22
God, Abraham irubui.
1 Mara sago God inae Abraham kurina da ita rubui. Ikwatu, ivona bo, “Abraham!”
Ma ivonapotei bo, “Taku weni.”
2 Ma God ivona bo, “Natum tupukeya Aisiki na am nuwaviina ghamana ma kegha da kerutini konae da ku Morai dobuna. Ma koya sago ani beyem na tepanai natum kuna verena, kuna kiivunui ma kuna kapuni da am suwara kuriku.”
3 Mara itom ma maraboiboi nakiyai Abraham ivomiiri ma ina donki ivovunaghi. Ma natuna Aisiki irutini, ina bigabiga ruwa yavata. Keyama ibiga da ruvaruvana suwara kapunina kubiine na ivomiiri da ita nae God gawarina ivonavonei na nake. 4 Ibaba inenae da mara viarobinai Abraham ikitataweyana da gawarina ikitai. 5 Ina bigabiga ivonesi bo, “Donki yavata weni dobunai komakai. Ma taku tomowa kikei yavata kana nae noke da kana vokavakavara ma muriyai kana vovirame kurimi.”
6 Abraham suwara kana keyama bawana iviiya da natuna Aisiki ivi kavari ma tuna na naipi ma kii karakarata ikavari. Ma ivi ruwa ibaba inenae 7 na Aisiki ivona bo, “Mamai?”
Abraham ivona bo, “Natuku, avai?”
Ma Aisiki ivona bo, “Akitai da kii karakarata ma keyama bawana na weni, ma suwara kana sipu na imapatana?”
8 Ma ivona bo, “Natuku, God tuna mani suwara kana sipu ina vokiibuwei.” Ma ivi ruwa ibaba inae.
9 Gawarina God ivonavonei na inekiibau nake ma wakima ivi daburi da suwara kana kema iyamoni ma keyama ikemai. Ikemai ikovi na natuna imana da kaena ikutatana ma ipewai da kema ma keyama tepanai ivi kenai. 10 Vaghina ma, ivororona naipi iviiya da natuna ita gwarivunui. 11 Ma kegha, kunumai Bada ina aneya irukwatu kurina, “Abraham, Abraham!”
Ma Abraham ivonapotei bo, “Taku weni.”
12 Aneyina ivona bo, “Tomowa kikei ke kuna gwariya. Kevoterei, ke sago aviyavisina berona kuna berai kurina. Natum tupukeya ke kuta panikowei, tuna kubiine wekarakava akovi da God kevovokaravei.”
13 Vaghina ma, Abraham itepa da kiikiiruku kamonai sipu tomowina sago ikitai, tonana ikirai ma ivivi paparana. Inae da iviiya ivowai ma natuna epayanina kubiine ikapuni da ina suwara. 14 Ma vaghina, Abraham nani gawarina ivi vavei ‘Bada ivokiibuwei.’ Ma karako weni ku marana wawaya patana da evonavona bo, ‘Bada ina koya tepanai ina vokiibuwei.’
15 Muriyai Bada ina aneya kunumai ivi kwatume Abraham kurina, tuna na mara kana viruwa. 16 Ivona bo, “Natum tupukeya ke kuta panikowei. Weni berana kuberai kubiine na taku mani avakuwai avonavonakiiyapa da 17 ani biibiinim ma ana berai da tupurereghim ina rakata kirakai da ti na nakanani ma gwamegwame kunumai bo gonugonu kikirai. Ma tupurereghim kii ghavighaviya ina ghegavovorisi da i kwanatu ini rapenei. 18 Ma kuvotekateka kubiine na mara sago tupurereghim sago tepanai dam ma dam kudubisi dobuwai ani biibiinisi.”
19 Ma vaghina, Abraham natuna yavata ivovirame ina bigabiga kurisi ma peyarisi inae ku Beyaseba da nani dobunai Abraham imakai.
Nayo tupurereghina.
20 Mara sago Abraham imakamakai na tina kikei Nayo varana ivi yanei da natunatuna tomotomowisi ipeyari kirakai. Nayo kawana Milka ivi tuwa 21 da iyarokona kana vava Usi ma murinai na Busi ma Kemuwel itupuwa (ma Kemuwel imagura na natuna Aram). 22 Ma Kemuwel murinai na Kesedi, Haso, Pildas, Jidilapi ma Betuwel. 23 Ma Betuwel natuna na Rebeka. Vaghina Nayo kawana Milka nakanani ivi tuwa da natunatuna tomotomowisi ivi 8. 24 Ma ku tepana bigabiga wavinena kana vava Reuma, tuna bade ivi tuwa da Nayo natunatuna tomotomowa ruwamaruwa, kii vava Teba, Gayam, Tayas ma Maka.