FAFUAN
Nan Kots Noun Ten Pol Naa Fi Non Tana Taa
TESALONAIKA
Tsue Famumua
Pol kirkir fafuan nan noun to tan gum nar vainy fafaaman ten Jisas te kaa ror tana ngats fan iny Tesalonaika sikia ma nangis fiisok to te biny yan vaamuan nan noun tana saa, mesapan te tsue na ka Jisas tabin fatabin bus naa me. I to tan fakap vegiau tovei, Pol kirkir fakinai iny a sanaan tan a tou tabin fatabin me ten Jisas ana ya faparits ratuari ma tsutsun fareits.
1
1 Anyo Pol ai Sailas ai Timoti, amam kirkir naa rom noun tovei naa fi non tana gum nar vainy fafaaman tana ngats fan iny Tesalonaika, ito na vainy to te kaa non koman ten Gov a Tamarara ana Tsunaun Jisas Krais.
2 Mam faakats rom ten Gov a Taman ana Tsunaun Jisas Krais ma faan mami na koma ree'un ana aaverof.
Vaatsuk Tan Nainy Te Tabin Minon E Jisas Krais
3 Amam natiny tsue faarof rom ten Gov, to tsumin vamuinyasiny fafaaman tsonyo tan mamatsiny nainy. U kat to ayein tavaron fiisok tsumam, tana saa a faason ten Jisas tsumi te karap minon, an fimamangiir tsumi men isiseiny mes te karap ovei kanen. 4 To sana mam paparaa rom tan tenoor of ir mes gum nar vainy fafaaman ten Krais, to tsumi, tan kat iny anaanos faamo an kat iny suu iny a faason tsumi ten Krais, kainon te sab fi romin nainy fatafisuan gen nainy govets a fo patang, ami tsutsun faparits rom. 5 Tan fo kat to ayei te pokei minon faaron ten Gov, u tavaron fiisok tana saa, tana fo kat to ayei, ami tamainy ovei rom a Waan Ya to tsumi saraa kamits rom. 6 Gov kat non kat tavaron, ana Ayei nai fatanai raror vainy te kat fijior maromi, 7 ana Ya te nai favusuainy faarof mami to te saraa kamits rom ana mam kan. Ayei nai kat non kat to, tan nainy te tabin minon a Tsunaun Jisas Gormirmir fiisen ramiror fo morena Tsunian reits, 8 fiisen men guaf akaakor, ma fatanai a fasaraa ratuarin vainy te gim ror ma natiny e Gov ana rin vainy to te gim ror ma manaats Vurungan Rof nane Jisas a Tsunaun tsura. 9-10 Ri nai nom ror a fasaraa tan saraa kamits tan guaf akaakor a suu, to te pets rarori matan a Tsunaun ana parits Tsunia na reits via minon siinaiv tan nainy te naa minon Ya, nai nom non asangan karap tan vainy taabos u fasito Tsunia, nai nom non fatsiitsii tana vainy to te faamainy Ya. Ana mi kan to aya te kaa rom fapoopoan narari, tana saa ami te faamainy Vurungan Rof nane Jisas to te tsue of bus im yam.
11 Tan kat to aya, mam natiny faakats fatatabin of maromi. Mam rangats rom e Gov tsumam ma kat mami Ya am tamainy ton kat te koman fi non Ya, ai tana parits Tsunia, Ayei faruak famainy non kat rof tsumi te koman fi romi, ana binun tana faason tsumi te fatsuiny fakats tsumi tana ka te kat romi. 12 Tan fo kat to aya a asangan a Tsunaun tsura e Jisas, nai nom non asangan karap, ito tsumi tsun, ana mi kan te nom fi kan marom jesan i Tsunia, ito tana koma ree'un tana Gov tsura ana Tsunaun Jisas Krais.