Matiyu
Zisasiyet yaŋaŋ Matiyuyaŋ meluwaŋ mge
Matiyu ek Zisas Kilaisiyelen nembaŋane 12 ke ŋen ek ma kwitnaŋ ŋen Liwai makumtemien. Âpme ek Loma gapmangalen mânep takis titi an mamtan. Yaŋ bamgat Zisasiyaŋ ombempeme egat nembaŋaŋ kwage.
Matiyu egaŋ buŋam zapat kapi Zuda ikŋaŋgat amŋaneyet kuye. Âpme Zuda am ekŋenaŋ an Kawawaŋaŋ ombempepeŋaŋ egaŋ sakwep koti ekŋengalen Amobotnaŋin tatagalen keyet nâwien. Zuda ekŋenaŋ Ibulu zelinaset an keyet kwitnaŋ Mesaya makuip ma Glik ekŋengalen zeleset Kilais makuip. Âpme Zuda ilinaŋgalen Amobotnaŋ Zisasiyaŋ kopmaŋgeen ekŋenaŋ nâme am belakŋaŋ beyeyepmti ekŋengat tuŋguwinan mamti kwitnaŋ kwitnaŋ meletnaŋ mme ekti nâmtemtem mbienaŋgut an kapi Kawawaŋaŋ amŋene yomengatnaŋ gilik zemindatitiyelen an penaŋ ke ku nâmkiŋpewien. Matiyu egaŋ buŋam zapat kapi Zuda am ekŋen Zisas ek Mesaya penaŋ ke nânâyet meluwaŋ kumindaye ma Zuda am ilinaŋgalen Amobotnaŋin zemâtâtindaye. Keyepmti Matiyuyaŋ Zisas Amobotnaŋ koge keyet zemsalaŋ beye ma egaŋ kegogak zet zapat notnaŋ Kawawaŋgalen Zet Itnaŋaŋ zetik mimiŋaŋ Kawawaŋaŋ ek ikŋaŋ ombempeme ninmagen toge keyet meluwaŋ kapiyet mge. Ma zet itnaŋaŋaŋ Kilaisiyaŋ kokotnaŋgalen zet zapat zenzeŋaŋ ke penaŋ sokbeye.
Âpme Matiyuyaŋ zet zapat ŋen Kilaisiyet zemâtâtâtnaŋ keyet keŋan nin Kawawaŋgalen maŋge tusumti mama mimi dolakŋaŋ Zisasiyaŋ nâmtikŋaŋ min ke mâti mimiyet meluwaŋ mgeen tuŋgupmaŋ 5gatnaŋ 7 kapi main.
Zet ŋotekŋaŋ temaŋ kapigogaŋ Matiyuyelen buŋam zapat keŋan talip:
1:1–2:23 Zisasiyet yeŋsokŋane ma sokbembeŋaŋgalen zapat
3:1-12 Zân an tu zululut egaŋ mulup mge
3:13–4:11 Zisasiyaŋ tu zulut delaŋ zeme Sadaŋaŋ koti Zisas tetimae mge
4:12–18:35 Zisasiyaŋ Galili msalen Zet Zapat Dolakŋaŋ zemkawaŋ beye
19:1–20:34 Zisasiyaŋ Galili msat pemti Zudia msalen moti mulupmaŋ mge keyelen zezapatnaŋ
21:1–27:66 Zisasiyaŋ Zelusalem mka teman moti manepeme kume gakikiŋaŋgalen zet zapat
28:1-20 Zisasiyaŋ gakikiengatnaŋ wapme nembaŋaneyaŋ ekbien
1
Zisasiyet yeŋsok guluk galakŋane sokbemkobien ekŋengalen kwilin
(Luk 3:23-38)
Am maŋge ŋen maŋge ŋen sokbem kotnepeme Zisas ek Abalaam ma Dewit egegat iŋsokŋit penaŋ sokbeye.
Âpme Abalaamgat nemuŋaŋ Aisak sokbeye.
Aisakgat nemuŋaŋ Zekop sokbeye.
Âpme Zekowaŋ nemuŋaŋ Zuda ma meniŋane notnaŋ indambege.
Âpme Zudayet nemuŋanet Pelesmak Zelamak sokbewun. Egetgat mamit Tama.
Âpme Pelesiyet nemuŋaŋ Eslon sokbeye.
Eslongat nemuŋaŋ Lam sokbeye.
Âpme Lamgat nemuŋaŋ Aminadap sokbeye.
Aminadapgat nemuŋaŋ Nason sokbeye.
Nasongat nemuŋaŋ Salimon sokbeye.
Âpme Salimongat nemuŋaŋ Boas sokbeye. Egat mamaŋ Leap.
Âpme Boasiyet nemuŋaŋ Obet sokbeye. Egat mamaŋ Lut.
Âpme Obetgat nemuŋaŋ Esi sokbeye.
Âpme Esiyet nemuŋaŋ Dewit ke amobotnaŋ sokbeye.
Dewit* Dewilaŋ imbi ke kambu wage. 2 Samuel 11. egat nemuŋaŋ Solomon sokbeye. Egat mamaŋ ke itnaŋaŋ Yulayayet imbiŋaŋ.
