Aposel
Puase tesol Aposel
Kakain ti haxewai teik pepa ie
Luk tai teik pepa ie sai ahang 33 muhin ti Jises moih aliawa ape Haeu waxi i hani tesol tonan. Luk i kumahe Ju, i Grik. I tel dokta. I tin tel ti taiai meng solian ti Jises. Hina waliko ti i tatai ie i kema ti tesol aposel ma hina puki i ningahi ti i pupuas kapi Pol, tel ti tesol aposel. Hutuiai teik pepa ie, i kakaxi ti Haeu hani tesol huopanim hua aposel Holi Spirit ape i hapohea lato ti kaxi ahutiai meng solian ti Jises ma ailei kilan waliko tenen pate lalap hualiai teka seilon. Lato hutui tenen puasain ien Jerusalem. Imuh lato puas ahuta hani xux liai ape ani tenen puasain ien kilan teka kumahe Ju laha soh ti Jises Krais.
Teka Ju ma teka kumahe Ju, imat kumahe laha huhukuma, tuahe imuh Holi Spirit huali laha ape laha uke he akikin ahuma ti Jises Krais. Lokon ien teka masiwi ti teka Ju lato watakai tesol aposel kaxi meng solian ti Jises. Aile ape lato xoti tesol aposel ape hani he mini teka masiwi ti Rom tuahe teka masiwi ien kum tunah waliko tenen na lialun lato ailewen. Aile ape Luk kakaxi leili pepaun ka teka kahikahi Jises lato tai xaputi tenen na nauna ti teka masiwi ti Rom. Luk tin i kaxi hani kako ka teka kahikahi Jises pate laha sawat kila hani tesol tesol nake Holi Spirit hapohea tesol aposel kaxi ahutiai meng solian ti Jises.
1
Haeu kakawen ka i hani Holi Spirit
1-2 Tel masiwi Teopilus, leili teik pepa Meng solian ti Jises nga kakaxi hatesol waliko ti Jises ailewen ma hanauen ti i hutui pupuasan, hani tataen ti Haeu waxi i hani kapin ti tesol tonan. Imat ti Haeu waxi i, Jises hani teka kahikahin kakain ti pohe Holi Spirit ti i talo lato ailei puasalato. Teteka kahikahin i kilamiwen aposel tetan. Leili 40 ngain muhi matean i sohot take kila hani kapi lato. I kola ka i moih aliawen. Lokon ien i kakane lato sale nenein ti Haeu.
Telao ti lato ang apupuha i hone lato, “Amuto kum nahih sasalili Jerusalem, atengimua tataen tel Tamak Haeu hani amuto Holi Spirit ti i honewen amuto, masin ti nga kakanewen amuto. Jon baptaisi seilon ani kan tuahe pate ape sikole Haeu hani amuto Holi Spirit ti kapitiamuto.”
Haeu waxi Jises hani kapin
Telao ti tesol kahikahi Jises apuha haniwa kapin, lato kamei i, “Tel masiwi, nakon se ape o hani kaha teka Israel ngahati aliake kaha ma neini xux liai?”
Jises pahoi lato ukek, “Kumahe waliko ti lehe amuto tioi. Mewenae Haeu noseniai taen ti tesol waliko ien sohot. Tuahe ti Haeu hani amuto Holi Spirit, amuto uke pohen ape amuto kaxi sawateni nga hani teka seilon ti Jerusalem, hatexux ti Judia, Samaria ma lawe xux.”
Muhin ti i kak kewa, Haeu waxi i hani patul kapin ti puli tesol kahikahin ape teik maun likihini i ti pulalato.
10 Lato to paxapax tutuen, hua seilon puxuaulalu papaxaxun sohot tu hahutuia hani kapi lato. 11 Lalu ukek, “Tesol akiki Galili, alahan amuto paxai kakapitini maun? Tetel Jises, Haeu waxi hani patul kapin, tin i aliama masin ti amuto ningahi i luainiwa.”
Matias saiti Judas
12 Waliko ien i sohot ti Maunt Oliv, xohixohin tehu taon Jerusalem. Muhin ien tesol aposel alia hani taon. 13 Ti lato tahiawa, lato soh hani tehu ing teke patul, tesol lawe lato heheuta. Lato tetesol: Pita, Jon, Jeims, Andru, Pilip, Tomas, Batolomiu, Matiu, Jeims tel nati Alapeus, Saimon tenen axan liai Selot ma Judas tel nati Jeims. 14 Lato hatesol lawe lato apuha lotu hetekie namil tenenawe kapi tesol hehin ma Mary tel tini Jises hetekie tesol ukale Jises.
15 Ngain telao, sai 120 kahikahi Jises laha apuha ape Pita tua i ukek, 16 “Tesol akikik ti Krais, waliko ti kakai Haeu kaxiwen i sohot hapoponowi sale Judas, tetel i atima teka xotiai Jises. Ti kuewen wanen Holi Spirit hanamiloa tel masiwi David ti kak kilamiai tesol waliko ien. 17 Kemuk Judas tel ti leilokako, Jises kilami i puas akatiakako.”
18 Imuh Judas waxi teik moni ti hangainiai Jises ape i kahui teik pekeun. Ti ien i haputa kalungini i, tian tapox, puhuan ahuta ape i mat. 19 Lawe seilon ti Jerusalem hong menge matei Judas, ape laha axai teik pekeunaun ien ti kakaialaha Arameik. Laha axai Akeldama. Teik kakain ien ukek, Pekeun ti Kaka.
20 Pita kak tatale ukek, “Leili pepai Salm ti tataiai David i ukek, ‘Tiliwen tap seilon leili ingan, laha kum ingangai.’ (Ps 69:25) Tin i ukek, ‘Tel seilon liai akeniai pupuasan.’ (Ps 109:8)
21-22 “Aile ape ewi na tel seilon soh ulea hani kapi kako ti kaxiai xahatai Jises tel Masiwi. Kako kilami tel ti lawe kapi kako lokon kako kapi Jises, hutui ti Jon baptaisi Jises haniwa tataen ti Haeu waxi i hani kapin ti tesol tonan.”
23 Ape lato noseni kilamiai tel ti huhua seilon ie: Josep Basabas, axan liai tenen Justus, ma Matias. 24 Lato kamei Haeu ukek, “Tel Masiwi, o tioi namili lawe seilon. 25 Kola hanima amite tetel ti o kilamiwen lehe i sohot tel aposel ukei pupuase Judas, tel i saliliwen amite hani tesol hoi liai totonan.” 26 Ape lato halokeni satu upiai tel ti Haeu kilami. Haeu kilami Matias ape i hukuma hani kapi tesol huopanim tel aposel.