MATYU
Temani Kaiéle MATYU-ni Turum Bukele
TEMANI KAIÉLE
Matyu, Mak, LLuk, Jon Kene, Enini Turing Bukma
Buk Akumanga Ung-Pulu Mare
Yesos-nga temanelendu “temani kaiéle” nilimulaliinga ung-pulele Mak 1:1 molemú. Yi angere-ni Yesos mana-mania omba molupa kene tepa andupa mulurum mele temanele bukna turing. ‘Mak-ni buk te ui turum. Matyu LLuk-seleni penga buk-sele turingli. Jon-ni aima penga buk te turum.’ niku piliilimili. Mak-ni turum bukele gar-sipa mele, Matyu LLuk-seleni turingli buk-sele sulu mele. Buk yupuku kanumanga temanima kene ungma kene molemú mele tilu-sipa. Akiliinga-pe Jon-ni numanale-ni piliipaliinga bukna turum mele lupa. Yunu-ni turum bukna temani molemále sika Yesos-nga temaneleko akiliinga-pe yi yupuku-ni temani pulele turingima yunu-ni naa topa, Yesos-ni nirim ung pulele Jon yunu-ni mindi turum, yi yupuku-ni naa turing. Yi angere akuma-ni bukma walu-siku naa turing. Enini lupa-lupa ‘Yesos mulurum mele kene ung-mani sipa ung-bo tunjurum ungma kene yambuma-ni piliiku kene numanale-ni apuruku piliiku teangi.’ niku temanima piliiku apuruku bukna turing.
Matyu kene Jon-sele mindi Yesos lumbili anduli yisele molkulu Yesos pulu monjupa yunga kongunale andupa tirim kene wasie anduring, yunu-ni tirim mele sumbi siku kanukulu, nirim ungma sumbi sikulu piliiringli. ‘Buk Mak yi Mak-ni sika buk turum lem Yesos lumbili andurum yi Pita-ni temani topa sirim-ma piliipaliinga bukna turum.’ niku piliilimili. Yambu mare-ni piliiku kene ‘Matyu LLuk-seleni Mak-ni ui turum bukele kanukulu kene mare manda lekulu turinglinje.’ niku piliilimili. LLuk yunu piliipa kungnjuli pili yi-doktale molupa kene, Yesos molupa andupa tirim mele yunu andupa walsipa piliipa, temani pulele mimi-sipa piliipa bukna turum (Kollosi 4:14, LLuk 1:1-4).
Yesos yunu sika Pulu Yili-nga kandi Málale akiliinga-pe yunu mana-yi molumbandu miring yambumanga anda-kolepalima Matyu LLuk-seleni temani bukna tokulu (Matyu 1:1-17, LLuk 3:23-37); yunu miring mele temanele yi kanusele-ni mindi turingliko.
Ung te kamu piliani: Yi tale mola yupuku-ni temani tiluele turing kene kanuku kene, akuma pali mimi-siku kanuku kene laye lupa-lupa turing mele kanui.
Ya ung-pulele pora nikem.
MATYU
Temani Kaiéle MATYU-ni Turum Bukele
Buk Ilinga Ung-Pulu Mare
Ung-pulu mare ilinga buk-gomú 1 molemú.
Bi Matyu-nga ung-pulele “Auliele-ni we sirimele”. Yunu Rom-gapman ku-moni-takis liinjili yili mulupili Yesos-ni yunundu “Na lumbili ui.” nirim. Yunga bi te LLipai (Mak 2:14,15, LLuk 5:27-29). Yunu-ni buk Matyu sika turum nimba para silimú ung te bukeliinga sukundu naa nimba molemú. Akiliinga-pe kórunga-ui piliipa kungnjuli pirim yambu mare-ni piliiku kene ‘Matyu-ni sika buk ili turum.’ niku piliiringeliinga ekupu kepe aku-sipu nimbu piliilimulu.
