Kl 2:3Ketla ne Moroa ga soxolik ka lentaba atnedi leme Judaia la leme Grik. Ma vavang mi laasen at ne Karisito, neni i lox asuusu lolos la lakleklen at ne Moroa rinedi. 25  * 2 Ko 13:4Lagale Lavavang mumu laniu at ne Iesu, nedi di tong i do lavanga gamasa. Ketla ni i volo aleng lakleklen at limixin. La nedi di tong box i do laniu at ne Karisito i lox asuusu i do ne Moroa neni ixo ruuna tololos, ketla lolos teren i volo lolos atnedi.
26  * Mt 11:25; Jo 7:48; Je 2:1-5Luvutnetak mi luvurinuk. Mina doma bilong ti lorooro atnimi ap mo laaleng ne Moroa ga ro xaka nimi. Kopmen goxo buaang atnimi digakleklen solo at lemeren limixin la kopmen goxo buaang bok atnimi diga ruuna levenasen silok la kopmen goxo buaang bok atnimi diga lox avukat at lemeren limixin. 27 Ketla ne Moroa ga soxolik ka nedi limixin kopmen takleklen atdi xusu ti lox asi limixin akleklen at na lavatbung menemen. La ne Moroa ga soxolik ka vam nedi xopmen tevenasen silok kusu ti lox asi limixin silok at na lavatbung menemen. 28 Moroa ga soxolik ka nedi, limixin diga ven asi ridi ngan levempanga gamasa la diga lox abulubun kepe di. Ne Moroa ga lox i nom kusu na lox alixilik mo lempanga i silok at lodoxoma at limixin, 29  * Ro 3:27; Ep 2:9la kusu tara noxo xip aurut laasen teren to melamgo at ne Moroa. 30  * Jer 23:5-6; Jo 17:19; 2 Ko 5:21Ketla ne Moroa gara ro ka vam nimi ri lixitkis ekilen eburu mi ne Iesu Karisito. La ne Moroa ga soxolik ka vam ne Karisito ngan laxasep tidik. Keneng mun at ne Iesu Karisito, ne Moroa ga vaxaxis buru dik min, la ga lok dik ngan limixin melemelengan teren, la gara lox asepmus nedik basinge laxakapmek atdik. 31  * 2 Ko 10:17Kuren la i ngan Lovoang Kaala i tong i do,
“Do tara i vara na xip aurut laasen at tara, neni na xiv aurut laasen at Leeme Silok.” Jer 9:24

*1:2: 1 Ko 6:11; Gu 9:14

*1:3: Ro 1:7

*1:7: Lu 17:30; 2 Ts 1:7; Ta 2:13

*1:8: Pl 1:6; 1 Ts 3:13; 5:23

*1:9: 1 Jo 1:3; 1 Ko 10:13; 1 Ts 5:24

*1:10: Pl 2:2

*1:12: 1 Ko 3:4; Gu 18:24-28; Jo 1:42

*1:14: Gu 18:8; Ro 16:23

*1:16: 1 Ko 16:15

*1:17: Mt 28:19; Jo 4:2

*1:18: 2 Ko 4:3; Ro 1:16

*1:20: Ais 19:12; 33:18; 44:25; Jop 12:17

*1:21: Mt 11:25

*1:22: Mt 12:38; Gu 17:28,32

*1:23: Ro 9:32; 1 Ko 2:14

*1:24: Kl 2:3

*1:25: 2 Ko 13:4

*1:26: Mt 11:25; Jo 7:48; Je 2:1-5

*1:29: Ro 3:27; Ep 2:9

*1:30: Jer 23:5-6; Jo 17:19; 2 Ko 5:21

*1:31: 2 Ko 10:17