Kolosi
Lovoang At Ne Pol
Ti Limixin Nunu To Kolosi
Levelinga Loklox Axasep
Lamaares 62 A.D.
Pol gak lok at loogu xokoxo to Rom, la neni ga malagan i na lovoang la ga raba ne Tikikas mi ne Onesimas min la duga lok ka i la duga raba limixin at lotu min to Kolosi. Lavasuun at na lovoang i lok keretna. Ne Pol gak lok at loogu xokoxo mumu Lagale Lavavang la ne Epapras gat pas parav i la ga tong i rin do lentaba luvuttadi mo diga tong levelinga xaxarang at lotu tinedi limixin nunu to Kolosi. Mo levelinga xaxarang atdi ga lok keretna. Lentaba lubungangelo mo nedik ata lotu parap di. Lara ne Iesu mo ik lok petpes, la neni xopmen na lok ngan ne Moroa, ketla i lok ngan lubungangelo. Pol ga ronga i na la neni ga malagan i na la ga lox aonon i xusu ti lox asuusu laxaxarang ap mo leveloklox ase xaxarang.
Lengkot silok keneng at na lovoang
1:1-2 Lavapaase momo at ne Pol.
1:2-14 Pol ga emi asu aleng mi limixin boro Kolosi.
1:15-23 Lempapaase mumu lisisilok at ne Iesu Karisito.
1:24–2:5 Lempapaase mumu leven gugu at ne Pol.
2:6–3:4 Limixin me Kolosi dina sok tixirixes levenanasa xaxarang.
3:5–4:1 Leventaangas nunuan ti limixin nunu.
4:2-18 Lempapaase loklox alolos mi lavapaase abeese ren.
1
Lavapaase Axasep
* Ep 1:1Nenia ne Pol, lun pavang at ne Iesu Karisito, Moroa ga soxolik ka ia xuren, la ne Timoti bok, neton dik.
* Ro 1:7Nema ma malagan na lovoang tinemi limixin nunu dom Kolosi. Nemi limixin at ne Moroa la mi nunu ruturun at ne Karisito.
Letaba nabalamu la lenmila tinemi boro at ne Moroa ne Temen dik.
Lisingising Ti Tong Loklox Avukat
* Ep 1:15,16At levesingising atnama ma tong loklox avukat amisik ti ne Moroa, ne Temen Leeme Silok atdik ne Iesu Karisito. Mila maga ronga i do lununu atnimi saparap ne Iesu Karisito i tu tuxuruxun, la lorooro atnimi i umsu mi labalamu saparap limixin nunu. * Ep 1:13,15-16; 1 Pi 1:4; Ro 1:13; 1 Ti 3:16; Kl 4:12; Pm 1:23Na lununu la labalamu atnimi i nemen lolos at lorooro atnimi, mila mi ngangais mi lomomo ri mo leveloklox anarong i nemen tangais nimi ro vana at laxalibet. Mo leveloklox anarong miga ronga vam i ap mo levenaleng diga vavang mi levelinga ruturun tinimi, mo levelinga ni Lagale Lavavang.
Na Lagale Lavavang i ruuna laxampipisik solo la i sat kaka limixin at na lavatbung menemen axap kusu dina nunu at ne Iesu Karisito la dina lok leveloklok i nunuan. La kerepmo bok Lagale Lavavang i pisik kantubu atnimi, ga ruka i ap mo laaleng miga ronga i la miga ven kibis letaba nabalamu at ne Moroa, mo letaba nabalamu i ruturun tinotno.
Epapras ga anasa nimi mi nom letaba nabalamu. Neni lagale laradi i gugu eburu minema la ni laradi ruturun i lok lugugu at ne Karisito ti lok tooro nimi. Neni ga tong i rinama do lorooro atnimi i umsu mi labalamu, Loroonan Kaala ga suxa aumsu nimi min.
* Ep 1:9,16,17; Pl 1:9Maga ronga i nom, kuren la kopmen mana xap mi lisingising tinimi. Ma sing ne Moroa, kusu na suxa aumsu nimi mi lakleklen at lavavara ren, la kerepmo minaba ruuna ka lodoxoma avukat keneng at lorooro atnimi. Mo lodoxoma i ravasu boro at Loroonan Kaala. 10  * Pl 1:27; Ep 2:10Ma lok levesingising kerepmo kusu lorooro atnimi na epovo mi lavavara at Leeme Silok la kusu mina lok lempanga naba lox amomo i. Nom lempanga i lok keretna, lorooro atnimi naba pisik asu leveloklok nunuan solo, la nemi minaba lok kaka lakleklen at ne Moroa.
11  * Ep 1:19; 3:16La minaba ruuna ka bok lolos, mo i laa boro vana at lolos silok at ne Moroa kusu mina tu tuxuruxun at lununu atnimi la mi noxo subu kot kantubu. Minaba umsu mi lomomo, 12  * Ep 1:11,18la minaba tong loklox avukat ti ne Temen dik, ni ga lok nimi xusu mina epovo rinotno ri ruuna ka loxot atnimi ap mo luunun ni ga lox agagas li vam i ri limixin teren to xeneng at Linintoo i umsu mi laxasep. 13  * Lu 22:53; Ep 2:2Neni naba raba nimi mi nom, mila ni ga lox aroo su dik basinge lamain lolos at ne Satan, la neni ga lox arooro dik kusu tana vubeles at Linintoo at ne Nitna, mo ne Moroa i balamu i. 14  * Ep 1:6,7Keneng at ne Iesu, Moroa ga un ka amlong dik, la ni ga doxoma xepe bok leveloklok kakapmek atdik.