Matyu-ni Yesos-nga temanele bukna tombandu ‘Pulu Yili-ni yunga yambumandu “Walse enini nokupa konjumba yi-nuim te enini mulungína liipu mundumbu.” nimba, ui nimba panjipa makó turum yili, akili eninga ungna “Kraisele” niring, Yesos yunu yi kanili omba mulurum mele Isrel-yambuma-ni aima piliiku kene “Yunu sika yi Krais akili.” niku tondulu munduku piliangi.’ nimba, Yesos-nga temanele tombandu yi-nuim Krais kanili penga omba molupa temba mele ui Yesos mana-mania omba naa mulupili ui niku siring mele Yesos-ni omba molupa tirim temanima wale pulele topa sirim. Penga wendu ombá mele ui niku siku bukna turing ung mare Matyu-ni mindi nimba sirim (Matyu 1:22-23, 2:15,17-18,23, 4:14-16, 8:17, 12:17-21, 13:35, 27:9-10). “Yi nuim king Depit-ni kalupa liirim yili” wale pulele bukna turumko, akiliinga pulele tilu-sipa. Pulu Yili yi nuim kingele molumbáliinga ung pulele bukna turumko.
Yesos-ni ung-mani sirim pulele bukna turum (Matyu kolomong-auli 5-7 pali, 10 pali, 13 pali, 18 pali, 24-25 pali).
Ung-pulu mare buk ambulkunaliinga alsena i-sipa mele molemú kanui: “23. Krais”, “32.1. Pikinini Bilong Devit”, “32.2. Pikinini Bilong God”, “32.3. Pikinini Bilong Man”, “20. kingdom”.
Ya ung-pulele pora nikem.
1:1—4:16 Yesos Mana Molumba Urum Mele Temanele
1
1:1-17 Yesos Krais Kalku Liiring Yambumanga Bimanga Temanele
1 ⸤Isrel-yambumanga ui-pulu-pulu anda-kolepa⸥ Eprayam kene penga yandupa ⸤eninga yi nuim king auli⸥ Depit kene elsele-ni Yesos Krais kalku liiringli mele i-sipa:
2 Eprayam-ni Aisak mirim;
Aisak-ni Jekop mirim;
Jekop-ni Juda kene Juda-nga anginipilima kene mirim;
3 Juda-ni Péres kene Sera kene mirim, yi kanuselenga anum Tema;
Péres-ni Esron mirim;
Esron-ni Ram mirim;
4 Ram-ni Aminadap mirim;
Aminadap-ni Nason mirim;
Nason-ni Sallimon mirim;
5 Sallimon-ni Boas mirim, Boas yunga anum Reap;
Boas-ni Opet mirim, Opet yunga anum Rut;
Opet-ni Jesi mirim;
6 Jesi-ni Yi Nuim King Depit mirim.
Depit-ni Sollomon mirim. Sollomon-nga anum ui Yuraya-nga ambu-mínele mulurum. Penga Depit-ni ambu kanili numanu monjupa Yuraya topa konjupa ambale yunu liirim.
7 Sollomon-ni Riapoam mirim;
Riapoam-ni Apaya mirim;
Apaya-ni Eta mirim;
8 Eta-ni Josipat mirim;
Josipat-ni Joram mirim;
Joram-ni Asaya mirim;
9 Asaya-ni Jotam mirim;
Jotam-ni Eyas mirim;
Eyas-ni Esikaya mirim;
10 Esikaya-ni Manasa mirim;
Manasa-ni Emos mirim;
Emos-ni Josaya mirim;
11 Josaya-ni Jekonaya kene yunga anginipilima kene mirim.
Josaya kulupili yunga malupili molangi ele-tu yambuma Isrel-yambuma-kene oku ele teku kene toku munduku, Isrel-yambu pulele ka siku eninga kolea-auli Bapillon meku puring.
12 Ka siku meku puring kene penga
Jekonaya-ni Sialtel mirim;
Sialtel-ni Serapapel mirim;
13 Serapapel-ni Apayat mirim;
Apayat-ni Ellayakim mirim;
Ellayakim-ni Eso mirim;
14 Eso-ni Sedok mirim;
Sedok-ni Ekim mirim;
Ekim-ni Ellayat mirim;
15 Ellayat-ni Elliesa mirim;
Elliesa-ni Matan mirim;
Matan-ni Jekop mirim;
16 Jekop-ni Josep mirim.
Josep Maria yi-min. Josep-ni Maria ui naa liipili Maria yunu kangambula oluna monjupa mulurum. Penga ambu-yisele muluringli kene Maria-ni Yesos mirim.
