1 KORINTIENS
1 Korintienson Vuak Amur
Tavan iji For fu fas igi isoime e God ma vierafejo bu ai Korint karinva iji nijiainma iji fu ai Efisis ijia fine isoin. Revo ai Korint fu mai bomana be fu ar Gris guf ijia ga e Jius bakin iji buka ma uruvana ijia karin. Regavo e iji bu God ga akai fuon iji buka ba vierafen revo buka barubara fudainamime unam ise rejknum ise uruvana kafokafo reoijo. Ijefuon For fu va ai Korint ijia kekome Godon vuak ma iji abe e Korintko ijin kuardiamga e fok bu oibuon karoime God ma vierafen. Regavo rad For fu una fas be isoim nijiame izeg e God ma vierafejo bu kegoijo ijefuon anej ma iji kuardiame nijaidiain. Regavo madu fu izeg unam ise bu reoijo iji arekfuon ijin kuardiain. Regavo e Korintko bu una fas isoime For nijame unam kafokafo e God ma vierafejo bu rejo ijefuon duna kuardain. Ijefuon For fu fas igia isoime duna buon bu kuardainva ijefuon maiji kuardiain.
1 Korintiens vuak kafokafo fu isoinma ijin
1:10–4:21 For fu Godon e iji bu dab atainva ijefuon fu musikiame arafiriainma ijin.
5:1–7:40 Barubara bu izeg samuanamiknum sanamikfuon ijin.
8:1–11:1 Unam ise iji mimatame kegoijo iji e God ma vierafejo iji buka uzavo ijin.
11:2–14:40 E God ma vierafejo bu besum afuime ikreoknum vo sirimamejo ijin.
15:1-5 Kurais fu guamevo una urinma ijefuon anej ma iji.
16:1-4 E Jerusaremko iji mon vajiakfuon ijin.
16:5-24 Foron vuak radkma fu kuardiainma ijin.
1
For fu ai Korint ijia e iji bu besum afuime God ma vierafejo iji anadiainma ijin
Na For nar fas igi isoime e iji ja ai Korint ijia karinva iji nijiav. Naiji fun Godri usuibe kumenma ijefuon na Jesu Kuraison afasor rene vuak fuon ma iji abe ijia vua ja kuardiak. Revo e Sostenas uviainuvuon iji Kurais ma vierafeno igi nosik fino iji no besum ja anadiav. Fas igi na isoinva iji na Godon sos iji ja anadiav. Regavo jaiji fun Godri ik amur ijia ja e akai fuon rene karikfuon fu iji kumen. Regavo madu fun ik amur ijia ja kege una Jesu Kuraisna besum uniain. Regavo na vierafe God Asoinuvuon ijiga E Bomana Jesu Kurais bu ja ma rediaknum vo ifejdiaga ja afuime karik.
For fu e Korintkobuon Godon oimarenma ijin
4-5 Naka tavan uruvana God fu izeg ja daro miame unam kafokafo ijia ifejdiamo ijefuon fuon oimarev. Fu ijegrejo ijefuon maiji ja e besubesum ja e fuon. Fu vierafe ja vuak fuon ma iji amarigia faivknum ga abe e roin kuardiakro fu ijin ifejdiame daro miain. Ja ire ijegrejo iji jan Godon vuak ma iji fu Kuraison kuainma iji no abe nijaidiainva iji jaka abe gigikin vierafej. 7-8 Ijefuon jaiji ja una Kaven Akai ijia ire ma kafo efkin karvo iji jaka zazaivo bakin. Jaka vek ijeg karine rejknum tavan iji Jesu Kurais fu una moikigia ruakfuon ja iji samuav. Regavo madu na vierafe Kuraisri ifejdiaga ja jon ja ma vierafejo ijia giriesame vierafeknum karivake tavan iji ja aoivo ijia usek. Ja ijegrenki E Bomana Jesu Kuraison tavan iji fu una roko ijia buba vuak ise kafo kege una ja namdiak. Regavo vuak igi na kuardiavo iji God fu arekma bakin gavo fuka rek. God iji fu ik amur ijia ja kumena ja una Farifuon Jesu Kurais E Bomana nuvuon ijiena mazinva ijar ire iji fu rek.