Iesu Neni Lamgomgo
15  * 2 Ko 4:4; Jo 1:18Karisito neni lampoovo at ne Moroa nedik kopmen tana reven tu ren. Neni lanat meren avot, la i silok tinedi levempanga ne Moroa ga rudum li di. 16  * Jo 1:3,10Moroa ga rudum li levempanga xeneng at lolos at lekngen ne Nitna. Levempanga axap to vana at laxalibet la de xopok at lavatbung menemen, lempanga dik ta reven di la lempanga dik dixo epovo ta reven di. Ni ga rudum li bok leventoonan eburu mi lubungangelo, la luvuttadi amgomgo atdi la limixin lolos kerepmo dik lok to vana. Moroa ga rudum li nom lempanga axap keneng at lolos at lekngen ne Nitna kusu dina lox aurut laasen at ne Nitna. 17  * Jo 1:1; 8:58Karisito ga rooro avot ti nom lempanga axap, la neni lusu auru atdi.
18  * Ep 1:22-23; Gu 26:23; Li 1:5Neni Lamgomgo at lotu ren kerekngan lavatlak at laradi, ni Lamgomgo at labantuxu ren. Neni lavasuun at lorooro maxat, la neni lara avot ga roo xat amlong basinge lanmet. Ni ga lox i xuren kusu neni xusuk naba ruuna ka lixitkis silok ti levempanga axap. 19  * Jo 1:16; Kl 2:9At lodoxoma axa at ne Moroa do ne Nitna, naba venaxa ka ren. 20  * Ep 1:10; 2:16; Ro 5:1; Ep 1:7; 2:13; 1 Jo 2:2La at lodoxoma bok at ne Moroa do, ne Nitna naba lok lumulum kantubu at ne Moroa la limixin axap, nedi limixin mede xopok at na lavatbung menemen la nedi limixin to vana at laxalibet. Karisito ga lok lumulum mi lada ren, mo ga sen su ro vana at laxaba.
21  * Ro 5:10; Ep 2:12; 4:18Gano migomgo miga nemen paxalom basinge ne Moroa, leveloklok atnimi la lodoxoma atnimi ga lok kapmek la kerepmo migak lok ngan limixin munepen min. 22  * Ep 2:14-16; 5:27Ketla monga, Moroa ga lok lumulum eburu minimi mumu mun lanmet at labantuxu at lamdak teren, kusu lorooro atnimi nan manton tino ap mo laaleng minaba tu saxaven to melamgo ren. La taxakapmek noxok lok bok ba atnimi la tara noxo lok li bok ba nimi at lavapaase mumu loklok kakapmek. 23  * Ep 3:17; Ib 3:14; Mk 16:15; 1 Ti 3:16Naba lok kuren mo do mina tu tuxuruxun at lununu atnimi la kopmen tara naba sat kaka nimi basinge lununu atnimi saparap Lagale Lavavang. At nom mun Lagale Lavavang la nia ne Pol a tong asu i ngan lasaxaruki at ne Moroa. La na Lagale Lavavang mo di vavang min ti limixin axap at na lavatbung menemen, ni levelinga nemi miga ronga i.
Lugugu At Ne Pol Keneng At Lotu
24  * Ep 3:13La nanga nia a lok momo mumu levesongsongot tarak nia ap kiv i ti lok tooro nimi. La kerepmo a lox epovo levesongsongot no ne Moroa ga lok katling i ria kusu na lok tooro limixin at lotu min, mo i lok ngan labantuxu at ne Karisito. 25  * Ep 3:2,7-8La aga lok ka na lugugu ngan lasaxaruki ti limixin at lotu. La ne Moroa axa ga soxolik ka ia rin kusu ana paase asu levelinga at ne Moroa rinimi, la a noxo ke xepe toxot teren. 26  * Ro 16:25-26; Ep 3:3-5,9-10Moroa ga lox alipe mo levelinga basinge lavaola axap diga nemen gano, ketla melemu ga lox asuvos i ri limixin teren. 27  * Ep 1:18; 1 Ti 1:1Moroa ga soxovo li i do na lox asuvos Lagale Lavavang ti limixin teren. Mo levelinga i lok ngan lapnovos silok la i lox asuusu lisisixam at ne Moroa. Mo levelinga i lok keretna, Karisito nabat kis esogo eburu mi limixin kopmen di me Judaia la nedi bok dinaba ruuna ka loxot at lasinorong teren.
28  * Ep 4:13Nema ma vavang mi ne Karisito ri limixin. Ma vaase aronga di la ma anasa di mi lakleklen at ne Moroa kusu nedi axap dinaba ruuna ka luruptuvuk manmanton kerekngan ne Karisito la kopmen taxakapmek atdi. La dinaba nemen kuren se ap mo laaleng dinaba tu ro melamgo at ne Moroa. 29  * Ep 3:7,20; Pl 4:13Ti lox empana na lugugu, nenia a gugu lolos, mi nom lolos ne Karisito i vetaba min tia la i gugu keneng tarak.

