Yeisu Wasana Waiwaisana
Mak
wana Leleli
Baaba Houwan
Mak, alana al hi ba Diyon Mak, iya Banabas nubaina (Kolose 4:10) ge wasana i gan Bateli Vavaluna elana alona Pol ge Banabas tuwalali enuna hi ginolil (Tuwalali 12:25; 13:5 ge 13; 15:36-39; 2 Timoti 4:11). Ekelesiya gamwanaa toleleli houhouwel enuna hi ba tage abwe Diyon Mak i na Loma ge alona Pita hi minamina. (1 Pita 5:13 al nu kite.) Ge hi ba Mak Yeisu wana ginol ge wana papaatena wasana i aheya Pita elana yaka buki ya i leli. Inoke ana awa i ola Mak Yeisu wasana i leli Loma gamagaliliyau kaiweliya.
Saugena o Loma wali abalogugui i bwata ge heliya nuwaliya gasisi. Mak wana buki elana i pamasal Yeisu iya togasisi: ginol yawiyawi i ginolil, gamagalau i pwamolol, yayaluwa bibikel i patuna owaowa-agil ge gamagalau i sokalil wali gegi elana.
1
Diyon Tobabitaiso I Papaatena Uleya
(Mataiyo 3:1-12; Luke 3:1-18; Diyon 1:19-20)
Yeisu Keliso Yehoba Natuna, wasana waiwaisana ana abatelipuna i ola to palopita Aiseya i lelelian, Yehoba i ba:
No elopapatuna na patuna houwa awomwa,
iya wam kamwasa ni lovivina-an kaiwem.
Gamagal etega to i yogayoga uleya labi
kekevana elana, i ba,
“Babala wana kamwasa ku lovivina-an
wana kela ku pasapu.”
Inoke Diyon i nem uleya gamagalau i papababitaisol ge i papaatena i ba, “Wami pagan nanakina ana en nuku pek ge nuku babitaiso, inoke Yehoba wami gegi ni nuwayoho.” Gamagalau hi nem elana, hi neem Yudiya labena gegewena ge Yelusalema. Wali gegi hi wasaan inoke i pababitaisol wewel Yolidani elana.
Diyon ana kaliko heiya kaliko toto kamel pupunona elana hi ginoliya, ge henuwanina ana wasikewa bulumakau kunisina elana hi ginoliya. Aana heiya te sagagai* Ta ba “sagagai” o ebo ta ba “koninib”. ge luvi toto uleya. I papaatena i ba ola hiwe, “Toto i nenem ewa, iya alana i bwaya, nau alau nige i bwabwaya. Nau nige no waisi i gagan tage bosowaiu na lokululu ge aena ana os ana hihiu na leke. Nau ya pababitaisomiu wewel elana, yaa iya abwe ni pababitaisomiu Yayaluwa Bwabwalena elana.”
Yeisu ana Babitaiso ge Seitani I Palawakik Uleya
(Mataiyo 3:13–4:11; Luke 3:21-22; 4:1-13)
Sauga o elana Yeisu i neem Nasaleta, labi Galili, inoke Diyon Yeisu i pababitaiso wewel Yolidani elana. 10 Yeisu i gaihem wewela, inoke sauga o i kite labulabum i mwapwela ge Yayaluwa Bwabwalena i kite i ola bunibuni i laulau elana. 11 Yaka anan etega i loem labulabumwa i ba, “Owa natu nunuwanina hot; ya yaliyaya nabiyan kaiwem.”
12 Sauga o elana Yayaluwa Bwabwalena Yeisu i patuna i na uleya. 13 Lan poti i miminaa uleya alonau ge bwasumu bekikil, inoke Seitani Yeisu i papalawakik. Abwe aneloseyau hi nem ge Yeisu ana labe hi pek.
Tologi Esopali Yeisu I Yogaagil
(Mataiyo 4:12-22; Luke 4:14-15; 5:1-11)
14 Kin Helodi Diyon i teli dela, enaa inoke Yeisu i na Galili ge Yehoba wasana waiwaisana i papaatena-an, 15 i ba, “Sauga iyaka i vin, Yehoba wana abalogugui ana sauga iyaka i kelaubwa. Wami gegi ana en nuku pek ge wasa waiwaisana nuku abulilek-an.”
16 Yeisu i nawanawa Hoga Galili bebenaa, inoke tologi labui i kitel, Saimon alona ge talina Andulu, wali vineya hi ahe ge hi logilogi hogaa. 17 Yeisu i baek elal i ba, “Ku nem ku toulilau, inoke na paatenamiu komiu nuku tabwa gamagalau ali tologi.” 18 Etimwawa wali vineya hi eguluwan ge Yeisu hi toulil.
19 I nawanawa kekeisi al, inoke Yemesa, Sebedi natuna, alona ge talina Diyon i kitel wagaa, wali vineya hi lovilovivina. 20 Nige i matamatan inoke i yogaagil, yaka tamaliya Sebedi alonau ge wana totuwalali hi eguluwagiliya wagaa ge Yeisu hi toulil.
