PAULO ḠENA TORETORE GINIGUINENA TESALONIKA EKALESIARI ḠERI
1 Tesalonika vaḡa-foforina guruḡari
Mai fefa ḡena tuḡamaḡi baregona tu Iesu ḡena ḡenoḡoi-iaḡoma vaḡa-ruaruana. Korana tu Iesu ḡena iaḡoma vaḡa-ruaruana mai fefai tu ekiraḡi-ḡutumaiato.
Paulo na mai fefa tu Korinto na etore-iaḡoato, mo tu ḡena evanelia varivarina vaḡa-ruaruana nuḡanai (Apostolo 17:1-14). Mai fefa Paulo na tu laḡani 50 ema 51 nuḡanai ta etoreato, mo tu Keriso maki emaseto murinai vau.
Mai fefai siri baregori tu karoa 4:15-18.
Paulo na mai fefa giniguinena etoreato korana eurato, Tesalonika ekalesiari 1) bene launaḡiri, Barau na ḡeri ai eveirito veiḡari tarimarima ḡoirari ai beḡene vaḡa-foforiri; 2) bene vaḡa-ribari, Iesu ma beiaḡomani; 3) bene launaḡiri, Barau korana-iaḡina maḡurina korikorinai beḡene tanu.
Paulo na mai fefa tu maiḡesi eboioḡaiato:
1. Ḡia aiḡesi vevaḡa-maḡuri ḡeḡoitaḡoto - karoa 1-3
2. Ḡia aiḡesina beḡene tanu mo maḡuri variḡunai - karoa 4-5
1
Ḡai tauma toitoi, Paulo, Silas, e Timoteo, na Tamara Barau ema Vereḡauka Iesu Keriso ḡena ekalesia Tesalonika nuḡanai ḡatore-vinimini.
Varevare-bara ema maino ḡemi ai bene tanu.
Tesalonika tarimari ḡeri maḡuri
Ḡai tu ḡaro mabarari ai Barau ḡavaḡa-namoani ḡomi mabarami daimi ai, ema ḡema ḡuriḡuri nuḡari ai ḡakiraḡimini. Korana Barau, ḡita Tamara, ḡoiranai ḡavetuḡamaḡi-taḡoni, ḡomi ḡemi veḡabidadama kamasi ḡotovo-naḡirini, e ḡemi veuravini ai kamasi ḡoḡunaḡaveni, ema ḡemi vetuḡamaḡikau ḡita ḡera Vereḡauka Iesu Keriso ḡenai kamasi ḡovaḡa-gwaḡiḡirini. Tarikakama mabarami, ḡai ribama ḡomi tu Barau na eura-vinimini ema ḡia na eviriḡimito ḡia ḡena. Korana Vari Namona ḡai na ḡavinimito tu dia guruḡai moḡo, senaḡi Iauka Veaḡa ma seḡukana e ma moḡonina ḡesi. Ḡomi maki ma ribami, ḡomi ḡemi namo uranai ḡai tu kamasi ḡatanuto ḡomi fakami ai.
Benamo ḡomi na maki ḡai ḡotovotovomato ema Vereḡauka ḡotovotovoato enabe ḡevaḡa-midigu midigumito, senaḡi Barau ḡena guruḡa ḡoḡabi-raḡeato ma vereremi ḡesi. Mo verere Iauka Veaḡa na evinimito. Tauna moḡa ḡomi tu vevaḡa-ḡita namonai ḡoiaḡoto veḡabidadama tarimari mabarari Makedonia ema Akaia ḡeri. Korana ḡomi ḡemina Vereḡauka ḡena guruḡa eraka-rosito tu dia Makedonia ema Akaia nuḡari ai moḡo, senaḡi ḡomi ḡemi veḡabidadama Barau ḡenai tu gabu mabaranai beḡe ribaia. Moḡa lorinai monai ḡai na guruḡa ta tu asi ma baḡa kiraḡiani. Ḡia tauḡeri maki ḡevekiraḡito ḡai na ḡavarivarimito nai, ḡomi na ḡai kamasi ḡoḡabi-raḡemato, ema kamasi babarau ḡoiaḡuirito, Barau maḡurina ema moḡonina vetuḡunaḡina boḡono iaḡo-vini ḡana, 10  ema Natuna Iesu ḡonariani guba na ma beḡenoḡoi-iaḡomani. Ḡia tu Barau na mase na ma evaḡa-variḡisi ḡenoḡoiato, ema ḡena baru bevaḡa-foforiani o tarimarima bevaḡa-kotarini ḡaronai, Iesu na bevaḡa-maḡurirani.