1 YON
Yon nakalelel let towen waseg silawun siwa̱youb, o kamnat, o mwamovads nag beikous.
1
Livan silma̱nin mwamov
1-3 Wanamug mwamov liva̱nen son Tamads nisesus. Wankuyeim yakamey watigem bo kaligen gamag towen; mitem kakin; nimem kakabkwen; peinan bo ikamat wadaban pwepway. Bo kakin mo kaka̱mat kadibakeimiy liva̱nen mwamov nag beikous; peinan gamag towen son Tamads nisesus mo ikamat wadaban pwepway. Nakakin kadibakeimiy, va̱gan bitamsamwas babaw ya̱kids, peinan sidayas Tamads son Natun Yeisuw Kelis.
Let towen nalel neiw kuvinis, bukumwa̱saws sigwey yakimiy, mo bivakaein idamwa̱saw babaw ya̱kids.
Yowbad kamnat tonen
Anilivan towen bwanabwein nakaligen, mo kadibakeimiy mamagina:
Yowbad kamnat tonen. Nag kweitan dadub sinap Yowbad waseg.
Kukin bitalivan, “Tamsamwas sod Yowbad”, tage adsinap dadub, mogo tayyaweid ya̱kid; peinan sinap mounid tapiyev.
Kukin gog amasinap kamnat, mamagina towen ansinap kamnat, mo tamsamwas sidsidayas wasigeis, peinan Yeisuw buya̱vin iwdiwid adsinaps kalbaleb biyakous.
Kukin gog bitalivan, talana, “Nag ivag adsinap kalbaleb”, mamagina takatidev nanoud tatoneid; peinan nag ivag sinap mounid wasigeis ya̱kid, nag.
Kukin bitakamtel adsinap kalbaleb, Yowbad biwid bilev, mo beikous. Peinan ansinap didumwal, itoukum wotet towen silma̱nin.
10 Kukin gog bitalivan, “Nag ivag adsinap kalbaleb”; mamagina talana, “Yowbad tayyaweid”. Bitalivan ma̱wan, nag beivag ansinap wasigeis ya̱kids.