REVARESON
Revaresonon Vuak amur
Jesu fu guame una varur gufia vako juaivasia siksti faiv (65) ijeg barko rad Jon fu vuak igi isoin. Regavo tavan iji fu isoinma ijia e iji Jesu javo iji bu Romkobuon Gaman ijieb bu kam unam gigikin ijia samuagdiain. Ijefuon fu vierafe e iji buka giriesame Jesu ma vierafekro fu ijefuon vuak igi isoin. No Jesuon ikreoijo ijia God fu e ani fuon ga Setan iji fu asidiame efuon ifejdia ar ma iji abe miak.
Jonon vuak kafokafo fu isoinma ijin
1:1-8 Jon fu E Bomana ijefuon if ijia e fok anadiame vuak fuon kuardiainma ijin.
1:9–3:22 Jon fu nimamaime E Bomana iji gama E Bomana iji fu uri sos seven (7) ijiebuon kuardamga Jon fu uri kuainma ijin.
4:1–8:1 Jon fu nimamaime gako E Bomana iji fu uri buk bomana anugin iji irame ire kafo moikigia rekfuon iji ga afikin ga vajai fian kafokafo igi moikigia rekfuon iji nijainma ijin.
8:2–11:19 Regavo Jon fu madu giako anera seven (7) ijieb veg kam foikoga ire ni kafokafo ijia reja fu iji giame kuainma ijin.
12:1–13:8 Setan ga e vuak fuon abe oijo nokarok (2) fanuf ijiebuon surif iji kam same moikigia arinva ijin.
14:1–15:8 Jon fu ire ni kafokafo nimamaime giainma ijin.
16:1-21 Jon fu nimamaime gak anera ijieb tin mamkanuk seven (7) kam useva fu giame isoinma ijin.
17:1–20:10 Godri Bebiron dab tuaseme vo kukum Setan kunaim mian barokfuon ijin.
20:11-15 Tavan iji God fu ise nuvuon ke mazim guokfuon ijin.
21:1–22:5 Jon ai varur iviamkor ijiga moik iviamkor ijiga God ar iviamkor fu amarenma ijiga Jerusarem iviamkor iji Jon fu nimamai giame kuainma ijin.
22:6-21 Jesu fu una ruakfuon ijin.
1
Buk igi God fu ire iji fu iviakma igem rekfuon iji fu abe Jesu Kurais nijaimga fu abe e iji bu fu igame fuifuon ikrejo iji nijaidiainma ijin. Jesu fu anera fuon iji kuamga fu ari e fuifuon ikreno e Jon ire iji nijain. Regavo Jon fu Godon vuak ma ijiga Jesu Kurais ire iji fu nijaimga fu giainma iji abe e fok kuardiain. E iji erar fu irerag fu rad rekreno iji mukoi dame faimo iji fuka oimarkfuon. Regavo madu erar fu vuak iji bu isoinva iji faime abe oifuon ijia abedeme igamo iji fuk fuka oimarkfuon. Ijefuon maiji tavan iji fun samairedo ire fok fu rekfuon.
Jon fu e Jesu ma vierafejo iji bu sos seven (7) ijia afuivo iji anadiainma ijin
Jon nar vuak igi isoime e Jesu ma vierafejo bu besum afuim sirimamejo mai seven (7) ai Esia guf ijia karijo iji nijiav. Regavo na sirimamega God e iji fu usuibe ijia fine ruainma ijiga madu vek fino ga rad ruakreno iji fu tavan bog ja ma rediame mukorigia ifejdiame samuagdiaga ja afuime kariokfuon. Regavo madu na vierafe Kaven Akaij iji Godon fata ma iji nifak ijia ik seven (7) rejo iji fuk ijeg ja samuagdiakfuon. Regavo na sirimamega Jesu Kurais e iji fu nuibakin rene Godon vuak ma iji abe ruainma iji fuk ja mardiame ifejdiakfuon. Fur amur guame una uri E Bomana rene moik igefuon e mamkanuk fok samuagdia fin. Jesu Kurais fu no oijmuomo ijefuon fu guame kavuan fuon useme ise iji fu no anu kunuinma ijia somduome baren. Fu somduome no kege e sos samuavo iji reduido no funa efuon samuaknum God asoifuon ijefuon ikrek. No if fuon abe ajieme aroiknum sirimamega fu tavan bog daro fuon ijia no samuagduome vak. Fun mare!
