KALEIWAG KWEIVAW Luk 1
LUK
1
Nakabsilamaw
Kalin nuwag ya̱koum Tiyopil. Peinan babaw gamag bo isilamaws mo ileles liva̱nen Yeisuw inawotet niwtel wasigeis ya̱kids.
Peinan wanmugwana mwasanin bo nikines wamtes, mo ikawes liva̱nen Yeisuw, isekemas yakamey.
3-4 O yey-vak tut babaw aligen livan towen, asisawena oko ayakous, mo nanoug alana, “Adok bweina balivkaes livan babaw, basen mulet waseg, beiw bukukin, guyaw ya̱koum Tiyopil.” Bukuvin va̱gan bidumwal nanoum mo bukusimounid waseg sinap towen nikatimlakeims.
Elisabet bikop natun
Tutan min-Yudiy siking yagan Elod, tanuwagan lun teitan yagan Sekaliy. Nakwav yagan Elisabet, mana̱wen Elon delen. Tasiyas tanuwgwes lun dal kweitan kweitan. Mtowen Sekaliy Abiy delen.
Mtowen Sekaliy son nakwav asisinap didumwal wamatan Yowbad. Yam katanok katanok ivna̱ses Yowbad nakaleiwag babaw, iyakousis.
Tage nitus nag, peinan Elisabet vinakal bo ivnavek, o namwam bo itovek.
Tasiyas Abiy delen, anatut waseg iwteles lun Yowbad wanbunatum.
Peinan sikikun ma̱wan, kweitan youd ilavesa mav mo iton yagan mtowen Sekaliy; mo ikow nawotet kweitan, mamagina isiw in Yowbad nabunatum wanuwan, igob gewuw, manisin simasim seikwan.
10 Gamag meivek-wan watoulan bunatum ikululs ininitougs waseg Yowbad, peinan bo tutan gewuw beigabs.
11 Mo Yowbad nataka̱yob teitan isap waseg Sekaliy, itoun nakabeigab gewuw wanaka̱tay waseg.
12 Mtowen Sekaliy ikin, iyow nuwan, anpwa̱yat seikwan.
13 Mtowen anelos mo idibek, ilana, “O Sekaliy, awoum beivag ampwa̱yat. Yowbad bo iligen mukwanitoug, mukwav Elisabet bo bikop nitumiy, mo bukudok yagan Yon.
14 “Ya̱koum bukumwa̱saw seikwan simwey babaw gamag bimwa̱saws, mukwav inakopway waseg bikop nitumiy.
15 “Mtowen natum bo bitawtoun wamatan Yowbad. Nag beimoum wayn o tawtoun yevagam, nag. Avei-tut inan bikop, Yowbad Kululuwan mo binek gwad towen, son bises bisigeg.
16 “Mtowen bo bileb min-Yisleil mwasanin mo bikanavin ninous, beiyum binekes siGuyaw Yowbad.
17 “Peinan bo bikanow daGuyaws aygan, biwotet Kululuwan tawtoun waseg, ma̱wan Ilaytiy kululuwan. Bivag timsiyas ninous bikanavin mo binekes gamagal; o tasiyas takapidabs bikanavin ninous mo bisinaps ma̱wana tadidumwals. E, natum inawotet ma̱wan, va̱gan bikabutus inagamag silma̱nin Yowbad inawotet.”
18 Iw to Sekaliy idibek anelos, ilana, “Ama̱wan bakakin amlivan towen mounide? Peinan bo atovek, o gunakwav bo ivnavek.”
19 Anelos ikatimop anilivan, ilana, “Yey Gebliyel, tut babaw natitamanaw wamatan Yowbad. Bo ikayabeig nam adibakeim bulagan towen bwanabwein.
20 “Peinan nag kusimounid waseg agulivan, bo bukusesuna mamagina gumugum yak. Bukusesuna ee... anatut youd towen nalivnek; wankuyeim mo bukulivan.”
21 Gamag tasiyas ikayamats Sekaliy, idokes aveiyag wawun inayouviy wanuwan bunatum.
22 Ikayamats ee... mo isap. Ta-ma̱wan bilivan; mo ikakins mtowen nikin kweitan youd wanuwan Yowbad nabunatum; anilivan bogo naman-wan; wadon nag ma̱wan bilivan.
