Jesu’walaŋ Mede Momooŋ Matiyudi youkuk
Yodakale Mede
Matiyudi Jesu’walaŋ mebi indiŋ yodakaleguk. “Jesu adi Bepaŋdi Tubulodanik mintadok yofolok tubune halibuguk wondiniŋ folooŋ adigoŋ.” Bepaŋdi Jesu Tubulodanik niŋkutdok Youkudip Mede gineŋ yofolok tubune halibuguk adi Judahi eŋ Isilaehidok hogok moŋ. Jesu adi kwetkwet metam hatigiŋ be hatiyam be hatineeŋ, inditok wanakaŋnik.
Matiyu adi Jesu’walaŋ mebi didimeniŋgoŋ hinek nadidakalehinakaŋ youhabiyeguk. Uye indiŋ, Jesu mintaguk diniŋ kahat, agoŋ Imeyout tuguk, agaŋ Sadaŋdi tikamanda timiŋguk. Nai uŋaniŋ Jesu adi Galili kwetneŋ kwanaiŋiŋ tububihila tuguk. Bepaŋ’walaŋ Mede Momooŋ yohautaguk, Bepaŋ’walaŋ Yodoko Mede diniŋ mebi yenindidimeeŋ yagit folofigitahinit yehitubukedebaguk. Eŋ yabap heki maaŋ yeniyehikeleune meniŋ biyabuŋa ugiŋ. Jesu adi unduŋ titauuyeŋ Jelusalem yokwet mebineŋ usuwaaŋ hatilune memikŋiyedi honeeŋ koloŋdabek foloŋ ulune kumuŋguk. Iŋgoŋ kotigoŋ kaikaaŋ pilali muniniŋ kabe hatiŋa kunum foloŋ udaneeŋ loguk.
Matiyudi Jesu kwetfoloŋ hatiŋa metam yenindidimeguk diniŋ mede daŋiniŋ 5 boiŋa youkuk.
Kwet tuwai foloŋ metam Mede Momooŋ yeniŋguk (Fiye 5-7)
Mihiŋiye kwanai mede yeniŋa mede yeniŋkiliti tuguk (Fiye 10)
Kunum gineŋ Bepaŋ’walaŋ hatihati uŋgoniŋ hatak wondiniŋ mebi yeniŋguk (Fiye 13)
Nadinadi moŋgolaŋa ne’walaŋ mihiŋiŋ hinek hatidok (Fiye 18)
Nai indinde hatiyam eŋ hatigene nai dapmaune Jesu kotigoŋ baak (Fiye 24-25)
Matiyu’walaŋ mede diniŋ yohebet
1:1–2:23 Jesu’walaŋ dadaŋiye eŋ mintaminta nai
3:1–12 Jon Imeyout Tububihit’walaŋ kwanai diniŋ kahat
3:13–4:11 Jesu’walaŋ Imeyout eŋ tikamanda mintaguk
4:12–18:35 Galili kwetneŋ kwanai tuguk
19:1–20:34 Galiliniŋ Jelusalem usuwaguk
21:1–27:66 Jelusalem yokwet magimagineŋ kwanai tuguk
28:1–20 Kaikaaŋ pilakuk eŋ mintahebi tuguk
1
Dewit’walaaniŋ tububihila labuŋa Jesu mintaguk diniŋ me wohi hebet
(Luk 3:23-38)
1 Yoŋ adi mebop indiŋdi mintatalabubuyeeŋ Jesu Kilistodi Abalaham’walaŋ yalakiŋiŋ Dewit’walaaniŋ gineŋ mintaguk wendiniŋ youhebet.
2 Abalaham adi Aisak beu. Kaŋ Aisak adi Jekop beu. Kaŋ Jekop adi Juda tiŋa kwayaŋiye’walaŋ behik. 3 Kaŋ Juda adi Peles dut Sala’walaŋ behik, eŋ adi mehik Tema. Kaŋ Peles adi Hesolon beu. Kaŋ Hesolon adi Lam beu. 4 Kaŋ Lam adi Aminadap beu. Kaŋ Aminadap adi Nason beu. Kaŋ Nason adi Salmon beu. 5 Kaŋ Salmon adi Boas beu, eŋ miŋ e Lehap. Kaŋ Boas adi Obet beu, eŋ miŋ e Lut. Kaŋ Obet adi Jesi beu. 6 Kaŋ Jesi adi mapme Dewit’walaŋ beu. Kaŋ Dewit adi Solomon beu, miŋ e koom Yulaiya hemiŋguk. 7 Kaŋ Solomon adi Liyaboam beu. Kaŋ Liyaboam adi Abaisa beu. Kaŋ Abaisa adi Asa beu. 8 Kaŋ Asa adi Yehosafat beu. Kaŋ Yehosafat adi Yolam beu. Kaŋ Yolam adi Usaia beu. 9 Kaŋ Usaia adi Yotam beu. Kaŋ Yotam adi Ahas beu. Kaŋ Ahas adi Hesekiya beu. 10 Kaŋ Hesekiya adi Manase beu. Kaŋ Manase adi Amon beu. Kaŋ Amon adi Josaiya beu. 11 Kaŋ Josaiya adi Yekonaiya hekikwayaŋit adi behik. Nai uŋaniŋ Bepaŋdi Isilaehi metam biyabune Babilonhidi widihiŋa yanagila Babilonde ugiŋ.