E ma vierafejo ai Korint karinva iji bu dab ata roinroin renva ijin
10 Regavo kaifnun na E Bomana Jesur daro mienma ijefuon na ja vuak gigikin kuardiav. Na kuardiame bijukuriavno ja joi musikuaivo iji nika arenki iji ja abe atavo iji ja arekfuon. Ja ijegrejo iji arega na vierafe jaka oi besum vierafekfuon. Regavo madu jaka unam izeg ja Kurais igame karikfuon ijin abe besum kuaim iganamime kariokfuon. 11 Regavo vuak igi na ijeg kuardiavo ijefuon maiji e Koroion agan ijia e ma vierafejo kafo bu samakaf kuardieme kie jaka ijia jon musikuaiknum karioijno kien. 12 Regavo igi na kuaivo iji izeg e be a kuai na Foron vuak iji fu Jesuon kuardienma na iji javno kuain. Regavo e be fu kuai na e Aforason vuak iji javno kuain. Regavo e be a kuai na e Fitaon unam ijia javno kuain. Regavo be fu kuai na nunkua na Kuraison unam ijia javno kuain. 13 Regavo igia fai ijeg ja karine rejo iji na vierafega fuka ba maren. Regavo ni vierafe Kurais fu abe ata kafokafo renma bakin. Revo For nak na kuros ijia guainva bakin revo fu Kuraisri guain. Regavo madu do ja ruainva iji ja if nun ijia ruainva bakin. 14-15 Regavo be iji naba e uruvana do ruardiain gavo nan e Krisfas ko Gaias buonkua ke do ruardiain ijefuon na bomana oimarev. Ijefuon maiji fu erar kuai na For do ruardiedo na e fuono kuaikma bakin. 16 Regavo madu e be iji nan vierafen na e Stefanas ko aganfuon ijin ke do ruardiain. Regavo na e kafo na erane ke do ruardiainva bakin. 17 Na e sibank ijin ke do ruardiainva ijefuon naka oimarek. Ijefuon maiji Kurais fu kie, A va e do ruardiamne kienma bakin. Revo ik iji fu na kiema na ruainva iji na Kurais izeg fu kuros ijia guamevo una urinma na vuak ijesugin abe kuardiav. Ijefuon maiji vuak ijar fuka darokin. Regavo na una emabuon vierafe abe kuardiakva vuak iji fu daro bado fuba e roin karauniak.
Godon vierafe mukor ijiga daro fuon ijin
18 Ijefuon maiji e iji ba ma vierafejo iji bu unam ise ar mian naino ijia vako iji bu vuak ma iji buba ma vierafen. Bu vuak ma iji God fu Jesu kuama fu arime kuros ijia guainma iji buimve dab ise igeg vierafej. Regavo e iji eraneb no ma vierafeko fu karaunuomo iji non vierafega Godon vuak ma iji fuka ma darokin ijefuon fu vuak ijar e karauniakfuon. 19 Ijefuon maiji vuak besum iji bun buk akai bu usuibe isoinva ijia God fu ijeg kuai,
Nar e iji mukorigia vierafejo ijiebuon vierafe iji nar kam iserediak. Regavo nar e iji bu ire kafokafo mukoi vierafejo ijiebuon vierafe iji naka mukoi bijukuriakno kuain.
20 Ijefuon maiji e ijeg vierafejo iji Godri giamoni vierafe buon ma iji bu vierafejo iji fuka buzer. Regavo madu e iji akai mukoi samuavo ijigam e iji bu una e kafobuon vierafe iji kam karoiga bu una unam be ijia jajiavo e ijekin iji bun Godon unam maiji bun areme una unam ise ijia vak. Bu ire ijegreoijo ijefuon God fu vierafega vierafe buon mukor ijigam vuak buon ma bu kuaivo iji fuka buzer.