Regavo e fok bu ni buon ijia fu vana ijia burame ari roga bu gakfuon. E iji bu juaf abe fu bijainva iji buk bu fu gak. Regavo e ar iror igia karioinva fok bu fu game dab niraifirik. Regavo ire iji fuba masirek revo fu tavan rad rek. Mare. God E Bomana iji fu ijeg kuai, Nar God amur ijia anerene ruain vo nar tavan radkma ijia re barek. Na E Bomana darokin amur ijia fine ruain revo iviakma ijia vek fij vo tavan rad nar ruak.
Jon fu nimamaime Kurais gainma ijin
No Jesuon if ijia no agan besum renva ijefuon naiji uviaijon. No makai fuon ijia javo ijefuon no vajai fian abej. Regavo no adumaduigin tavan iji Kurais fu una moikigi samuakfuon no iji samuav. Bu na aferdieme do uf moik daturaik namo bu kuai Fatmos kuavo ijia unien. Ijefuon maiji na Godon vuak ijiga vuak ma iji Jesu Kurais fu nijaidiainma iji nijaidiavga bu aferdieme ijia unien. 10 Na e Bomana ijefuon tavan ijia Godon Kaven ijar na nirokdien. Fu na nirokdiema na nuon nun ijia fai vuak be uruvana veg ijeg foin. 11 Na fai fu ijeg na kuardien, Irerag fok a giamo iji buk ijia isoimne kien. A isoime abe e God ma vierafejo ar mai seven (7) karinva iji nijiamne. Ar mai if buon iji Efisis ga Smairna ga Fegamam ga Taiataira ga Sadis ga Firaderfia ga Reodisia iji nijiamne.
12 Fu ijeg kuardiemga na vuak iji erar kuardiemo na iji gakafie dakaroin. Na dakaroim ga ire in jaoijmana gord ijia amardiainva rait kuivo iji seven (7) ijieb ar buon ijia iren. 13 Regavo rait iji ireme sanavo ijiebuon kafar ijia ire be e igekin ijar ijia manin. Regavo e iji fu ugon jaor iji abesen revo oi garin ijia fu ire biret gord ijia amarenva zin igeg iramo iji jafain. 14 Regavo e ijefuon nigen jau iji buka ma abarme ire vana abaikin ijekin. Regavo niom fuon iji fuka ire mian mareg igeg nain. 15 Regavo dia tat fuon iji fuka ma abarme ire gord zin igeg iramo igekin ga vuak fuon fu kuaimon iji fu do igeg abesme kumen. 16 Regavo ij fuon maink ijia fu ire mujur seven (7) kuniain. Revo ir fuon ijia kaki ka ma uikin roinroin rinva ijar ijia kekoin. Regavo uikinik fuon iji fuka saname ire veni iji fu uk manine kekomo ijeg sanain. 17 Na fu game tua fu manino diak ijia dijeme ka e guainma igeg ijia nain. Regavo fu ij fuon maink ijia akozme nigen nun ijia abedeme kie, Ab juk naiji na ik anej ijin ga radkma ijino kien. 18 Fu ijeg kieme vo fu madu kie, Naiji na e iji tavan bog ijia fivako ijin revo na ur kuros ijia guain gavo nan una uri ijia fivak. Regavo na aoivo ijiga ar iji bu aoime va karijo iji na daro nun ijia bu samuagdiavno kien.
19 Iviakma irerag a giainma ijiga irerag iji bu tavan rad rekfuon iji a giainma iji isoi. 20 Regavo ire mujur seven (7) ij maink nun ijia irenva ijiga ire in jaor seven (7) gord ijia amardiame rait kuivo ijefuon maiji igin. Ire in jaor gord ijia amardiainva rait kuivo ijefuon maiji sos seven (7) ijin. Regavo mujur seven (7) ijefuon ma iji kaven ma iji sos samuavo ijin.