9
Ma Yesu ivonesi bo, “Vonavaghata avonavonemi da tami viya weni kamonai God ina vikiivavona ere rewapanina ina nekiibau na kona kitai, ma muriyai da kona rabobo.”
Yesu kana kita ivire.
(Mat 17:1-13; Luk 9:28-36)
Mara miikovimasago ikovi na Yesu turaturana Pita, Jemes ma Jon irutinisi ighae koya ghamana ku tepana da ti mani kava imakamakai. Ma maghinosiyai Yesu kana kita ivire.* 2Pit 1:17-18 Ma bade kana gara ivirei da poipoi kirakiina ma vovokeyakeyuna. Wawaya dobuwai ke kovokovoghina kii gara ita kowai da nakanani ita poini. Ma bade ivi aroba ikitakita na peroveta Elaidiya ma Moses inekiibau Yesu kurina da yavata ivivi sisiya. Ma Pita ivona bo, “Bada, ibiibii kirakai da tota weni. Yobe aroba kana vowai, sago tam kubiim, sago Moses, ma sago Elaidiya kubiine.” Pita turaturana yavata iyabumana kirakai, tuna kubiine ke itakovi da aviyavisina ivivi sisiyei.
Ma kwavu inekiibau isovosi ma kwavuna kamonai gamo sago ivona bo, “Wena na natuku, tuna nuwanuwaku. Ina sisiya kovi yana bogai.”* Mat 3:17; Mak 1:11; Luk 3:22 Nani murinai, Pita ma turaturana yaghiyaghinai ikitavirevire da ke sago iyi ita kitai, Yesu ina kina kava.
Ma peyarisi ivomiiri da koyiyai iororu ma Yesu ivonatanisi bo, “Bera kokitai na ke wekarakava wawaya kurisi koni mamatara. Taku Wawaya Natusi ana rabobo ma rabobowai ana vomiiri na murinai koni mamatara.”
10 Tuna kubiine nani berana ikitai na nuwanuwasi kamonai itatani. Ma Yesu ina sisiya da rabobowai ina vomiiri na ti mani kamosiyai kava ivivi tarakiiyana meyesi da tuna na iyamna avai. 11 Ma Yesu kana kivikivina ivi tarakiiyanei bo, “Avi kubiine vonaviyoyovana vibeyebeyena wawayisi evonavona da peroveta Elaidiya ini nao ina pisi ma God ina Vivinevine Wawayina na ini muri?”* Mal 4:5; Mat 11:14
12 Ma ivonapotesi bo, “Vonavaghata da Elaidiya iti nao da bera peyarina ita vovunaghi. Ma kovi nuwanotanota da avi kubiine giruma katamana ivona da Wawaya Natusi ini kamaghi kirakiiyei ma wawaya ina barei. 13 Ma ani akovimi da Elaidiya namada ipisi ma wawaya i kayowanai ivi kayotirana kurina. Ikikava giruma katamana ivona da ita tupuwa kurina na nakanani itupuwa.”* Yesu ivivi miiba da Jon Babataito na Elaidiya nakanani. Ma Kiivavo Herodi namada ivi kayotirana da Jon iwana ikiiyaraghi da ivi raboboi.
Yesu kanuma berona tomowa kikei gwabinai ikwavini.
(Mat 17:14-21; Luk 9:37-43)
14 Yesu ma turaturana ivi aroba ivovovira kana kivikivina peyarisi kurisi na ikitai da koroto ghamana imiirigwagwarisi. Ma ikitai da vonaviyoyovana vibeyebeyena wawayisi yavata ivivi gamowana. 15 Peyarisi Yesu ikitai da ipipisi na ivi deyei. Ma iverupotei da ivi kiikiiwei. 16 Ma ivi tarakiiyanesi bo, “Avi koigamowanei?”
17 Ma tomowa sago koroto kamonai ivonapotei bo, “Bada, natuku arutinapiyei kurim, iyamna kanuma berona gwabinai irunuma da ke ita vivisisiya. 18 Maranai natuku evowavowai na eparoparoro, kawapuropurona ekiikiibau ma okena itarakikitei. Ma muriyai tupuwina epatopatokiiyana. Kam kivikivina avi nowi kurisi da ita kwavini na ibera kavai.”
