Emos
Waeuwa uawa
Emos Iuda tawowa bedewe Beteliem tampe bolawa kerauda winedia bedewe wandio God apasano me perowetawa segalen. Me God gagalowa Israelwa ita bola isiwa tampointa wineia apanawa do diamodie, me God ando apana sa kadiwa dewasaia baiwa matangelamopia umanawa wadie nuaitumodie. Apana sa mai God wiwirawantoipe ita mo apana nuaparela lagamoie.
God Israel apanawa sauamona bolau Israel sanaasapi ita Ierusalem osowe wadepio enepio ita Dawid damba bedewea warerekasantompo atouwo Israel apanawa wanwan euda obasa waimompa.
8
Iawe God Israel apanawa lagawaau mida nuaparelala ituaisimoia kotumode
E mida apana nitu abolawantoia ituaisimoilana,
ita do nuaparelala bolala bedewe waimoia kadimonatuwapia baiwaitilana asisuneana.
E menaledia Sabat walamawa ita walama debamau odau tauwadea os diantopuo,
e nanala osowe teamona ita gimaralala lagamona baiwa.
E laga mampe malesa debamamoilana,
ita do nana mai wisiadewaitipe apana wanamoipona, dia,
e mai nana sikeredewaitipono apana manlawo gimarantoipona, dia.
E nana isiwa kadiu do teamoilano apana gimarantoi.
Naita e apana mane kerauda manlawo wadeia mai leusapue malesantopua rua
e mo wadamoile dewamoilano nolala apanawa segantoi.
Tane mane sa ipa kerauda sendoro malesawa rua.
 
Iawe God saua badowa me meba ebowa mampe wan,
ebo ipa sa Israel apanawa mamposaie wiwirawantoia,
me wane wanase, “E dewa sa kadiwa dewamoilana
ne ando mai nuaawawamopa, diaida.”
 
10 Ne e walama debamau odau dewamoilana
leusapaitudepio kako debamaia wanuna,
nuaeu sasawa wailana
leusapaitudepio ke wanuna.
E nuaparela eueuwa bo segalena
garawa kadiwa benaitane ita uwala koresamonuna.
Ne dewalepo ke wanuna
e otolaida bolepono kakowa waipona rua.
Kako sa ideita alempe ompa osowe sigasigauaida segalepi.