Pol Ina Giruma
Kolosei
Damsi Kurisi
(Colossians)
Vonaviakova
Kolosei kwanatuna na Eisiya Maina kamonai ma kwanatu sago ke ita rabaraba, tuna na Epesas. Pol ke ita nae ku Kolosei ma Epesas kamonai ina bigabiga ivonatawesi inae da Kolosei kamonai idima. Tuna kubiine inotanotai da vitumaghana damsi Kolosei kamonai na ina rewapana gaburinai ma weni girumina igiruma kurisi. Pol sisiya ivi yanei da vibeyebeyena vibero wawayisi Kolosei kamonai ivomiiri da vitumaghana damsi ivonavonesi da iyavo kava God akovina ma yawasa makamakii nonowina ina vii yavui na kanukanuma i babada ma i kiikiivavo kurisi ita vokavakavara. Ma ivonavonesi da ku tepana kiki berasi viya nakanani ma tuvivirataweyana na ita nunuri ma bade sisiya bagibagisi ivereveresi da aviyavisina ke ita kani ma ikikava ita makai.
Pol weni berasi varana ivi yanei na igiruma da iyavo kava vibeyebeyena vibero wawayisi ikivikivinisi na iyeghisi ma Keresiyana ketana vaghata ivi sisiyei da ita terevimaninisi. Nota ghamana ina giruma kamonai na Yesu Keriso kovokovoghina da ini yawasita ma ke sago aviyavisina ku tepana taberai da yawasa tapanani. Ma vibeyebeyena vibero wawayisi vitumaghana ma bera bogii ma bogiiyai isisiyei na wawaya inuwatinisi da i vitumaghana Yesu Keriso kurina na nuwatuwai ina momowa. Pol igiruma da Keriso tepanai God dobu iyamoni, ma bade Keriso tepanai aviyavisina peyarina dobuwai God ikawakiikiiyei na ina tinariyariyesi da ini rapena meyesi. Keta sago kava da wawaya dobuwai yawasa ina panani, tuna na Keriso yavata ini nuwasago. Muriyai iyavo kava Keriso yavata inuwasago na Pol ibeyebeyesi da vitumaghana yawasina vaghata kamonai na ikikava ita makai.
Weni girumina kamonai takitai da Pol tomowa kana vava Taikikas ivi yonei da ina giruma pepana ikavaraneyei Kolosei damsi kurisi. Ma tomowa sago ivi kaeturanei na Onesimas. Ma tuna wawayina kubiine Pol igiruma ina bada Pirimon kurina. Nani girumina kana vava Pirimon.
Pol ina nota weni nakanani irereghi.
Sapta 1:1-8 Giruma ivotawei.
Sapta 1:9 da ku 2:19 Keriso ina yawasa ma ina biga.
Sapta 2:20 da ku 4:6 Yawasa vuna Keriso tepanai.
Sapta 4:7-18 Vikiikiiwa ma giruma igudui.
1
Taku Pol, varesita Timoti yavata kagirugiruma. God ina kayowanai ivineku da taku Yesu Keriso* Keriso: Grik damsi gamosi evonavona bo ‘Keriso’ ma Hibru damsi gamosi evonavona bo ‘Mesaya.’ Ivi ruwa iyamna ‘God ina Vivinevine Wawayina.’ ina aposol.
Tami iyavo kava Kolosei kamonai Keriso yavata koinuwasago ma koipatutu da wawaya vovokaravimi na ita Mamai God kurina ainowi da agabiibai ma nuwanuba ina veremi.
Vikiikiiwa ma nipowana.
Maranai kaniponipowana, kamonai na mara nonowa God kaikiikiiwei kubiimi, tuna ita Bada Yesu Keriso ina Mamai. Kaikiikiiwei, iyamna kavi yanei da ami vitumaghana irakata Yesu Keriso kurina ma bade ami nuwaviina irakata God ina wawaya kurisi. Koitumaghana ma koinuwaviina, iyamna nota rewapana gwabimiyai da aviyavisina biibiina kunumai God ivovunagha kubiimi na mara sago kona viiya. Varana biibiina ina vonavaghata namada kovi yanei na tuna nani nota rewapanina iveremi. Tuna God ina agabiibai akovina ivi debei kurimi ma patana da varana kamomiyai erakarakata ma amena etereterei. Ma ikikava itupuwa kurimi na nakanani dobu ku kudubina kamonai etuputupuwa. Epapiras kavonatawei da kubiikai Keriso varana biibiina ivi debei kurimi. Tuna na Keriso ina bigabiga maninina ma patupatutuna, yavata kabiga patapata ma kavi nuwaviinavivirana.* Kol 4:12; Prm 23 Ma tuna ivonekai da ikikava Kanuma Vovokaravina iberimi da God ina wawaya yavata koinuwaviinavivirana.
