Onionia apanau
Waeuwa uawa
Buka ema onionia apanau, Iosua bowa ita Samuel mulena walamawa umanau dianede. Gagalo ema girumamona bedewe walama sa bedeuwo dewa ambi segantoia umanau wade.
2
Iosua boleno aupawe dewa ambi segalena gagalowa
Iosua ita apana eiau mida Iawe God dewa pokawaau dewamono eweiena apanawa inawaa waimoia walamawe Israel apanawa Iawe God simbiasaie.
Ita Iosua Nun otopa Iawe God nolawa dewalala apanawa enawa 110 wadeno bolen. Ita mo me bolawa odantone waneiena Timnat Eres, Eparaim bolawa bedewe wadi Gaasi osowe wita sen deneuwe dobontoiena.
10 Ita ema aupe dan sa uduudu bontontuwano aupe dan da sanaa muntone ita Iawe God mai atentopona ita do dima Israelwa baibu dewasana mai atentopona, dia. 11 Israel apanawa Iawe God mampe kadi debamaia dewasaiena, ita mo god Baal kokoitauwa wadaposisaie. 12 Mo sumanaibu Iawe God mampe ituia tauma eiena mo nosinosiu Godiu, mida mo tawo Isibt bedewe waimoio banlamono nomoiena. Ita mo Kanaan apanawa godiu daitada wawontoie wadaposimoie ita Iawe God dewasaieno nuawa kadiidalen. 13 Ita mo sumanaibu Iawe God mampe itua ene ita god Baal ita god iwoa Astoret wadaposimoie. 14 Sa baiwa Iawe God nuakadiwa Israel apanawa mampo ita emono emalawoa apanawa wimone epamone ita mo puraiwau otamone anton. Me emono onau apana wimone enabodamoiena. Ita Israel apana mai muba inantopona rua, dia. 15 Tane Israel apanawa ona baiwa nomoie antoia walamawe Iawe God mo amboitumodie, me wana rua dewasadie ita mo pokaida eteie.
16 Ita sape Iawe God uwaula apanawa eubu sonabamone teamon Israel apanawa onau eneia mampo saumopue inamopua baiwa. 17 Tane Israel apana mo mida uwauntoie oniamoia apanawa aiau mai ruawantopona, dia. Mo Iawe God enee ita god da ewanuauwantoie wawo antoie, i badawa edie apana da baiwaleidia rua, ita mo tauwadea nosinosiu antoia intawa ita do God anaanawa eiena. 18 Iawe God emalawoa apanawa Israelwa poka debamawa wanamoio eteie sidantoia etamodie. Sa baiwa me uwaulempa apanawa wanamodie, tane Iawe God uwaulempa apanawa nata Israelwa saumoie emalawoau apanawa mampo inamoie. Uwaleidia apanawa inawaa wandia walamawe Iawe God Israel apanawa nuapareuleidie inamodie 19 Tane uwaleidia apanawa boleidio aupe Israelwa mai Iawe God inseipona ita eie dewau tontawa inseie nuau teinedio leuntoie aupawo antoie. Mo dewau ipa kadiwaida mai gombau bauta waimoia ruau, dia. Mo god da wauwontoie wadaposimoie. Ita mo nuau badoidaleno mai menamoipona kadi dewawa dewasaia epu.
Ita Israel apanawa dewau mampe mo Iawe God mampe saua dewasaiena ainapundeiena. Me nuawa kadilen ita Israel apanawa rubumone ita mai saumope apana da nambea mo bolau bedewe waimoia tanamopona, dia. Tane apana nambea dewau kadiwa mampe Israel apana rubumoie. Naita mo Iawe God intawe antopu ba, dia, mo nosinosiu mapo antona rua.