Yeisu Yayaluwa Bibikena I Patuna Owaowani
(Luke 4:31-37)
21 Hi na Kapeniyama, inoke lan Sabwata elana Yeisu i na limi tapwalolowa ge i panpankiti. 22 Gamagalau nuwaliya hi ahe wana panpankiti kaiwena. Nige i panpankiti i oola Logugui ana topankite, i ba bubun ya alona ge wana gasisi.
23 Sauga o elana tau etega iyoho to yayaluwa bibikena i holaviya elana. Inoke yayaluwa bibikena tau i pabaaba, ge i yoga i ba, 24 “Yeisu gagama Nasaleta, ga i ola ge u nem eliyama? Age nuwam nu apapanak-agima? Ya atenawa ya, owa Yehoba wana Gamagal Bwabwalena!”
25 Yeisu i ba lalaan i ba, “U mikekei! U tagil elana!” 26 Yayaluwa bibikena wana gasisi kaiwena tau tuwana i ginu nabi, inoke yayaluwa bibikena i loi ge i tagil, tau o i eguluwai.
27 Gamagalau nuwaliya hi ahe inoke hi nelnel avaliyau elal hi ba, “Hauna kaba panpankiti e? I vavaluna ge wana gasisi i gan! Tau ya, bwagana i baaba yayaluwa bibikel elal, anana hi hago.” 28 Inoke Yeisu wasana etimwawa i lelu Galili ana labi gegewena elana.
Yeisu Gamagalau Hi Gewi I Pwamolol
(Mataiyo 8:14-17; Luke 4:38-41)
29 Sauga limi tapwalolo hi eguluwai, inoke avaliyau Yemesa ge Diyon hi na Saimon ge talina Andulu wali limiya. 30 Saimon yawana nevenak i kasiyebwa, tuwana i waiwai, iyoho i kenu wana abakenuwa, inoke Yeisu wana wasa hi pek. 31 Inoke i na elana, nimanaa i aheya ge i kukupalut. Yaka tuwana waiwaina i mowasi, inoke aanan i ginol i pek Yeisu ge alonau elal.
32 Kokoyavi o, sabwelu i lobek enaa, inoke gamagalau tokasiyebwa gegewel ge bolo yayaluwa bibikel hi ulutuk elal, hi ahel ge hi pwatanik Yeisu elana. 33 Panuwa ana tomina gegewel hi nogogo hi na limi o ana bakubaku hi pakalaopop, 34 inoke bolo ali kasiyebwa tomaha ge tomaha, Yeisu i pwamolol. I ola al yayaluwa bibikel hi gewi i patuna owaowa-agil, yaa nige i tatalam yayaluwa bibikel nihi baaba, kaiwena hi atena te henala iya.
Yeisu I Papaatena Galili Awanina Gegewena elal
(Luke 4:42-44)
35 Mweluluga kekeisi hot, nigeya ga i mwamwananal, Yeisu i lut, limi i eguluwai ge i na labi etega toto nige gamagalau hi miminaa, inoke i awanun Tamana elana. 36 Saimon ge alonau hi na hi loyaan, 37 ge sauga hi pwawa hi baek elana hi ba, “Gamagalau gegewel hi loyaagiwa.”
38 Yeisu analiya i lahe i ba, “Ta nok ta na labena etega al, awan bolo gegelilaa ona, inoke na papaatena al elal. Heiya te kaiwena ge ya nem.” 39 Yaka Galili labena gegewena i nawaan, i papaatena wali limi tapwalolowa ge yayaluwa bibikel i takel tagilagil gamagalau elal.
Yeisu Tolepelo Etega I Pwamolu
(Mataiyo 8:1-4; Luke 5:12-16)
40 Tolepelo etega i nem Yeisu elana i loepwakoku ge i awanun gagasisi elana i ba, “Ebo nuwam, i bosowaina nu abubunau.”
41 Yeisu alona ge wana atilomwan, nimana i paelu tau o i pihikan inoke i ba, “E, nuwau. Tuwam ni waisi!” 42 Sauga o elana, ana lepelo i mowasi ge tuwana i waisi.
43 Yaka Yeisu tau o i ba pagasisi ge i patuna i egon i ba, 44 “Bahi gamagal etega wana wasa nu pepek. U nok u na ga topowon elana ge tuwam ni hile. Bwasumu ni powonan Yehoba elana am abwabubun kaiwena, ni ola Mosese wana Logugui, inoke gamagalau nihi atena tunahot tuwam iyaka i waisi.” 45 Yaa nige i giginol ola Yeisu wana baaba, i egon ge i telipuna i lowasawasa-an labena gegewena. Bugul o kaiwena inoke nige bosowaina Yeisu ni nomasamasal panuwa etega gamwanaa, eba boda nihi gewi hot, yaa i miminek ya labi bolo nige gamagalau hi miminaa. Yaa bwagana i ola o, gamagalau hi nemnem elana, hi noem labena gegewena.

*1:6: Ta ba “sagagai” o ebo ta ba “koninib”.