GALETIY
Kweiboug Pawl igeiguy ven Galetiy waseg, isekes liva̱nen Yeisuw neiweiys waklos; isimounids mwasanin, iyakelesiys. Ikous, Pawl ita̱vin ven babaw igeiguy, mo iyum in wanven.
Wankuyeim min-Yudiy mwasanin ineis Galetiy, sigeiguy kweitan; ilansa, “Bo ika̱bwag amisinap yakamiy. Yowbad ikalin nuwan wasigeis min-Yudiy yakamey, misinak. Yakamiy nag. Kukin sivinamiy Yowbad bikalin nuwan yakamiy, momwamiy kubwabwes, bukumlavags ma̱wana min-Yudiy yakamey; ikous, bweina kusimounids waseg Yeisuw Kelis, mo Yowbad bikalin nuwan yakamiy.”
Min-Galetiy iliganes, bo sunasun ninous, peinan Pawl anilivan kweitan, tasiyas asilivan kweitan.
Wankuyeim bulagan sinap towen iyum inek Pawl, singay igeg nanon, peinan bo iyyaweids min-Yudiy tasiyas. Igeg nanon, ilel let towen, iwyeb inekes min-Galetiy, bivinis mo bikakins misinaka bisimounids Yeisuw waseg, Yowbad mo bikalin nuwan wasigeis. Awoum bibwabwes momwes o bikawes min-Yudiy asisinap; awoum.
Pawl ilivan, “Bitasimounids waseg Yeisuw mo beivag Yowbad Kululuwan anagin bwanabwein wasigeis ya̱kids; kukin gog nag, kaleivids anagin beivag kalbaleb.”
1
Nakabsilamaw
Yey Pawl alel milet neiw biwekeimiy min-Galetiy tayakelesiys yakamiy. O yey gunawotet akokew liva̱nen Yeisuw Kelis. Kanig waseg Yowbad ivag mo imov. Yowbad son Natun nisekeigs gunawotet towen. Gunawotet nag isekeigs gamag mwasanin, nag; Yowbad inakaleiwag.
Yey sigwey Yeisuw nagamag mwasanin wamaven towen, ikalin nuwem min-Galetiy tayakelesiys yakamiy.
3-4 Tamads Yowbad son daGuyaws Yeisuw Kelis bo isiwyobumiy mo itaw nuwamiy. Peinan daGuyaws Yeisuw bo itam bikanig adsinaps kalbaleb peinan, va̱gan kid bikatinabweids ven towen kalbaleb waseg, peinan Yowbad nanon bo ma̱wan.
Mapuna bitayakawanes Tamads towen, tut nag beikous. Eimen.
Livan anagin
Bo igeg nanoug peinan nuwanaw nukupiyaves liva̱nen Kelis. Kweiboug nukuliganes bo isiwyoubumiy; nagein gog kupiyaves Yowbad aygan; bo kuliganes liva̱nen tapwa̱loul tobwag.
7-9 Nag kwayuwein livan bwanabwein nises. Tage gamag mwasanin bo iwekeimiy, iliva̱nes kaleiwag kweitan moumouvit, mo isunasun ninoumiy, e, livan bwanabwein bo iyagages tasiyas.
Yowbad igaw bikatimop siwotet kalbaleb.
Kweiboug nalivan, bo kuliganes; nagein-vak bo alel mamagina: Kukin kavel bikatilow amalivan, bisen kweitan, kadiloka beisiw keb kalbaleb waseg.
Livan bwanabwein nakageiguy wasigeis yakamiy, livan towen mounid. Kukin kal bisap bikatilow livan towen, kadiloka beisiw keb kalbaleb waseg. O yey, kukin bakatilow livan towen, kadiloka ba̱siw keb kalbaleb waseg. Kukin gog gum-liba̱lab teitan bikatilow livan towen, kadiloka beisiw keb kalbaleb waseg.
10 Tabta gamag ages bakanow va̱gan mo bikalin nuwes, ne? Tage Yowbad aygan bakanow. Tabta ba̱noy kweitan ked va̱gan gamag bikalin nuwes? Adok nag. Adok ba̱noy makadewen ked Yowbad inaked, va̱gan bikalin nuwan yey.
Kukin gog baninuway gamag babaw ninous waseg, adok nag ma̱wan bakanow aygan Kelis.
Kweiboug Pawl imlavag takawein liva̱nen Yeisuw
11 Sigweyas, kadiloka kukwakins liva̱nen Yeisuw, towen nasekeimiy; nag gamag mwasanin asilivan, nag.
12 Nag teitan gamag isekeig livan towen. Nag teitan gamag ikatimlakeig, nag. Anmwa̱net Yeisuw Kelis nikatipel sinap towen nisekeig.
13 Nukuliganes kweiboug gum-Yudiy yey, agusinap ma̱wana tasiyas min-Yudiy asisinap, singaya ayagages Yowbad nayakelesiys, sivinag kid bayakousisa tasiyas.
14 Singaya amug wasigeis sigwey min-Yudiys, singaya sivinag tammwayas asisinap.
15-16 Nag gog, Yowbad nidaweig Yeisuw nawotet silma̱nin. Idaweig igawa inag wanuwan, peinan isiwyoubug. Bweilim babaw ikous ee... misiya̱mun towen mo bwein Yowbad nanon waseg, Natun mo ikamat waseg yey va̱gan kid bakow liva̱nen Natun towen, banoy ven kadiveiyov wasigeis.
Nag akatugan gamag wasigeis, va̱gan bakow asisinap, nag.
17 Nag anoun Yelusalem bakatugwan wasigeis takaweins liva̱nen Yeisuw, nag. Tage an Alebiy asesuna, wankuyeim mo a̱yum am Damasik.
18 Bweilim kweitoun ikous, mo an Yelusalem alokon waseg Pita, anbwabwal yey asesuna ee... yam sinawatan kweinim.
19 Nag akines Yeisuw nagamag mwasanin, nag. Misinaka daGuyaws bwadan mtowen Yemes.
20 Tasiyas nag ikatimlakeigs liva̱nen Yeisuw. Mounid agulivan towen nalel, tabudabod Tamads.
21 Wankuyeim mo anoun an Siliy o Silisiy.
22 Tasiyas min-Yudiy tayakelesiys Kelis waseg nag ikines magig, nag.
23 Misinaka niliganes liva̱neig mamagina, “Towen kweiboug sivinan biyagageids peinan ikamliw Yeisuw nakaleiwag, tut towen mo igeiguy kaleiwag towen waseg.”
24 Liva̱neig towen iliganes mo iya̱kawns Yowbad waseg.