*1:1: Ep 1:1

*1:2: Ro 1:7

*1:3: Ep 1:15,16

*1:5: Ep 1:13,15-16; 1 Pi 1:4; Ro 1:13; 1 Ti 3:16; Kl 4:12; Pm 1:23

*1:9: Ep 1:9,16,17; Pl 1:9

*1:10: Pl 1:27; Ep 2:10

*1:11: Ep 1:19; 3:16

*1:12: Ep 1:11,18

*1:13: Lu 22:53; Ep 2:2

*1:14: Ep 1:6,7

*1:15: 2 Ko 4:4; Jo 1:18

*1:16: Jo 1:3,10

*1:17: Jo 1:1; 8:58

*1:18: Ep 1:22-23; Gu 26:23; Li 1:5

*1:19: Jo 1:16; Kl 2:9

*1:20: Ep 1:10; 2:16; Ro 5:1; Ep 1:7; 2:13; 1 Jo 2:2

*1:21: Ro 5:10; Ep 2:12; 4:18

*1:22: Ep 2:14-16; 5:27

*1:23: Ep 3:17; Ib 3:14; Mk 16:15; 1 Ti 3:16

*1:24: Ep 3:13

*1:25: Ep 3:2,7-8

*1:26: Ro 16:25-26; Ep 3:3-5,9-10

*1:27: Ep 1:18; 1 Ti 1:1

*1:28: Ep 4:13

*1:29: Ep 3:7,20; Pl 4:13