21 Ijefuon God fu fuon vierafenma ijia fu e iji bu buon bu mukoi vierafejo ijia God gakuai giriesavo ijiebuon vierafe iji fuka mukorigia bijukuriain. Fu ijegrediagavo una e iji bu vuak fuon ma iji ma vierafejo iji fu karauniam. Regavo vuak iji e bu abe ma vierafejo iji e moik igekor bu vierafero fu isero bu ijeg vierafej. 22 E Jius iji bu vuak ma iji bu dab ise igeg vierafen ijefuon maiji tavan bog bu vierafe buka unam sumakin kafo ni buon ijia giakuai vierafen. Regavo e Jius bakin iji bu e iji vuak ma vierafene kuaivo ijiebuon vuak iji faikuai nisaidiav. 23 Regavo noiji no vuak iji no abe e kuardiavo iji no kia, Kurais kuros ijia fu guainma iji fu no aferduome una Godon unam ma ijia unuinmano kiav. Regavo e Jius bu vuak iji faiga buka isediagame buka ziev. Regavo e Jius bakin iji bu vuak iji faiva bu vierafero vuak iji fu irerag ma be rekma baro bu ijeg vierafen. 24 Regavo una e Jius ijiga e Jius bakin iji eraneb bu God fu vek ijia kumene karauniainma iji ni buon iji fun Godri ke samafrediain. Ijefuon bun mukorigia game vierafega Kurais iji fu Godon daro ka ikin iji bu karauniakfuon ijiro bu ijeg vierafen. Revo madu bu vierafero God fu irerag fok fu rekafa vierafeno iji fuka mukorigia fine vierafeknum renro bu ijeg vierafen. 25 Ijefuon God irerag fu rekafa vierafeno iji e bu kuai fuka iseno kuaivo iji fuka mukor. Godon vierafe ijar emabuon irerag mukoi bu rekuai vierafenva iji fuka asidiain. Regavo Godon vierafe maiji fu vierafene Kurais kuama fu kuros ijia guainma iji e bu vierafekuai fu daro bano kuain revo ire ijar fuka ma darokin. Ire iji God fu renma ijar ema irerag bu vierafene rejo iji fuka ma asidiain.
26 Regavo kaifnun nin izeg ur ja oijga God fu kumena ja una e fuon renva iji vierafef. Tavan ijia e sibank roin ja e iji bu moikigia vuak mukoi vierafejo iji no kuaivo ijeg jak ja mukoi vierafej. Regavo madu e sibank roin jak jaka daro mamkanuk kege e roin samuagdiav. Regavo madu e sibank roin iji ja e ikin ijiebuon agan ijia nafene samuagdiain. 27 Regavo God e iji fu kumega bu efuon rejo iji fu e iji e moik igeko bu vierafekuai bu e iseno kuaivo fu ijin ken. Fu ijeg kekin e iji bu moikigia koikbuon vierafero bu vierafe buon ijia bun aresrevaro bu ijeg vierafek. Regavo bu una buon ganamime vierafega vierafe buon mukor iji fuka ma baga bu juk. Regavo madu e kafo God fu kege efuon reno iji fu e iji e moik igeko bu giame vierafero bu e zazaikinro bu ijeg vierafejo fu e ijin ken. Ijefuon maiji fu ijegrega e darokin iji bu moikigia karinva iji bu una buon ganamime vierafero daro buon fuka ma buzero bu ijeg vierafene juk. Ijefuon maiji vuak buon iji e bu faivo iji bu izeg e roin ifejdiaga bu God ma vierafekva bakin. 28 Regavo madu God fuba e iji bu e mamkanuk ijiebuon ar ijia nafediainva ijin ken. Regavo fu e iji e moik igeko bu nese giame kuai bu ire kafo vierafejo bano kuaivo fu ijin ken. God fu e ijekin iji kenma ijefuon maiji eraneb bu iviakma vierafe bu moik igia e mamkanuk renva iji rad God fu e iji fuka magiak. 29 Fu e ijekin ijin kenma ijefuon maiji fu vierafero fu bu kenki buba uri buon aroikaraknum kuai, No koiknuvuon nigen nuvuon no mukoi vierafejo ijia no God gainvano kuaik.
30 Regavo fun irerag God fu joifuon renma ijia jan iviakma una Jesu Kuraisna agan besum ren. Regavo Godon vierafe ma iji fu vierafenma iji fu Kuraison duadok ijia abe ik ren. Regavo vierafe fuon ma iji fu ijeg. Kurais kuros ijia fu guainma ijia fuka unam iji abe mukorigia amarduinma ijefuon God fu no aferduome una unam fuon ma ijia unuom. Fu vierafe noka Godon e akai rene karikro fuka tavan bog giriesam. Regavo fun ire ise iji no reoijo ijia turamduome aferduido fu rad e ise rejo iji kege vajai fian vajiakro roko ijia fu no karaunuok. 31 Regavo God fu ire iji renma ijefuodo e be fu oine vuak kuaikma fu E Bomana irerag fu renma ijesugin kuaime aroikarakfuon. Ijefuon iviakma no vierafe vuak irerag bu usuibe Godon buk ijia isoime kuainva iji fu ma kuain. Regavo vuak iji bu ijeg isoime kuai,
Erar fu aroikarakro vierafekma ni irerag E Bomana fu renma ijesugin kuaime aroikaramne kuain.