Tesalonaika wali Leta Houwan
Pol wana Leleli
Baaba Houwan
Tesalonaika iya polobins Masidoniya ana taun bwabwatana. Pol wana nopain labuina gamwanaa i na Tesalonaika ge gamagalau enuna hi abulilek (Tuwalali 17:1-4). Yaa Yudiya enuna Pol hi hugaan, yaka panuwa gamwana hi paawaawauli (Tuwalali 17:5-9). Inoke toekelesiya Pol hi palou i na panuwa Beliya, ge abwe i na panuwa Adenis. Sauga Pol iyoho Adenis i nuwanuwatu Tesalonaika kaiweliya inoke Timoti i patuna elal (3:1-2 ge 5). Abwe Pol i nok i na panuwa Kolinita ge Timoti i sikala Tesalonaika i na Pol i pwawaa to Kolinita elana (3:6; Tuwalali 18:5).
Sauga Pol Tesalonaika wasaliya i hagowa Timoti elana, inoke leta ya i ginol ge i patuna elal. Toabulilek Tesalonaika heliya palopalomwan hi pwawa wali abulilek kaiwena, inoke Pol nuwana ni ba pagasisi-agil (3:3-5), ge ni ba hikagil yawaliliya ana pagan kaiwena (4:1-12). Tesalonaika enuna nuwaliya i gewagewa bolo iyaka hi yaomal kaiweliya. Hi ba “Sauga Yeisu ni sikalim, wana sikalim ana waisi nihi pwawa o ebo nigeya.” Inoke wali nuwa gewagewa o Pol i pasapu (4:13-18), ge i ba pagasisel nihi lovivina-agil Yeisu wana sikalim kaiwena (5:1-11).
1
1 Nau Pol alowau Sailasa ge Timoti leta ya ha leli ge ha patuna i nowa ekelesiya Tesalonaika eliyamiu, komiu ku minaa Yehoba Tamala ge Babala Yeisu Keliso eliyalil.
Ha awanun Yehoba ni muloluagimiu ge wana nuwa laumwal atemiu ni pakalaopop.
Pol I Yaliyaya Tesalonaika wali Abulilek kaiwena
2 Sauga ebo ha awanun kaiwemiu, sauga gegewena ha ba mulolu Yehoba eliyana komiu gegewemiu kaiwemiu. 3 Ha ba mulolu wala Yabowaine ge Tamala eliyana puna te sauga gegewena ha nuwahikan ginol waiwaisal ku ginolil kaiwena ku abulilek, ku tuwalali gagasisi kaiwena alomiyau ku nunuwana-agil, ge ku palahikan kaiwena alona wami atimatuwa ku matamatan wala Babala Yeisu Keliso ni sikalim.
4 Talimeyau ge numeyau, ha atena te Yehoba i nunuwana-agimiu ge i hilemiu komiu iya wana gamagalau. 5 Ha atena to kaiwena wasa waiwaisana toto valila ha pwataniwa nige baaba awawana i oola, yaa wana gasisi i gan ge Yayaluwa Bwabwalena i tuwalaliya eliyamiu, inoke abwe ku atena bubun te age i tunahot. Ama ha atena kaiwemiu i ola to, ge i ola al komiu ku atena sauga valila ha miminaa gamwamiwa, wama pagan ga i ola ge ha labemiu. 6 Inoke bwagana hi papalomwan-agimiu nabiyan, he alona yaliyaya toto i neem Yayaluwa Bwabwalena elana Yehoba wana baaba ku ahe i minaa eliyamiu, inoke wami pagan i ola ama wama pagan ge Babala wana pagan. 7 Inoke komiu ku ola abagagayawa toabulilek gegewel elal bolo hi miminaa labi Masidoniya ge Akaiya elal. 8 He Babala wasana toto ku palelu nige tage i nok i na ana siga ya te Masidoniya ge Akaiya elal, yaa wami abulilek Yehoba elana wasana iyaka i lelu i na labi gegewena elal. Inoke nige bosowaina ama naha baaba kaiwena, kaiwena gamagalau iyaka hi hago. 9 Gamagalau hi wasaan te sauga ha nowa alona wami yaliyaya ku atupahema, inoke gogoginol ali en ku pek ge ku awona pil ku kululu Yabowaine tutunahotina ge yawalina gaganina elana. Hi wasaan te ku tabwa Yehoba wana totuwalali, 10 ge ku matamatan Natuna toto i palutem yaomala ni sikalem labulabumwa. He iya Yeisu, iya i pwamwalila ge Yehoba wana huga toto i nenem nige ta pwapwawa.