1 Tesalonia
Lovoang Avot At Ne Pol
Ti Limixin Nunu To Tesalonia
Ti Limixin Nunu To Tesalonia
Levelinga Loklox Axasep
Lamaares 52 A.D.
Ise ne Pol gak lok to Korin neni ga malagan i na lovoang avot tinedi limixin nunu to Tesalonia. Tesalonia neni langsangan lemenemen silok at lenep Masadonia. At lavatpas sepsev agepura at ne Pol neni ga vavang tinedi limixin mi Lagale Lavavang mo go Tesalonia, la ni lavavang avot teren ti mo lemenemen. Keneng mun at nai lavavang teren la lentaba luvuttadi diga ravasu ngan luvuttadi nunu (Leven Gugu 17:1-14). Lentaba atdi na luvuttadi nunu nedi me Judaia, ketla buaang atnedi na luvuttadi diga nunu, nedi kopmen di me Judaia. La tinedi na luvuttadi me Judaia, lentaba atdi diga nunu la diga on basinge lotu at leme Judaia. Kuren la luvuttadi amgomgo at limixin me Judaia diga reven peves atdi la diga xala aonon ne Pol eburu mi larapentangas teren, la digat pas uto Beria. Melemu at nai ne Pol ga riki aonon ne Timoti la ni gat pas uto Tesalonia. Se neni gamlong, neni ga tong asu levelinga avukat mumu nedi.
Lengkot silok keneng at na lovoang
1:1 Lavapaase momo at ne Pol.
1:2-10 Pol ga tong aorong ti ne Moroa.
2:1–3:13 Levelinga mumu lorooro at ne Pol kantubu atnedi.
4:1-12 Leventaangas ua i lox avukat ti limixin nunu.
4:13–5:11 Levenanasa mumu lomlong sepsev agepura at ne Iesu.
5:12-28 Lempapaase loklox alolos.
1
Lavapaase Axasep
1 * Gu 17:1-10; 2 Ts 1:1Nenia ne Pol. Nema mi ne Sailas la ne Timoti, ma malagan na lovoang tinemi limixin nunu dom Tesalonia. Nemi limixin at ne Moroa, ne Temen dik la Leeme Silok, ne Iesu Karisito.
Letaba nabalamu la lenmila rinemi boro at ne Moroa.
Lorooro La Lununu At Limixin Boro Tesalonia
2 * Pl 1:3-4; Kl 1:3; 2 Ts 1:11Ma tong avukat amisik ti ne Moroa mila nemi mi tu atmatkun at lununu atnimi. La ma ngising amisik tinemi at levesingising atnama. 3 * 1 Ko 13:13; Kl 1:4-6Mam doma su amisik atnimi at lemeren ne Moroa mumu leven gugu nunuan miga lox i, mila mi nunu at ne Iesu Karisito, la mi balamu box i. La mi tu atmatkun mila mim doma voovo ri lovotpot at Leeme Silok, ne Iesu Karisito.
4 Luvutnetak mi luvurinuk. Moroa i balamu nimi la ma ven kibis i do gano neni ga soxolik ka nimi xusu mina nunu ren. 5 * 1 Ko 2:4-5; 4:20Maklen i na mila ap mo levenaleng nema maga tong asu Lagale Lavavang tinimi, goxopmen levelinga mene nga. Ketla levelinga ga lolos la maga lok bok levempanga sangsangu mi lolos at Loroonan Kaala. La miga ven i do nema maga nunu ruturun at Lagale Lavavang. La luruptuvuk atnama ga lox avukat kusu mana lok tooro nimi. 6 * 1 Ko 4:16; 2 Ts 3:9; Gu 17:5-9Miga siam kaka Lagale Lavavang mi lomomo. La limixin diga lox asongot nimi, ketla nemi move miga umsu mi lomomo, mo Loroonan Kaala ga raba nimi min. La kerepmo miga mumu asu loklok at Leeme Silok la atnema bok.
7 * 1 Pi 5:3La limixin nunu boro at lunep silok Masadonia la Grik diga ronga levelinga ap mo loklok atnimi, la diga mumu asu i. 8 * Ro 1:8Buaang limixin ap mo lunep silok la ap mo levennep petpes bok diga ronga i do miga nunu at levelinga at Leeme Silok. Kuren la nema ma noxo tong asu bok ba mo levelinga do nemi miga siam kaka vam Lagale Lavavang. 9 * Gu 14:15Nedi xa diga tong i rinama do miga siam abeles kaka nama mi lomomo, la miga lok kepe laxampoovo moroa la miga lok kaka lununu maxat saparap ne Moroa, neni ne Moroa ruturun la Luntoo Avolo. 10 * Ta 2:13; Gu 17:31; 1 Ts 5:9La di tong box i do nemi mit kis tangais ne Nitna, mo naba vot boro vana at laxalibet. Moroa ga lox arooro amlong ne Iesu basinge lanmet, la ni ik lox arooro bok dik kusu ta noxo ekip tangarang mi lebelemamao ren, mo naba rupot.