GARESIENS
Garesienson Vuak Amur
Ai Garesia ijia e ma vierafejo roin bu ijia afuim karijo ijefuon For fu fas igi isoime bu nijian. Regavo For fu koikfuon amur aferdiame va ai kafokafo Garesia guf ijia Jesuon vuak ma iji abe ijia kuardiainma ijefuon e roin bun oi karoime Jesu ma vierafen. E iji ma vierafejo Garesia ijia karijo iji bu e ni kafokafo gavo For fu ijia vuak kuardiame kia, Jon ja ma vierafejo ijar ifejdiaga God fu ja kege unam ma ijia uniakno kiain. Regavo rad e Jius roin bu ro useme For vuak iji fu nijaidiamo iji dab buzeime kuai fuka ma ijefuon e iji ma vierafejo iji buka Mosison akaij iji igiame Godon nifak ijia e ma rek. Regavo bu madu akai be bu vajai surif kania ufukno kuainva ijefuon dab kuaime sigunamin. For fu vuak iji e ma vierafejo iji bu nijaidiavo iji faima fuka deajin. Ijefuon fu kuai, No akaij iji igiavo ijia no e ma rekva Kurais fu guainma ijiga ise nuvuon fu guome arenma iji buim ire ukakna gavo ma iji fu bano kuain. Regavo buk igia For fu e Garesiako iji buisina vuak gigikin kafo kuain. For fu vierafe e ma vierafejo iji buka e iji vuak kufui nijaidiaoijo iji nuigafiame una Jesuon unam ma ijia ruakafa fu iji vierafen.
Garesienson vuak kafokafo For fu isoinma ijin
1:1-10 For fu anadiainma ijiga vuak ma iji ijefuon fu vierafenma ijin.
1:11–2:21 For fu afasor renma fu ijefuon kuainma ijin.
3:1–4:31 No Mosison akaij iji igiaga God fu no kega no e marekva bakin. Gavo no ma vierafekva God fu ijia no kega no e ma rek.
5:1–6:10 Aferdiame Kuraison unam ma iji fu no samuagduomo ijia no karaunuinma ijefuon noka unam ma iji Kaven Akai fu vierafeno ijia keok.
6:11-18 For fu vuak ka ma ikin fuon fu kuainma iji kege nijaidiaknum anadiainma ijin.
1
1 Na afasor For e iji Jesu Kuraison daro abene vuak fuon kuaimoijo iji nar fas igi isoime ja nijiav. Na emab kienva bakin gavo bu God Asoij ijiga Jesu Kurais e iji fu guamga Godri keunama fu una urinma ijieb kiega na vuak ma iji kuardiav. 2 Na uviaifnun Jesu ma vierafejo igia karinva ijiena besum e iji ja God ma vierafejo sos fok moik Garesia guf ijia karinva iji anadiav. 3 Na vierafe God Asoinuvuon ijiga E Bomana Jesu Kurais bu tavan bog ja mardiaknum vo mukorigia samuagdiaga ja afuime kariokfuon. 4 Kurais fu ise iji moikigi no karijo igia naoivo ijia karaunuokafa ruain. Fuka God igame fu vierafenma iji rene ise nuvuon fi koreduokafa guain. 5 Regavo no Godon oimarknum fu abe aroivo iji noba arekfuon gavo fu tavan bog ijia navak.
Godon vuak ma iji fu besum ijesugin
6 Na vuak jon faiva naka bomana oiserdien! Ijefuon maiji tavan ivuankbe ijia jan God e iji fu Kuraison azan ijia ja kumene aferdia sanainma fuon ma iji fum efkin miainma ijia uniainma iji jan uzav. Regavo ja una vuak sumakin be ka ma bakin iji faiv. 7 Regavo naka ma kuardiav Godon vuak ma be ijia fuka bakin. Na ijeg kuardiavo ijefuon maiji e kafo bu Kuraison vuak ma iji abe dakaroime kuardiame oijon kam karoiga ja nonamiv. 8 Regavo varur gufefuon anera ijieb vo nor vuak nibe iji abe nijaidiakva na vierafe God fu e ijekin iji aferdiame mian iji naine udarmo bakin ijia uniaga bu arafiriak. 9 Na usuibe nan kuardiain revo na iviakma una madu kuardiav. E binob vuak igi ja faime abenva ijefkin bakin gavo bu vuak nibe iji kuardiavgakva na vierafe e iji bu mian iji naine udarmo bakin ijia naoik. 10 Regavo vuak igi na kuaivo iji na ema ijieb oimardiakfuon na kuaivo bakin gavo na God fu oimaikfuon ijin kuaiv. Regavo na ema ijieb gieko na kuaivgakva iji na Jesuon ikrejo bakin.
God fu izeg For kumenma ijin
11 Uviaifnun vuak ma igi na abe kuardiavo iji fu ema ijiebuon vuak bano mukorigia faif! 12 Regavo vuak iji fu emabuon ruainma bakin gavo fu Jesu Kuraisri abe nijaidien.
13 Na e Jiusbuon unam bu guriguri rejo ijia izeg na buna finva iji bun kuardiava jan fain. Regavo izeg na oifian bakin Godon e iji kam giriesame uruvana vajai fian abeknum ke mimatame arafiriakrejo jan fain. 14 Regavo e Jiusbuon sos ijia unam izeg bu guriguri rejo ijia kaifnun nana besum ofrenva iji nar asidiain. Na saifnuvuon ijiebuon unam ijia naka kaifnun iji asidiame giriesa ren.
15 Regavo God fuon ma rediamo ijiga oijmiamo ijia na buba nafedienva ijia fu vierafe na fuifuon ikrekro fu kumen. 16-17 Tavan iji God fu vierafenma ijia fu Farifuon abe na nijaidieme vo fur oinun abe dakaroime daro miemga na Jesuon vuak ma iji abe e Jius bakin iji kuardiakafie vain. Regavo na Jesu fu izeg oinun abe dakaroinma iji naba e be kuardain. Regavo irerag na rekfuon iji naba e afasor roin bu ur Godon vuak abe kuaimoijo ai Jerusarem ijia karinva iji kuardiakafie vain. Regavo iji na arega na migegare ai Arebia vakga Jesu fu fuon ma rediamo iji abe madu nijaidiemga na una ai Damaskas vain. 18 Regavo God fu ur Farifuon abe na nijaidiekoga rad juaivasia nokbek (3) barko nason ijia Jerusarem e afasor Fita game vuak fuon kafo faikafie va vuik nokarok (2) ijia fin. 19 E afasor kafo Godon ikrejo iji roin naba giain revo na e besum Jeims Jesuon uviaij iji na gain. 20 Regavo irerag na iviakma isoivo iji God fu vierafe na kufuimejo bakin gavo naka vuak ma ijin isoiv.
21 Rega rad na ai nokarok (2) Siria ko Sirisia guf ijia Godon vuak ijin kuardiakafie vain. 22 Tavan ijia e Kurais ma vierafejo roin ai Judia sos ijia karinva iji buba na ma vierafen ijefuon maiji naba sos buon ijia Godon vuak nijaidiain. 23 Regavo bun e kafob kuardiainva bu fai e iji fu ur mimatame no kege arafiruinma iji aferdiame iviakma una Godon vuak ma iji e fok nijaidiam. Regavo ur fu e fok no God ma vierafenva iji fu kege vajai fian vajuokro reoinmano kuain. 24 Regavo bun vuak iji God fu nun renma iji faime bomana nuifuon una Godon oimaren.