Tuna kubiine sisiyimi kavi yanei na nipowana kavi karei da mara nonowa kubiimi kaniponipowana. Ma God kurina kainowi da kanuma ina ku nevaneva nuwagiura ma akova kudubina ina veremi da ina kayowana konakova bubuni ma kona votekatekei. 10 Nakanani kaniponipowana da Bada ina kayowanai kona makai ma aviyavisina kudubina kona beraberai na ini nuwabiibiiyei. Bera biibiisi mara nonowa kona beraberai na tami nakanani ma kii biibiina, iuwa da amena peyarina. Ma bade kainowi da God akovina gwabimiyai ina rakata. 11 Ma ina rewapana kadakadarina ini damani kurimi da ami nota ini rewapana ma ami nuwapoya kamonai na ere nuwanubami kona miirikikina. 12 Ma nuwabiibiiyai ita Mamai mara nonowa koni kiikiiwei. Ivi vaghinei da tami na ina wawaya vovokaravisi kamosiyai ma aviyavisina ina veresi na tami bade kami reregha ina veremi, maranai ina ku vikiivavona yaseganina tarui. 13 Nubakutuva ina rewapana kamonai ivi yawasita ma irutinita da nubakutuva takiibutawei. Ma Natuna, tuna nuwanuwana, ina vikiivavona ku kamona itereta. 14 God iberai da Natuna tepanai igimarataweta, ma ita berabero kudubina inotatawei.* Epe 1:7
Keriso ma ina biga.
15 Keriso na God maghimaghighina. Ke kovokovoghina da God takitai ma kegha da wawaya Keriso ikitai ma tuna ivi debei kurita da God na ikikava. Keriso na iyarokona ma bera kudubina ibadei, iyamna tuna namada imakamakai ma muriyai da God bera kudubina iyamoni. 16 Ma aviyavisina kudubina kunumai ma dobuwai iyamoyamoni na Keriso tepanai iyamoni. Aviyavisina takitakitai ma ke kata kitakitai ma nani kamonai na kanuma ma rewapana biibiisi ma beroberosi kunumai ma dobuwai i kiikiivavo ma i babada peyarisi na kudubina iyamonisi da Keriso rapenai. 17 Tuna namada imakamakai ma muriyai da bera kudubina itupuwa. Ma ina rewapanai da aviyavisina kudubina patana da yawayawana emakamakai ma ke ita wapawapa. 18 Ma Keriso na gayamina ma ekalesiya na tupuwina. Ma tuna na iyarokona, ivi nao da rabobowai ivomiiri na keta ivotawei da tota bade rabobowai tavomiiri. Tuna kubiine Keriso ighe kirakai da bera kudubina ighekuyowei.* Epe 1:22-23 19 God tuna mani ina kayowanai ina rewapana ma ina bera kudubina ivi damani Natuna kurina da ivi ruwa na sago. 20 Ma God Natuna tepanai na bera kudubina dobuwai ma kunumai iviini ivovira kurina, iyamna God yavata tavivi makiiberowana ma Natuna korosiyai irabobo da taranai keta ivotawei da ere nuwanubata God yavata tamakai bubuna.* Epe 2:16
21 Rorova na ami bera ma ami nota beroberosi kubiine God yavata kovi ghavighaviyana na kovi bogebogemi. 22 Ma wekarakava na God iviinimi da kovi sagomi da tami na turaturana, iyamna Natuna ivi wawayota ma irabobo na iberimi da God ku matana tami vovokaravimi, maninimi ma berabero gwabimiyai kegha. 23 Ma kokitaruvimi da ami vitumaghana kovokikini da bagibagina. Keriso varana biibiina kovi yanei na tuna tepanai komiirikikina ma ke kona voterei da sisiya vibero koni tumaghanei. Weni varana biibiina na wawaya idima da dobu kudubina ivi yanei. Ma God ivineku da tuna varana kubiine abigabiga.
Pol ina biga Keresiyana kamosiyai.
24 Ma wekarakava na ainuwabiibai da tami kubiimi gabura kamonai avovokwarakwara. God ivineku da ikikava Keriso ivi kamaghiyei nakanani aku biga kamonai ati kamaghiyei da biga ati kovini vitumaghana damsi kubiisi, ti na Keriso tupuwina. 25 Ivineku da Keresiyana kubiimi abigabiga, aku biga ivereku da vonana kudubina ana dimei tami kupuna dami kurimi. 26 Rorova na God vonana kamonai nota gavugavusi imakamakai da namadani kava, kimta ma kimta ke itakovi. Ma karako nani notasi na ina wawaya vovokaravita kurita ivi debei. 27 Ivi akovita da ke tokai Jiu damkai kava ma kupuna dami yavata ini biibiinita da kanuma ina ku nevaneva na mura ghamana ma kadakadarina ina vereta. Ma nota gavugavuna na weni, Keriso na kamomiyai irunuma, tuna kubiine koakova bubuni da kana kadara ku kamona kona rui. 28 Tuna kubiine na Keriso kadimadimei wawaya kudubisi kurisi. Nuwagiura na God gwabinai kaviiviiya na tuna tepanai wawaya katereterevimaninisi ma kaibeyebeyesi, iyamna kakayokayowei da Keriso tepanai nota magura ina viiya, ma kana rutinisi da God kurina. 29 Tuna kubiine Keriso tepanai aipaparana da weni bigana ani kovini. Ma ina rewapana ghamana everevereku da aku yawasa kamonai ebigabiga.

*1:1: Keriso: Grik damsi gamosi evonavona bo ‘Keriso’ ma Hibru damsi gamosi evonavona bo ‘Mesaya.’ Ivi ruwa iyamna ‘God ina Vivinevine Wawayina.’

*1:7: Kol 4:12; Prm 23

*1:14: Epe 1:7

*1:18: Epe 1:22-23

*1:20: Epe 2:16