12 Isilaehi adi kadakaniŋ tubune Bepaŋdi biyabune Babilonhi yahaŋeune uŋoŋ wooŋ hatiŋila Yekonaiya adi Siyatiyel beu hatiguk. Kaŋ Siyatiyel adi Selababel beu. 13 Kaŋ Selababel adi Abiyut beu. Kaŋ Abiyut adi Eliyakim beu. Kaŋ Eliyakim adi Eso beu. 14 Kaŋ Eso adi Sedok beu. Kaŋ Sedok adi Akim beu. Kaŋ Akim adi Eliyut beu. 15 Kaŋ Eliyut adi Eliyesa beu. Kaŋ Eliyesa adi Matan beu. Kaŋ Matan adi Jekop beu. 16 Kaŋ Jekop adi Josep beu, kaŋ Josep adi Maliya yohoi. Kaŋ Maliyadi Jesu mihi nagikuk, Kilisto niiŋ.
17 Unduŋ doktiŋa mebop indiŋ mintatalabugiŋ: Abalaham’walaaniŋ tububihila mintatalabubuyeeŋ Dewit mintaguk u kunakunathik 14. Kaŋ Dewit’walaaniŋ tububihila mintatalabubuyeeŋ Isilaehi yahaŋeune Babilon kwetneŋ hatigiŋ u maaŋ kunakunathik 14 iŋgoŋ. Kaŋ nai uŋaniŋ tububihila mintatalabuŋa bubuyeeŋ Kilisto mintaguk u maaŋ undugoŋ kunakunathik 14 gineŋ iŋgoŋ dapmalak.
Jesu Kilisto ŋakŋak mintaguk
(Luk 2:1-7)
18 Jesu Kilisto adi talik indiŋ foloŋ mintaguk. Miŋ Maliya adi Josepdok tam gigit yofolokeneune molomolom hatilune Uŋgoniŋ Munabulidi miŋ-ikilitimimbune mihiwele ikuk. 19 Kaŋ Josep adi me didimeniŋ hatiguk doktiŋa undiniŋ kanadiŋa indiŋ nadisuguk, “Nu Maliya mu tubumekait, unduŋ doktiŋa yofolok hatak iŋgoŋ fiit kabup bikabit.”
20 Adi unduŋ hanadisulune Wapum’walaŋ aŋelo niŋdi damo gineŋ mintamiŋa indiŋ niŋguk, “Josep, Dewit’walaŋ yalaki, du tamge Maliya nagitdok nadibedi mu tibeŋ, mihiwele woŋ adi Uŋgoniŋ Munabuli’walaŋ. 21 Ala mihi u mintaune wou adi Jesu yobaaŋ, adi kuyendi metamŋiye kadakaniŋ diniŋ folok gineniŋ yehifiyali yanagilaak.”
22 Nemenemek hogohogok mintaguk u polofet niŋdi Wapum’walaŋ maŋiŋ mede tiŋa indiŋ youkuk, wendok tuwot tagimneeŋ mintaguk,
23 “I nadineŋ, tamkuya niŋ me dut nemu hatiŋa mihiwele ila mihi niŋ nagilaak kaŋ wou Imanuwel nineeŋ.” (Inde’walaŋ mede foloŋ: Bepaŋdi indut hatilak.)
24 Kaŋ Josep adi damo gineniŋ pilaliŋa Wapum’walaŋ aŋelodi mede niŋguk u tagimneeŋ welekubugoŋ tiŋa Maliya u ne’walaŋ tamŋiŋ unduŋ nadiune dapmaune nagila yolineŋ loguk. 25 Unduŋ tiŋa tamŋiŋ dut nemu hatibune mihi u mintaguk. Kaŋ Josepdi wou Jesu youkuk.