2 Tesalonia
Lovoang Sepsev Agepura At Ne Pol
Ti Limixin Nunu To Tesalonia
Levelinga Loklox Axasep
Lamaares 53 A.D.
Pol move gak lok to Korin la ni ga malagan i na lovoang sepsev agepura uto rinedi luvuttadi nunu to Tesalonia. Pol gara ronga xora vam i do lentaba luvuttadi boro mo Tesalonia mo di goxo nunu at lomlong sepsev agepura at ne Iesu. Diga doxoma ekarakat i do ne Iesu mo garamlong pam, kuren la digaptuvuk gamasa la di goxo lok tepempanga. Keneng at nai lovoang ne Pol ga anasa di do laradi sosolo arup naba vot la na bala arup buaang limixin ti laxakapmek. La melemu ba Laradi Manmanton ne Iesu Karisito nabamlong kusu limixin kakapmek dinaba lok ka luunun kapmek tidi. Pol ga vaase lolos bok tidi la ga vara i xusu dina lox ekun lorooro atdi, kusu dina lox asuusu teven gugu nunuan.
Lengkot silok keneng at na lovoang
1:1-2 Lavapaase momo at ne Pol.
1:3-12 Pol ga tong aorong ti ne Moroa ti lurutu lolos atdi.
2:1-17 Levenanasa mumu laradi sosolo arup la lomlong at ne Iesu.
3:1-15 Lempapaase loklox alolos mumu leven gugu nunuan.
3:16-18 Pol ga vaase abeese.
1
Lavapaase Axasep
* 1 Ts 1:1Nenia ne Pol. Nema mi ne Sailas la ne Timoti, ma malagan na lovoang tinemi limixin nunu dom Tesalonia. Nemi limixin at ne Moroa ne Temen dik la Leeme Silok, ne Iesu Karisito.
* Ro 1:7Letaba nabalamu la lenmila boro at ne Moroa ne Temen dik la Leeme Silok, ne Iesu Karisito na nemen eburu minemi.
Laaleng Ete La Lovotpot At Ne Iesu
* 1 Ts 1:2-3; 2 Ts 2:13Luvutnetak mi luvurinuk. I lox avukat do nema ma tong avukat amisik ti ne Moroa mumu nimi. I lox avukat mila lununu atnimi ira suusu silok la labalamu ela xantubu atnimi ira sisilok bok. * 2 Ko 7:4; 1 Ts 2:19; Li 1:9Kuren la nema ma xip aurut nimi ri limixin at lotu at ne Moroa, mila nemi mi tu atmatkun at lununu atnimi kantubu at levesongsongot mi levenmumuat, mo mip kiv i.
* Pl 1:28Lununu atnimi i tu atmatkun, la na i lox asuusu i do lodoxoma at ne Moroa ik mokso aleng la at laaleng ete neni naba ila mumu loklok atnimi la minaba epovo xusu mina vubeles uto xeneng at Linintoo ren. Ni lavasuun at levesongsongot atnimi. * Ro 12:19; Li 18:6-7Moroa in manton tino la neni naba vorang levesongsongot atnedi dim taba nimi min. * Mt 25:31; 1 Ts 3:13; 4:16La neni naba lok kepe levesongsongot basinge nimi la atnema bok ap mo laaleng Leeme Silok, ne Iesu naba si ukopok boro vana at laxalibet. Neni naba vot eburu mi lubungangelo lolos teren la lisisixam silok, naba soosoo ngan laxao bokbolot.
* Sam 79:6; Ais 66:15; Ro 2:8; 1 Pi 4:17La ne Moroa naba lox asongot nedi, dixokleklen i la nedi bok kopmen dinang tonga res at Lagale Lavavang at Leeme Silok atdik ne Iesu. * Ais 2:10,19,21La Leeme Silok naba sev asongot di mi langsangan leeteke mo naba nemen amisik. Dinaba nemen amisik to vetpes basinge lemeren Leeme Silok la di noxo suma lolos nunuan at ne Moroa. 10  * Kl 3:4; 1 Ts 3:13Dinaba lok ka na lumumuat ap mo laaleng ne Iesu naba si ukopok. La limixin axap teren dinaba emi asu min la dinaba raba i mi lasinorong. La nemi bok minaba emi asu min, mila miga siam kaka Lagale Lavavang maga tong asu i rinimi.
11  * Kl 1:9; 1 Ts 1:2-3Kuren la ma ngising amisik ne Moroa do neni na lox epovo nimi ri mo lorooro melemu, mo ne Moroa atdik ga ro ka nimi rin. La neni na lok tooro nimi mi lolos teren kusu mina epovo do minaba lok leven gugu nunuan kerekngan limixin nunu di vara na lox i. 12  * Ais 24:15; Mal 1:11La kerepmo limixin dinaba ven leven gugu nunuan atnimi la dinaba emi asu mi ne Iesu Karisito la dinaba emi asu bok minimi. Naba ravasu xuren mila ne Moroa atdik mi Leeme Silok ne Iesu Karisito du lox asuusu letaba nabalamu rinimi.

*1:1: 1 Ts 1:1

*1:2: Ro 1:7

*1:3: 1 Ts 1:2-3; 2 Ts 2:13

*1:4: 2 Ko 7:4; 1 Ts 2:19; Li 1:9

*1:5: Pl 1:28

*1:6: Ro 12:19; Li 18:6-7

*1:7: Mt 25:31; 1 Ts 3:13; 4:16

*1:8: Sam 79:6; Ais 66:15; Ro 2:8; 1 Pi 4:17

*1:9: Ais 2:10,19,21

*1:10: Kl 3:4; 1 Ts 3:13

*1:11: Kl 1:9; 1 Ts 1:2-3

*1:12: Ais 24:15; Mal 1:11