Sam
Levempixan at ne Devit
Levelinga Loklox Axasep
Na lubuk Sam i umsu mi levempixan ne Devit la lentaba luvuttadi vetpes diga malagan i. Buaang limixin di tong i do na lubuk, ni lubuk at ne Devit. Ketla neni goxo malagan na levempixan axap. Luvuttadi vetpes bok diga malagan lentaba levempixan. Nedi ne Kora, Asap, Moses, Solomon, Etan, la lentaba vetpes ua nedik kopmen atanaklen levenasen atdi. Lentaba at na levempixan ik lok ti lok tooro limixin, i ngan nedi di meres, nedi di umsu mi lainbulu, nedi ua laxapmek ik lok keneng at lorooro atdi, nedi di marat at limixin munepen midi. Lentaba levempixan ik lok ti anasa limixin mi levelinga mumu ne Moroa la lodoxoma ren. Lentaba bok mo ik lok kusu ti emi asu min. Na lubuk i anasa limixin mi legepu lempapaase. Lara avot i lok keretna. Limixin dina nunu saga at ne Moroa. La lara sepsev agepura i lok keretna. Moroa i balamu aleng limixin teren. Na lubuk Sam ik lox asuusu langsangan loklok tooro tinedi dina utus i. Dinaba lok kaka lomomo i silok aleng do dina utus i at levenaleng axap.
Lengkot silok keneng at na lubuk
1–41 Levempixan mumu loklok at limixin la mumu bok luruntudum li at lempanga axap.
42–72 Levempixan mumu lubung mixin me Israel la ne Moroa ga lox sepsu di basinge limixin munepen midi.
73–89 Levempixan mumu lotu saparap ne Moroa la mumu bok loogu laplavang.
90–106 Levempixan mumu lavatpas at limixin at na lavatbung menemen.
107–150 Levempixan mumu leemi asu ri ne Moroa la mumu bok levelinga ren.
1
Lomomo Ruturun
Lomomo rinedi di raba rulu levelinga loklok tooro at limixin kapmek la dixo mumu asu lampoovo at limixin di lok laxakapmek, kopla dinak lok esogo minedi di paase aksaksa ri ne Moroa. Ketla, di suma ka lomomo atla di mumu asu Laulis Linga at Leeme Silok, la dim doma mumu amisix i at levenaleng kangking la at levenaleng kanimin bok. Di lok ngan larauna di suusu ro at lisigege dan, la di pisix akmokso levempeven at levengaaling pipisik at laxampeeve, la levenang atdi kopmen nak mada si, la na mamang. Mo limixin di ngasang kobot at levempanga axap di lox i.
Ketla limixin kapmek dixok lok kuren. Di lok ngan mun levempusuvus at levenbeo, lamanman it mas kepe i. At laaleng ne Moroa na viila mumu loklok at limixin axap, ni naba lok li lumumuat mavana at limixin kapmek, la naba solasu xepe di basinge limixin akmokso ren. Limixin manmanton dit pas keneng at loklok tatao at Leeme Silok, ne Moroa, ketla nedi di mumu asu langas kapmek, dinaba seeve.