19 Ma Yesu ivona bo, “O, tami weni kimtina na ami vitumaghana kegha. Mara iguri ghagha yavata tamakamakai ma patana da ke kota vivitumaghana. Karakava da koinibariku. Vaghina, tomowa kikei korutinapiyei.”
20 Irutinapiyei kurina na kanuma berona Yesu ikitai ma iberai da tomowa kikei iparoro, ipeku ku tano ma ivivi kiivirevirei ma kawapuropurona ikiikiibau. 21 Ma Yesu tomowa kikei ina mamai ivi tarakiiyanei bo, “Mara avai weni gubagina gwabinai ivi karei?”
Ma ivonapotei bo, “Namadani kava, gisinai ivi karei. 22 Mara ipeyari itawei ku keyama karakaratina ma ku okowa, virabobona kubiine. Kade, kovokovoghina bo kegha da kuni kamyuyuwekai ma kuni vitekai?”
23 Ma Yesu ivonapotei bo, “Avi kubiine kuvona bo, ‘kovokovoghina bo kegha?’ Wawaya ini tumaghana na kovokovoghina da ina tupuwa.”
24 Ma yaghiyaghinai tomowa kikei ina mamai ivona bo, “Aitumaghanem ma kegha da aku nota igisi. Kuni viteku da aku vitumaghana ina rakata.”
25 Yesu ikitai da wawaya peyarisi ivivi veraveruwana kurina ma yaghiyaghinai kanuma berona iyeghai bo, “Kanuma berom, kam vava kawabuta ma tinapota na kevi yaneku. Sisiya bagibagina avereverem da tomowa kikei kekiibutawei ma ke meyani da kuna vovira kurina!”
26 Nani kanumina berona ikiirara, tomowa kikei inukei ma ikiibukuyowei. Ma tomowa kikei kitana da nama ita rabobo ma wawaya peyarisi ivonavona bo, “Irabobo!” 27 Ma Yesu tomowa kikei imana iviiya ma itinavomiirini da imiiri.
28 Muriyai ku numa irui ma kana kivikivina gavunai ivi tarakiiyanei bo, “Avi kubiine kanuma berona kwavinina kabera kavai?”
29 Ma ivonapotesi bo, “Kona nipowana kirakai da kanuma beroberosi weni kanumina nakanani kona kwavinisi da ina kiibau.”
Yesu ina rabobo ivi sisiya meyei.
(Mat 17:22-23; Luk 9:43b-45)
30 Nani dobuna ikuyowei ma Gariri dobuna kamonai ibaba inenae. Ma Yesu ke ita kayokayowei da wawaya itakovi da mike ineyana, 31 iyamna kana kivikivina kurisi ivivi beyebeyena. Ivonesi bo, “Wawaya ini wawana da Wawaya Natusi kana ghavighaviya ku imasi ina terei. Ini raboboi ma mara viarobina kamonai na ina vomiiri.”
32 Ma kana kivikivina nani sisiyina ivi yanei na ke itakovi. Ma iyabumana, tuna kubiine ke iti tarakiiyanei da iyamna iti debei.
Iyai kana vava ita rakata?
(Mat 18:1-5; Luk 9:46-48)
33 Yesu kana kivikivina yavata ku Kapeniyam kwanatuna inekiibau. Ma numiiyai ivi tarakiiyanesi bo, “Ketiyai na aviyavisina kovivi gamowanei?”
34 Ma kana kivikivina ke ita vonapotei iyamna ketiyai ivivi gamowana da kamosiyai iyi kana vava ita rakata.* Luk 22:24 35 Yesu imakiipikapika ma kana kivikivina ivi 12 ikwatusi ma ivonesi bo, “Mikeda kekayokayowei da God matanai kuni nao na kevi muritaweyana. Ketereoruwe meyem da tam turaturam i bigabiga.”* Mat 20:26-27, 23:11; Mak 10:43-44; Luk 22:26 36 Ma wawaya kikei sago irutinapiyei da basusiyai ivi miirini. Ku dogarina iterei ma kana kivikivina ivonesi bo, 37 “Iyi tam avakuwai wawaya kikei sago kuni kiikiiwei na bade taku kikiikiiweku. Ma iyi tam kuni kiikiiweku na aku Mamai ivonataweku na tuna bade kikiikiiwei.”* Mat 10:40; Luk 10:16; Jon 13:20