23 Mtowen Sekaliy ises iwwotet ee... yam towen iyakous nawotet, mo iyum in wanven.
24-25 Wankuyeim nakwav Elisabet mo isum, nises wabunatum kweinim tibukon; mamagina bo issowm wabunatum, ilana, “Yowbad inawotet ma̱wan. Bo ikalin nuwan yey. Gamag nivtokeigs livan vinakal yey, agumwasin; nagein gog bo iyakous.”
Meliy bikop natun
26-27 Kweinim tibukon ikous, iton kweivaw, mo Yowbad ikayeb anelos Gebliyel in Galiliy, ven yagan Nasalet. Inek nakubukwab nagtabod nibokes beivay kid son taw Yosep, Deibid delen.
Nakubukwab mana̱wen yagan Meliy.
28 Mtowen Gebliyel inek Meliy, ilana, “Kalin nuwag! Yowbad soum ya̱koum, ilabeim.”
29 Mana̱wen anpwa̱yat singay; ininuway seik aveiyag silawun livan towen.
30-31 Iw to anelos, ilana, “Meliy, awoum beivag ampwa̱yat. Yowbad bo ikalin nuwan ya̱koum. Igaw mo bukukop natum kuda̱taw. Ikous, mo bukudok yagan Yeisuw.
32-33 “Mtowen bo bitawtoun. Gamag bidokes ‘Tatawtoun Yowbad Natun.’ DaGuyaws Yowbad bo bisek inakaleiwag tawtoun, peinan tabun Deibid inakaleiwag; mo bikaleiwag Yekob delen wasigeis. Nakaleiwag bises bisigeg.”
34 Meliy ikatigan anelos, ilana, “Ama̱wan ba̱sum, peinan ta-ivag gunamwan.”
35 Iw to anelos, idibek, ilana, “Yowbad Kululuwan biwekeim, Yowbad natawtoun waseg bisekeim. Mapuna bukusum natum, gamag bidokes gwad to takamnat, Yowbad Natun tatonen.
36 “Tage veiyoum Elisabet bo ivnavek mo isum, natun kuda̱taw nises wanuwan. Idokes kid vinakal mana̱wen, tage neisum kweinim tibukon katanok waseg.
37 “Peinan Yowbad waseg, youd babaw bo kadilok.”
38 Meliy iligen ikous, mo itam, ilana, “Bwein. Yey Yowbad natouwat yey. Bweina biva̱geig ma̱wan nukulivan.” Anelos towen mo ilisow, inoun.
Meliy inek Elisabet
39-40 Tut towen Meliy mo itamanaw, inuwanaw, inoun in koyakoy, ven kweitan wawnuwan Yudiy, isiw in wanuwan Sekaliy nabunatum, imulouls son Elisabet.
41-42 Elisabet iligen Meliy anilivan ikous, natun mo ivatay wanuwan, Yowbad Kululuwan mo inek mana̱wen Elisabet, aygan avakaein, ilana, “Singaya namwa̱saw ya̱koum. Vinay babaw isimwa̱saw nag ma̱wan ya̱koum. Natum nukusum singay bwanabwein.
43 “Aveiyag wawun Yowbad nisiwyoubug mo kumekeig, daGuyaws inan ya̱koum?
44 “Nukum, aligen aygam mo natug ivatay wanuwag, peinan bo imwa̱saw.
45 “Singay tammwa̱saw ya̱koum peinan kunamis va̱gan bikamat youd towen Yowbad nidibakeim.”
Meliy iya̱kawn waseg Yowbad
46 Iw to Meliy, ilana,
“Kululuwag iya̱kawn waseg Yowbad.
47 “Singay amwa̱saw, peinan takatinaweig Yowbad.
48 “Peinan bo inuway tasimav natouwat yey.
Wankuyeim gamag babaw mo bidokeigs
nammwa̱saw yey, bweilim katanok katanok waseg.
49 “Towen Tatawtoun, singaya bo ilabeig; yagan tonen kamnat.
50 “Bo inok nuwan tasiyas nigigoulus; wankuyeim nitsiyas o tibsiyas bo ma̱wan.
