VARI NAMONA MATAIO NA ETOREATO
Mataio vaḡa-foforina guruḡari
Mataio arana ta tu Levi. Ḡia tovotovonai tu takesi gogo tarimana, senaḡi Iesu na ekeaiato, benamo ḡena mero ai eiaḡoto.
Ḡia tu Iuda tarimana, ma mai Vari Namona tu Iuda tarimari ḡeri etoreato.
Ḡia na Iuda tarimari ekirarito, Iesu tu moḡoni Barau na ekiraḡi-toreato Kerisona o vevaḡa-maḡuri verena. Ginitaḡo Guinena o Old Testament ai Keriso beiaḡomani guruḡana ḡetoreato tu varau bema moḡoni. Barau ḡena guruḡa tauri mabarari tu beḡe vetoreni veḡata (Mataio 5:17). Mataio na ḡena Vari Namona nuḡanai Keriso varina Old Testament ai ḡekiraḡi-toreato guruḡari ḡutuma ma ema torerito anina tu moḡea.
Mataio na mai buka tu laḡani 58 ema 70 fakari ai etoreato, mo tu Iesu emaseto murinai.
Mataio ḡena toretore tu maiḡesina eboioḡaiato:
1. Iesu aiḡesina eiaḡomato besena ema ḡena maḡuri varina - karoa 1-2
2. Ḡena vetuḡunaḡi ḡauveina bene sinaia ḡana tauḡena everovinato varina - karoa 3-4:11
3. Ḡena ḡauvei esinaiato, evevaḡa-ribato, eḡobatato, e keve evaḡa-namorito variri - karoa 4:12-25:46
4. Ḡena midigumidigu varina - karoa 26-27
5. Mase na evariḡisi-ḡenoḡoito ema ḡena mero etuḡurito variri - karoa 28
1
Iesu eiaḡomato besena
Iesu Keriso emaḡurito, tubuna ḡatana ḡerina eiaḡomato varina tu maiḡa: Iesu tu Davida garakana, Davida tu Aberahamo garakana.
Aberahamo tu Isako tamana; Isako tu Iakobo tamana; Iakobo tu Iuda ma kakana ema tarina merori ḡesi tamari; Iuda tu Perese e Sera tamari, sinari tu Tamar; Perese tu Hesron tamana; Hesron tu Ram tamana; Ram tu Aminadab tamana; Aminadab tu Nasona tamana; Nasona tu Salmon tamana; Salmon tu Boas tamana, Boas sinana tu Rahaba; Boas tu Obed tamana, Obed sinana tu Ruta; Obed tu Iese tamana; Iese tu Kini Davida tamana.
Davida tu Solomona tamana. Solomona tu Uria ḡaraḡona ḡenana emaḡurito, (Uria ḡaraḡona etava-verariato murinai); Solomona tu Rehoboam tamana; Rehoboam tu Abia tamana; Abia tu Asa tamana; Asa tu Iehosafat tamana; Iehosafat tu Ioram tamana; Ioram tu Usia tamana; Usia tu Iotam tamana; Iotam tu Ahasa tamana; Ahasa tu Hesekia tamana; 10  Hesekia tu Manase tamana; Manase tu Amon tamana; Amon tu Iosia tamana; 11  Iosia tu Iekonia ma tarina merori ḡesi tamari. Mo ḡaro ai Babulona tarimari na Isaraela tarimari ḡeḡabi-iaḡorito Babulona ḡana.
12  Babulona ḡana ḡeḡabi-iaḡorito murinai, Iesu eiaḡomato besena ema ḡemaḡurito varina tu maiḡa: Iekonia tu Sealtiele tamana; Sealtiele tu Serubabele tamana; 13  Serubabele tu Abiud tamana; Abiud tu Eliakim tamana; Eliakim tu Asoro tamana; 14  Asoro tu Sadok tamana; Sadok tu Akim tamana; Akim tu Eliud tamana; 15  Eliud tu Eleasara tamana; Eleasara tu Matan tamana; Matan tu Iakobo tamana; 16  Iakobo tu Iosefa tamana, Iosefa ḡaraḡona tu Maria. Maria ḡenana Iesu emaḡurito; Iesu arana ḡekiraḡiani Keriso ḡetoni. (Keriso anina tu Barau na ekiraḡi-toreato vevaḡa-maḡuri tauna).
17  Ḡuru mabarari Aberahamo ḡenana eiaḡomato mo Kini Davida tu ḡuru gabanana vasivasi (14), e Davida ḡenana eiaḡomato mo Babulona ḡana ḡeḡabi-iaḡorito tu ḡuru gabanana vasivasi (14), ema Babulona ḡana ḡeḡabi-iaḡorito negana na eiaḡomato mo Keriso tu ḡuru gabanana vasivasi (14).
Iesu eḡorato
Luka 2:1-7
18  Iesu Keriso tu maiḡesi eḡorato: Ḡia sinana Maria tu Iosefa kirakauna, senaḡi ḡia tauri ruarua tu roḡosi roḡo beḡene veḡaraḡo nuḡanai, Iauka Veaḡa na mero evaḡa-ḡoraiato Maria diana nuḡanai. 19  Iosefa, Maria ḡaraḡona, tu vei iobukaiobuka tarimana, ema asi eurato, tarimarima ḡoirari ai Maria bene vaḡa-maiakaia. Moḡesina naima ḡena ura tu, vekure-toḡai vau Maria bene dobi-kwanea etato. 20  Ḡia moḡesi etuḡamaḡito-ḡoi nuḡanai, Vereḡauka ḡena aneru ta nuvi ai efoforito, benamo ekiraiato, ekirato, “Iosefa, Davida natuna, kirakaumu Maria ḡabiraḡena garina asi bono vei, korana ḡia tu Iauka Veaḡa na mero bevaḡa-ḡoraia ḡia diana nuḡanai. 21  Ḡia na mero ta beḡabiani, arana bono vatoa Iesu, (Iesu anina tu vevaḡa-maḡuri tauna); korana ḡia na ḡena tarimarima ḡeri rakava ḡerina bevaḡa-maḡuririni.”
22  Maiḡeri dagara mabarari ḡeḡorato tu, Vereḡauka na peroveta tarimana muruna na ekiraḡirito guruḡari bene vaḡa-moḡoniri ḡana, ekirato,
23  “Ḡoḡitaia, ḡuiato ta bekuḡani, mero ta beḡabiani, mo mero keina arana beḡe vatoani Emanuela.”
Emanuela anina tu ‘Barau tu ḡita sevisevirai.’
24  Iosefa gena na etataḡato nai tu, Vereḡauka ḡena aneru na ekiraiato veiḡari eveirito. Maria eḡabi-raḡeato, benamo eḡaraḡoato. 25  Senaḡi ḡia ḡesi asi ḡegena-sebonato mo, natuna eḡabiato. Benamo mero arana evatoato, Iesu.