1 Tesalonaika
Pâlaŋ Tesalonaika am ekŋengat zapat meluwaŋ ŋeŋaŋ kapi kumti beme mege
Pâlaŋ zapat meluwaŋ kapi kukŋaŋgat kuye. Egaŋ Kolin mka temaŋ tati Tesalonaika dapmelaŋge ekŋengat zapat meluwaŋ kapi kumindaye. Kolinmak Tesalonaika mka temaŋ zut ke msat temaŋ kwepgat keŋan talip. Loma gapmangalen plowins ikŋak ikŋak. Kolinaŋ Akaia plowinsyet keŋan tazin ma Tesalonaikayaŋ Masodonia plowinis keŋan tazin. Kegogapmti Pâlaŋ Kolin mka temaŋ tati zapat meluwaŋ kapi kumti Tesalonaika dapmelaŋge ekŋenmagen beme mege. Tesalonaika mka temaŋ ke nembu gazenan matazin. Zuda am isikŋaŋ bukŋen mme penaŋ msat mtoŋ Glis am. Tesalonaika mkaen Zuda am ekŋengalen sesewat mka tage keyepmti Pâlaŋ Zisasiyaŋ gakimti wageyelen zet zapatnaŋ ke met diindome kumâpme Tesalonaika mka pemti Belia mkaen towepme mâtoti mâpme Aten mepmamtan (Nembayelen Muluwin 17:1-14).
Pâlaŋ zapat meluwaŋ kapi yaŋaŋ kulekiyet kuye? Egaŋ Tesalonaika dapmelaŋge ekŋenmak belaknik bukŋen tati koge yaŋgut Pâlaŋ ekŋengat kembeŋ mtiyepm zapat meluwaŋ kapi kumindain. Ekŋenaŋ amnaŋ ek ku mâbien sepem keboŋ ke amnaŋ ekŋen indomâpme keyet nâmnukŋaŋ ku mbep nâmtiyepm kumindaye. Ekŋenaŋ nâmkiŋpepeyen alakŋati kobien keyepmti zemgwatnaŋ zet notnaŋ mimindaye. Zisasiyaŋ sakwep kokogalen zet ke bukŋen tembenik zapat meluwaŋ kapiyet kumindamti zemâtâtât omba penaŋ mge.
Zet ŋotekŋaŋ temaŋ kapigogaŋ 1 Tesalonaika zapat meluwaŋ keŋanen talip:
1:1 Pâlaŋ dapmelaŋge indamukuye
1:2–3:5 Pâl Zisasiyaŋ mulup sasaŋaŋ ke mimiyelen zemâtâtât zet notnaŋ kuye
3:6-13 Pâlaŋ ekŋengalen nâmkiŋpepeŋin ma notn notn mamayet tikŋaŋin omba tatindaye keyet zemsesewatindaye
4:1-12 Pâlaŋ mama mimi dolakŋaŋ mimiyet zemgwatnaŋ mge
4:13–5:11 Pâlaŋ msatmak kululuŋ asekmalu menok sambe sokbewe keyet zetnaŋ zeye
5:12-28 Pâlaŋ an kwep kwep mukumindemâge
1
Zet yaŋbemzenzeyelen zet
1 Neŋmak Silwanusmak, Timoti, nsakwep kapi tati zapat meluwaŋ kapi Kawawaŋ Bipm ma Amobotnaŋ Zisas Kilaisiyelen am maŋge Tesalonaika mka teman talip ingat kumti bemann kozin. Ma egelaŋ in keŋ taolet ma keŋ sewakŋaŋ mimindandayet nâmti mandundunup.
Tesalonaika am ekŋengalen nâmkiŋpepeŋinaŋ am notnaŋ meleŋ belaŋ bemindeye
2-3 Mti nin Bipm Kawawaŋmagen nâmkiŋpemti kwitnaŋ kwitnaŋ dolakŋaŋ sambe mamimelip keyet maotnâmindenup. In Kawawaŋgalen am maŋge ekŋenmagen mulup windeŋaŋbeŋ mti Amobotnaŋ Zisas Kilais kokogat penaŋ webemti matalip keyepmti nin mandundunup kataŋ ingat nâmti Kawawaŋgat wisikŋ manzenup. 4 Kilaismagen dapmeniŋne in kapigok nâit, Kawawaŋaŋ ingat keŋaŋ temaŋ beme ikŋaŋgat zapat penaŋ indaombemindeye. 5 Nin inmagen Kawawaŋgalen Zet Zapat Dolakŋaŋ Penaŋ mti kobenn ke wan am ŋengalen zet belakŋaŋ yek. Zet ke Emetak Teŋmak ma windeŋaŋmak e penaŋ ekmâtâpmann delaŋ zeme ingat tuŋguwinan kopmamti indamukulem mti mambenn keyet yaŋaŋ ilin nâmndeip. 6 In buŋam zapat timkitikpemti nin ma Amobotnaŋ ikŋaŋ ndapmâti mambien kan keyet nukŋaŋ sambe penaŋ amnaŋ ingat palen bewien. Yaŋgut keyet keŋan Emetak Teŋaŋ keŋin mme oloŋen etaŋ bemâbien. 7 Âpme in mama mimiŋin dolakŋaŋ ke mme am Masedonia msalen ma Akaia msalen am nâmkiŋpepemak mamaip ekŋenaŋ in indikti ingalen set dolakŋaŋ keyegak mâti mbien. 8 Wa in nâme Masedoniamak Akaia msalen ke meti Kilaisiyelen mulup mbien ewan msat zut ke etaŋ ku tage nâmkiŋpepeŋinaŋgat zapatnaŋaŋ msat sambe bee mekopme am sambeyaŋ nâme delaŋ zemâge. 9 Nin inmagen kobenn kan keyet in mukulem dolakŋaŋ mimndawien ma nin zet zemann nânâŋak keyegak nopiom notnaŋ sambe masesewatsamtemien e peme tapme Kawawaŋmagen koti Kawawaŋ alik main ma ek penaŋ sukwep tazin ek masesewatsaip. 10 Kegok mti Kawawaŋgat Nemuŋaŋ Zisas kululuŋengatnaŋ gilik zemti kobe keyet damuŋ matalip. Ek Bipmaŋaŋ gakikiengatnan buteme wati moge. Nin ekmak watekumti manup keyet mti ninmagen Kawawaŋgalen weŋbowaŋ ku sokbewe.