⸤Pulu Yili-ni “Enini nokupa konjumba yi-nuim te liipu mundumbu.” ui nimba makó turum yili penga Yesos yi akili omba mulurumeliinga⸥ yunga bi te wasie siku kene ‘Kraisele’ niringko.
17 Eprayam kene Eprayam-ni yandupa-yandupa kalupa liipa Depit kalupa liipa tirim yima ⸤Yesos-nga⸥ anda-kolepa malapunga tale muluring. Penga Depit-ni yandupa-yandupa ui Bapillon yambuma-ni Juda-yambu mare ka siku kolea Bapillon anju naa meku pangi kalupa liirim anda-kolepa malapunga tale-ko muluring. Juda-yambu mare ka siku kolea Bapillon meku puring kene penga yandupa-yandupa yi-nuim Kraisele kalku liiring kene yi malapunga tale-ko muluring.
1:18-25 Pulu Yili-nga Minéle-ni Maria-nga Oluna Kang Te Munjunjurum, Maria-ni Yesos Krais Mirim Temanele
18 Yesos, Pulu Yili-ni “Enini nokupa konjumba yi te liipu mundumbu.” ui nimba makó turum yi-nuim Kraisele, yunu miring temanele i-sipa mele:
Yunga anum Maria-nga pulu lirim yambuma-ni “Maria Josep-ni liipili.” niku kórunga niringeliinga-pe ui Josep wasie tiluna naa piangli Mini Kake Tiliele-ni Maria yunga oluna kangambula te munjunjurumele Maria yunu piliirim. 19 Kanu-kene yunga yi Josep yunu yi sumbi-niliele mulurumeliinga Maria kangambula munjurumele piliipa kene ‘Maria pipili naa kulupili.’ nimba ‘Yambu pulele molangi yunu tímu mele nimbu para naa sipu yu-yunu molumba kene kiyang nimbu we “Kamu pui.” niambu.’ nimba piliirim.
20 Josep aku-sipa numanu liipa mundupa mulupili Auliele-nga angkella te-ni Josep uru-kumbu sipa kene nimba mele: “Josep, yi nuim king Depit-ni kalupa liirim yili, Mini Kake Tiliele-ni Maria ulu te tirimeliinga yu kangambula monjulemú akiliinga nu-ni yu liinindu pipili naa kolkunu, lii.” ⸤nirim.⸥ 21 “Yu kang te membá. Kang kanili-ni yunga yambuma ‘Eninga numanuna ulu-pulu-kis telemelema pípili molemeláliinga mindili nungí.’ nimba enini tepa liipa, mindili nolkemela kupulanum-na wendu liipa, yunu-kene wasie molku kunjingí kupulanum-na liipa monjumbaliinga yunga bi lekunu “Yesos” niani.” nirim.
22 Aku-sipa wendu urum ulumanga pali kórunga-ui Pulu Yili-ni “Ninjui!” nimba ung nimba sirimuma piliipa yambuma nimba sirim yi te-ni ulu mare penga wendu ombá ui nirim mele kamu wendu urum. Akili i-sipa mele:
23 “Piliai.
Ambu-wenipu te-ni kangambula monjupa kene
kang te membá.
Kanu-kene yunga bi leku “Imanuel” ningí.” Asaya 7:14
nirim. Bi ilinga ung-pulele ‘Pulu Yili oliu-kene molemú’.
24 Josep uru pepa makiliipa kene Auliele-nga angkellale-ni nirim mele piliipa liipa tepa kene ambale liirim. 25 Akiliinga-pe yu kangambulale ui naa mipili tiluna naa piringli. Penga Maria-ni kangale mirim kene Josep-ni kangale bi lepa “Yesos” nirim.