Iyai ke ita vivikawapateta na kwinata.
(Luk 9:49-50)
38 Jon ivona bo, “Bada, tomowa sago kakitai, avamuwai kanuma beroberosi ikwavikwavinisi. Ma tuna na ke tota ita wawaya kubiine kavonatani.”
39 Ma Yesu ivona bo, “Ke kona vonatani. Wawaya avakuwai bera ghamaghamasi ina berai na muriyai ke kovokovoghina da yaghiyaghinai kaku vava ina kiiviberoi. 40 Wawaya iyai ke ita vivikawapateta na kwinata.* Mat 12:30; Luk 11:23 41 Vonavaghata avonavonemi da meni wawayina iakovim da tam na taku rapekuwai ma avakuwai okowa ina verem na God wawayina ini miiyei.”* Mat 10:42
Ke wawaya kuna ruyaghai da berabero ina berai.
(Mat 18:6-9; Luk 17:1-2)
42 “Meni wawayina itumaghaneku da tuna na weni wawaya kikei nakanani na ke meyani kuna ruyaghai da berabero ina berai. Kuna ruyaghai da ina peku na kovogha ghamana kuna viiya, ita biibii kirakai da wakima vitana iwamuwai ita kuni ma ku yegai ita tawem. 43 Imamuwai bera berona kuta berai na imam kuta boritawei. Ibiibai da imam nevana kava ma yawasa makamakii nonowina kuna panani. Ma ibero kirakai da imam ruwa ma kuna nae ku keyama karata makamakii nonowina. 44 (-) 45 Ma kaemuwai bera berona kuta berai na kaem kuta boritawei. Ibiibai da kaem nevana kava ma yawasa makamakii nonowina kuna panani. Ma ibero kirakai da kaem ruwa ma ku keyama karakaratina ina tawem. 46 (-) 47 Ma matamuwai bera berona kuta berai na matam kuta tupatawei. Ibiibai da matam nevana kava ma God ina ku vikiivavona kuna rui. Ma ibero kirakai da matam ruwa ma ku keyama karakaratina ina tawem. Yesu ke ita vonavona da imata bo kaeta kata boritawei bo matata kata tupatawei. Ivi miiba da berabero ita yawasa kamonai katinimayei ma kata votere tuwanonowi. 48 Nani gawarinai na, ‘Wawaya kii motamota ke meyani ina rukwa, nonowa viyosi ina kanikani. Ma keyama ke meyani ina peki, mara nonowa ina karakarisi.’ ” Mara katamaninai giruma damsi viya vesis 44 ma 46 iterei ves 48 nakanani. Isa 66:24
49 “Ma bade kudubimi keyama ina karimi da avi berona ami yawasa kamonai na peyarina ina kara yavui da biibiina kava ina makai.”
50 “Ma yegai na biibiina ma kegha da damina ina wapa na ikikava kona berai da damina ina vovira? Ke kovokovoghina. Kobera meyemi da tami nakanani ma yegai damina biibiina, ere nuwanubami komakai ma kovi nuwasago.”* Mat 5:13; Luk 14:34-35

*9:2: 2Pit 1:17-18

*9:7: Mat 3:17; Mak 1:11; Luk 3:22

*9:11: Mal 4:5; Mat 11:14

*9:13: Yesu ivivi miiba da Jon Babataito na Elaidiya nakanani. Ma Kiivavo Herodi namada ivi kayotirana da Jon iwana ikiiyaraghi da ivi raboboi.

*9:34: Luk 22:24

*9:35: Mat 20:26-27, 23:11; Mak 10:43-44; Luk 22:26

*9:37: Mat 10:40; Luk 10:16; Jon 13:20

*9:40: Mat 12:30; Luk 11:23

*9:41: Mat 10:42

9:47: Yesu ke ita vonavona da imata bo kaeta kata boritawei bo matata kata tupatawei. Ivi miiba da berabero ita yawasa kamonai katinimayei ma kata votere tuwanonowi.

9:48: Mara katamaninai giruma damsi viya vesis 44 ma 46 iterei ves 48 nakanani. Isa 66:24

*9:50: Mat 5:13; Luk 14:34-35