2 TESARONIENS
2 Tesaronienson Vuak Amur
Regavo For fu madu vek Korint ijia fino ijia fu una fas be isoime e ma vierafejo Tesaronaika karinva iji nijiain. Regavo e Tesaronaikako roin bu Jesu fu una rokon ijefuon vuak iji faime buka nuanamin. Ijefuon bu kuai Jesu fun amur ruainma ijefuon ire kafo buba rek revo bum ijia kariokno kuain. Ijefuon fas igi For fu isoime nijaidia kia, Ur e iji Jesuk nigaraimoino iji fu kekome e fok biesiaga bu una ise reok. Regavo rad Jesu E Bomana iji fu una roko ijia e fok ise reoijo iji fu kege arafiriakfuon. Regavo madu For fu uri ejafiame kia bu una dasume unam ma ijia karikin bu una ik ma iji reoknum unam ma iji kegofno kiain.
2 Tesaronienson vuak kafokafo For fu isoinma ijin
1:1-2 For fu anadiainma ijin.
1:3-12 Bu vajai fian abej vo bu adumaduigin karioinva ijiga e ise iji bu vajai fian abekfuon ijin.
2:1-12 E iji Godk nigaraimoino ijefuon vuak iji nijaidiainva ijin.
2:13-16 Vuak soisoigin kuardiaga bu daro mene una giriesa ma vierafekfuon ijin.
3:1-15 For fu vuak soisoime kuardiaga buba uzagavo bu nuibakin ikrekfuon ijin.
3:16-18 Foron vuak rad fu kuardiainma ijin.
1
For fas be iji fu isoime e Tesaronaikako nijiainma ijin
1 Fas igi For nar e Sairas ko Timotina besum isoime e uruvana ja sos Tesaronaika ijia besum afuime God aroivo iji nijiav. Regavo jaiji jan God Asoinuvuon ga E Bomana Jesu Kuraisbuon e ren. 2 Ijefuon na God Asoinuvuon ijiga E Bomana Jesu Kurais buon sirimamek. Na sirimamene kiaga bu tavan bog ma rediame mukorigia samuagdiaga ja afuime kariokfuon.
God fu Kurais fu uria rokon ijia fu fine e fok igiebuon ise iji giakfuon ijin
3 Efnun iji fuka mardo noka joifuon tavan bog Godon oimarek. Ijefuon maiji jon izeg ja Kurais ma vierafejo iji fuka gigikin ren. Regavo madu izeg e besubesum ja una kaifjon roin oijmiavo iji madu fuka ma bomana ren. 4 Jan ijegrejo ijefuon no Godon ar kafo bu afuivo ijia arume aroikaraknum if jon kege ajiev. No unam izeg ja ise kafokafo biediako bu ja kam vajai fian vajiaga ja vajai fian abejo iji jaka vek giriesame ma vierafejo ijefuon no joisina kuaiv.
5 No iji ja vajai fian abejo iji giame vierafe God fuka ma ijefuon tavan rad fu no kege mazim guok. Ijefuon maiji God fu unam izeg ja vajai fian abejo ijia giame uri unam jon kanafum. Ijefuon jaka samuaikin ja e iji God fu oibuon iji samuagdiamo ijiena mazikfuon. 6 Regavo madu God fu ma ijefuon fu ijegrejknum vo una eraneb bu ja kam arafiriaga ja vajai fian abejo ijin kanafume arir uniaido tavan rad fu bu kam vajai fian vajiak. 7 Regavo iviakma igi ja vajai fian abejo iji God fu rad ja abevo no abe besum karaunuoga no vajai fian bakin karik. Regavo ijeg fu rekfuon iji fu tavan iji E Bomana Jesu Kurais fu anera fuon darokin ijiena besum varur gufia ari roko ijia fu ijeg rek. 8 Regavo tavan iji Jesu fu una ari roko ijia fuka mian ma bomana ijia naine kavuaike fu iji guf ijia ari ruak. Regavo mian iji naine kavuaima iji fu e iji buba God ma vierafenva ijiga vuak ma iji bu E Bomana nuvuon Jesusina kuardiainva iji ba igiainva iji kam vajai fian vajiak. 9 Regavo tavan iji ruakma e iji bu ijegreoijo iji buba una E Bomana ijefuon uikinik iji gak. Regavo madu bu fuon ma iji darokin iji fu e izekin iji buba una giak. Regavo fuka bu kam arafiriaga buka tavan bog vajai fian abejknum karivak. 10 Regavo tavan sumakin be fu irasega Jesu fu una rokon ijia efuon fok eraneb bu fu ma vierafenva iji bu fuon sanainma ma iji game abe aroiknum aroifirik. Regavo jak ja e ijiebuon guf ijia ireme E Bomana nuvuon iji abe aroikfuon ijefuon maiji jaka vuak iji no abe ja kuardiainva iji jan abe ma vierafen.
11 Regavo noka vek joifuon sirimamene God kuavo iji no vierafe fu ja ifejdiaga ja una uri unam ma iji fu vierafe ja izeg karivakafa fu kiainma ja ijia karivak. Regavo no madu God kuaga fu daro fuon ijia ja dasumdia vo unam amardiaga ja ire ma kafo rekuai vierafenva iji ja rek. Regavo madu ja Kurais ma vierafejo ijefuon ja ire ma kafo ja ma vierafene revako iji jaka mukorigia rene buin gafia barga fu aresrekfuon. 12 No ijeg joifuon sirimamek. Ijefuon maiji no vierafe ja irerag fok ja rejo ijia e bu giame una E Bomana nuvuon Jesu Kuraison if ma iji abe ajievknum vo if jon kege kaf ijia ajiek. Ijefuon maiji God nuvuon ijiga E Bomana nuvuon Jesu Kurais bu tavan bog ja ma rediame samuagdiavo ijefuon bu ijeg rek.