PAS PAULO MENI KOLOSAI EMARE GAENUA
Paulo meni Roma nate ena benai sora itise pas ei awa Tuara dubu Kolosai nate noisowa amire gaenua. Gaenu Tikikasto Onesimore meni puro bamuwato. Ego emira gaenua: Epafara meni gita Roma nate kei awero Paulo tamuro opi sai ema eni Kolosai dubura nana soe noisowa amira senu Paulo meni opi nusokare puro osamu sero pas ei awa gaenua. Opi nusokare ego ewa: Anutu itia, erama itenakai amira soe ena nena putoure angelota tua eni itera, are nakai nukare bowi wanekai. Noko, Yesu, nu Anutura osai. Nu angelo zo ine gege. Noko nena nai eni sienitinoise tama aiso kapinoise nuanisekai sai itia, ago toisowa. Are Paulo meni opi nusokare awa puro osisinoise Kristo nu nena bamubamu amira giti kopi asenua awa.
1
Na Paulo. Anutu meni ara tamai nusora na Yesu Kristora aposolo potinu nowena. Nato otao nasokai Timoti nato Kolosai nate ena Tuara dubu gera otao mamai nasoto Kristore dai susumuro nowewa nimorekare pas ei awa potitinonato. Anutu Mama nasokaira nana ena sogawaire duba ewananare meni semu nisokare nana niro itaise.
Paulo meni nukare emo Anuture kokopai asenua.
3-8 Oziga Ewanana awa ge me susure awa, are ge ami nisokare nana kei awenu nikare niniro Anutura sogawai amira susu giwa me wenua awa. Be amira ana zaawero Oziga Ewanana ami nisokare nana ena zamawi me kei awi-susawewia. Agoro nisokare nana ena daba kota, zebu sero ena ago inowia. Ge ami nena Anutu meni nimorekare potamu seroninu utura itewia amira susu kereninu giro nikare Kristo Yesu tuma didinoise gera otao mamai dapikarago emo dubara dumi pupinowewa. Oziga Ewanana awa otao soremai koko nasoto Epafara Kristora soumai ge dimaire nune ami gipenu giwa awa. Ago wero nu da ami Ozana meni nisokare nana dubara dumi tamunua amira ge uge namoreto wisia awa. Are nato ge nisokare ago ine niniro nikare emo isa toise Tua nasokai Yesu Kristora Mama Anutu amire kokopai towenato awa.
Anutu meni putou numorekare potai zewai warise Paulo isa senua.
Are nato ge uge nisokare niniro amire zaawero nikare dubare kotumaire meni Anutura ara tamai ninawise, o kotumaire ninaire Ozana meni tapinowia awa nisokare nana be maise isa si-tupewenato awa. 10 Tua meni nimorekare ago wai amire Tuara ebata nuanisekai sai amira te nuamunowa. Ago nuawa Tua meni gai ewanana wamunoya awa. Ota gera bua koko neire-neire itia, awa inoise amira me tamamunowa. Ago inoise Anutura susu niniro susawise nuamunowa awa. 11 Nato nikare emo isa toise Anutura putou bamubake ami nikare ziai dopero putou bamu pumuro nuawa nisokare nana tame nena mou-mau witai nikare beyata tepo zewai wawise isa towenato. Nikare zewai wero wama nisokare duawa orenai dimuro dopinoise yawa sara wawise isa towenato awa. 12 Mama nasokai nu ike zasimaira ena nena namorekai potamu sero potinu itewia, awa dubu nuso meni topetanisekai sero kora wenu te wenakai, are nu bowi wawise sero isa towenato. 13 Anutu nu nakai mumera mama amira putoura ena soero pumuro Mai bou nusora putoura potinua. 14 Mai nuso ami nakai pasinara putoura ena besenua awa. Awa pasina nasokai disenua awa.
Kristora nuaire buare.
15 Kristo awa Anutu bezai amira ititi awa. Nu nena bamubamu kaka kei awamure gita wero noisonua. Are nu nena bamubamu amira giti kopi wero nowia. 16 Wai nusora nena bamubamu utura ata zebura kei awero tepo wenua — nena gaire kaka gamure, angelo witaire osaire — awa dago putou nusora ata gegenai nuso ago kei awai awa. 17 Nena bamubamu awa kaka kei awamure nu noisonua nowia. Nena bamubamu awa putou nusora itise tupewia awa. 18 Nu dubu nuso amira giti kopi wero nowia awa. Dubu nuso awa te-wana tama ipu nuso awa. Nu dubu nusora susu awa. Nu betaira ena gita wero erinua. Ago inoise nena bamubamu amira giti kopi wenua. 19 Anutu nu nuaire putoure nuso awa Mai nuso nana bemuro itaise nininu te wenua. 20 Ago wero nena bamubamu utura ata zebura awa Mai nusora buara numore dai otao-gamao warise sero senu Mai nuso ni pasinaira orara nuso meni bega tamunua, are Anuture otao wewa awa.
21 Nikare gita me gita Anutura nana asike noise tani waya-kawaya neire-neire inoise nu iwo wero noisowa awa. 22 Are Kristo tama aiso puro kei awero betai nuso meni nikare Anuture dai dara potinu otao wero nowewa. Nu nikare puro poti Anutura nana benaura nai duba saramai ata ge tepo o pasina tepo kei awawise ago wenua awa. 23 Are nikare Oziga Ewanana niniro tuma diwa, tuma diai awa besai azu, ziro tata-tata inoise zewai wero dopinoise beyata oko wawe. Oziga Ewanana awa ema sero ata zebu sero bamisia awa. Na Paulo, na amira bua mai nowena awa.
Paulo nu Yesura dubu sorepitinoisonua.
24 Na nikare emo yaya-buyaya tame noise yawa sara inona. Kristora dubu awa te-wana tama ipu nuso awa. Are nu dubu nuso emo wero yaya-buyaya tamunu, yaya amira agewa awa kaka tepo wamu dago itewia, are na tama aiso naso meni yaya agewa awa dimuro pesunitinona. 25 Anutu meni nikare emo na Yesura dubu amira bua mai potinu nowena. Na ge nuso sero gipero awinoise kereniro baitanise senua awa. 26 Ge sero gipero awinowena awa bui nuso awa. Gita ge amira susu awa bezai itasai kaka ninirota niniro awamu tepo noisowa awa. Are be zeme emire nu ema dubu nuso namorekai kereninua awa. 27 Bui nuso ami woi keero ema Yudakora nana zapinoise bamu kei awinoya, awa Anutu meni ge ema dubu nusore sero kerenitinoya. Buira susu ego ewa: Kristo duba nisokarera nowia, are nikare Anutura simai zasimaire topetamunowa. 28 Are nakare Kristora susu kereniro toise ema dapikarago tugata inowenakare. Ago inoise potai ge potitinoise ninai bamure inoise ema dapikarago sero gipero awinowenakare. Awa ema dapikarago Kristora nana susumuro ema me wawa amire nuso nana dubu damu sero ago inowenakare. 29 Putou nuso meni na soga wawi amire bua awa putou bamure zewai-zawai wero inowena awa.