51 “Naman tawtoun waseg bo itakayway.
Bo ikatigulekwes tasiyas takaypamweins sinap.
52 “Bo ikatigulekwes sikaleiwag tasiyas tatawtouns;
o tasiyas tasimavs bo iyamwenes.
53 “Tasiyas asimoun bo isekes kaeis bwanabwein, beikams bikamuweips.
Tage bo ikayabes guyawaw, asimoun waseg iyums.
54-55 “Bo inuway anilivan bwein nidibakes tammwayas, tasiyas Ebelam
siney delen ya̱kids, tut nag beiyakous.
E, bo inuway anilivan, inok nuwan,
ilabeids min-Yisleil ya̱kids.”
56 Meliy ilivan ikous; asteiy nisesus son Elisabet; adok kweitoun tibukon, mo iyum in wanven.
Elisabet ikop natun Yon
57 Mana̱wen Elisabet nises ee... tutan bo itup mo itapoy naman, natun kuda̱taw.
58 Ansinva̱lam sisiyas taliven mo iliganes bulagan Yowbad nasiwa̱youb avakaein waseg Elisabet, inekes, sisiy imwa̱saws.
59-60 Yam kweinim ikous, kwatounun yam mo inekes va̱gan bibwabwes momwan gwad; bidokes kid yagan Sekaliy, mamagina valeyin taman; tage inan igidem sikaleiwag, ilana, “Nag. Tadokes yagan Yon.”
61 Iweis tasiyas, ilansa, “Aveiyag wawun? Nag ivag amigamag teitan yagan Yon, bukudokes valeyin.”
62 Mo iliva̱tes nimes waseg, ikatiga̱nes taman, avei-yeg waseg bidokes yagan gwad towen.
63 Taman towen sivinan buk; isekes mo ilel mamagina “Yagan Yon.” Ikines, bo isom ninous.
64 Ilelel ikous, mo ikapwageg wadon, ilivan, iya̱kawn waseg Yowbad.
65 Bo iyow nuwes tasiyas; bulagan illivans ven babaw koyakoy wawnuwan Yudiy.
66 Asibabaw iliganes, ininuways, ilansa, “Gwad towen aveiyag mo bimlavag?” Peinan Yowbad son gwad towen, ilileb.
Sekaliy ilivnek liva̱nen Yon
67 Yowbad Kululuwan mo inek taman Sekaliy, ilivnek sinap, ilana:
68 “Min-Yisleil ya̱kids bitaya̱kawns waseg daGuyaws Yowbad,
peinan bo ilakwaneids nagamag ya̱kids,
ikatinabweids.
69 “Natouwat Deibid delen teitan bo isekeids takatinabweids.
70 “Kweiboug Yowbad nilivnek waseg asilivan inapalopits tatonen.
71 “Anilivan mamagina bikatinabweids;
awoum tasiyas nikamliweids biyagageids.
72 “O binok nuwan, peinan nilivnek wasigeis tammwayas.
Bo inuw anilivan towen mounid.
73-75 “Anilivan mounid towen nisek tabuds Ebelam,
itam va̱gan bikatinabweids.
Awoum tasiyas nikamliweids biyagageids;
mapuna beiyakous adpwa̱yats,
o bitakanawes aygan, waseg
adsinaps didumwal, bwanabwein, yam
katanok katanok.
76 “O gwad ya̱koum, igaw gamag mo bidokeims
‘Yowbad Tatawtoun inapalopit ya̱koum.’
Peinan bukumgwey; inaked bukuvag beibwein.
77 “Bukwatimlakes inagamag mo bikakins nakatuneib waseg,
peinan biwid asisinap kalbaleb, binumlev.
78-79 “Towen Yowbad inasiwa̱youb bwanabwein beinoy walba̱lab bimekeids,
mamagina lalayis
beim mititeilin waseg bimteilids,
o bimteilis kid tasiyas tadadubs, tasiyens kabkanig walasin,
mo bikatimlakeids niwal kidenen.”
80 Gwad towen bo itawbwat, bo ivakaein, kululuwan bo itawtoun, misik wanawoud ee... anatut waseg mo ikamat wasigeis min-Yisleil.