Âpme Solomongat nemuŋaŋ Liaboam sokbeye.
Liaboamgat nemuŋaŋ Abaisa sokbeye.
Abaisayet nemuŋaŋ Esa sokbeye.
Esayet nemuŋaŋ Ziosapat sokbeye.
Ziosapatgat nemuŋaŋ Olam sokbeye.
Olamgat nemuŋaŋ Yuzaya sokbeye.
Âpme Yuzayayet nemuŋaŋ Zotan sokbeye.
Zotangat nemuŋaŋ Eas sokbeye.
Easiyet nemuŋaŋ Esekaya sokbeye.
10 Âpme Esekayayet nemuŋaŋ Manase sokbeye.
Manaseyet nemuŋaŋ Amon sokbeye.
Amongat nemuŋaŋ Zosaya sokbeye.
11 Âpme Zosayayet nemuŋaŋ Zekonayamak ekŋen meniŋane notnaŋ sokbemâbien. Kan keyet Babilon msalen Zuda am indomti indatimti mebien.
12 Ekŋenaŋ met Babilon msalen met tabien ke Zekonaya nemuŋaŋ Sialtisel sokbeye.
Âpme Sialtiseliyet nemuŋaŋ Salababet sokbeye.
13 Âpme Salababetgat nemuŋaŋ Abayut sokbeye.
Abayutgat nemuŋaŋ Elayakim sokbeye.
Elayakimgat nemuŋaŋ Eso sokbeye.
14 Âpme Esoyet nemuŋaŋ Sedok sokbeye.
Sedokgat nemuŋaŋ Ekim sokbeye.
Ekimgat nemuŋaŋ Elayut sokbeye.
15 Âpme Elayutgat nemuŋaŋ Eliesa sokbeye.
Eliesayet nemuŋaŋ Natan sokbeye.
Natangat nemuŋaŋ Zekop sokbeye.
16 Âpme Zekopgat nemuŋaŋ Zosep sokbeye.
Zosep egaŋ imbiŋaŋ Malia wage.
Âpme Malia egaŋ maneti Zisas ambege. Nin eget kwitnaŋ Mesaya kukuyelen. Ningalen zeleset Kawawaŋaŋ Zisas ombempeme nin yomengatnan timkwatndendeyet an sokbein.
17 An sokbemkwebienen kalakumann maŋge tuk kapigok benak. Abalaamagengatnaŋ Dewitmagen kwadelaŋ peinen an maŋge sokbemkwapme 14 kogok beye. Ma Dewitmagengatnaŋ Babilon msalen mka katikŋan indatmebienen kogogak an maŋge 14 sokbewien. Ma Babilon mka katiknaŋgatnaŋ Kilasmagen kwazinen kogogagak an maŋge 14 sokbewien.
Zisas Kilais sokbeye
(Luk 2:1-7)
18 Zisas Kilais sokbeye keyet yaŋaŋ kapigok penaŋ tazin. Mamaŋ kwitnaŋ Malia. Egat apmaŋ Zosep ewe an zapatnaŋ etaŋ zempeme igak igak manepemalu Emetak Teŋaŋ menok mme Malia ek nemba kambakmak tage. 19 Kegok mme an zapatnaŋ Zosep ek mama mimiŋaŋ dolakŋaŋ maŋgeyepmti keŋanŋegak kapigok otnâŋge, “Neŋ zetnaŋ sosok zema sakambuk temaŋ tisemgat belak buzak katipemti mebap.” Kegok nâŋge.
20 Kegok mimiyelen nâmti manepeme Amobotnaŋgalen ensel ŋenaŋ mulugen sokbemsamti kapigok dunduye. “Zosep, geŋ Dewitgat guluk galakŋaŋ, imbindi Malia wawagat yayaŋ ku msenik. Nemba kambakmak tazin ke Emetak Teŋmagengatnaŋ. 21 Nemba atam mbe kwitnaŋ Zisas kuwanik. Kwit keyet yaŋaŋ, Egaŋ ikŋaŋ amŋane yomengatnaŋ indatim kwabe.”
22 Kwitnaŋ kwitnaŋ sokbeye ke golaŋ zenze an ŋenaŋ eweŋan Amobotnaŋ Kawawaŋgalen Zet Itnaŋanen kapigok zeye, ke penaŋaŋmak bembeyelen sokbeye,
23 “Nâip, imbi nembip ŋenaŋ nemba kambakmak tati nemba ambebe. Âpme anemba keyet kwitnaŋ ‘Imanuel’ kuwep. Imanuel kwit kapiyet ningalen zeleset yaŋaŋ Kawawaŋ ninmak main.” (Aizaya 7:14)
24 Âpme Zosewaŋ mulugengatnaŋ wati Amobotnaŋgalen ensel egalen zetnaŋ gawepumti Malia mkaŋan wati moge. 25 Mobunaŋgut awembiŋ mama ke ŋen ku mambun. Belak imbiŋaŋ kekenemuŋ penaŋ tetimti manepeme nemba ke sokbeme Zosewaŋ kwitnaŋ Zisas kuye.

*1:6: Dewilaŋ imbi ke kambu wage. 2 Samuel 11.