PAULO ENA URIURI BAGUBAGUNANA KORINITO TATAODI ENADI
1
Tauawamamohoiena ena abatoro ainauia boeana eai.
Rom. 5.1-2; Ep. 1.3-14
Paulo, se eogahai Iesu Keriso ena aposotolo esau, Eaubada ena nuatu eai, eo eda tau Sosene.
Eaubada ena Ekalesia Korinto eai, enadi, isi Keriso Iesu arinai se hetabuedi, hetabu tataodi se eogahaidi wa, isi hinage gamagaridi dimo gamagaridi eai Iesu Keriso eda Guiau esana tauatai, isi edi Guiau eo ita eda Guiau:
Ainauia omi arimiu eai, eo loni, Eaubada Tamada eo Guiau Iesu Keriso arinai i laoma.
Huia gamagari egu Eaubada ea lautoiei paana Eaubada ena ainauia se leawa, Keriso Iesu arinai, ginauri gamagamagari aridi eai ai arinai se helolomiu, riba gamagaridi eai, eo sonoga gamagaridi eai hinage— doha Keriso ena riba se hemamohoiei omi arimiu eai— nige earua ainauiana esau arinai se hedehamiu, eda Guiau Iesu Keriso ena hemasarahama au bagibagiei. Ia abo i abididinimiu i lau e sigasigana eai, eda Guiau Iesu Keriso ena asubena eai omi taba nige girumiu. Eaubada ena abi se lolo, iaede se eogahaimiu au patulau ia Natuna eda Guiau Iesu Keriso heoiesegana arinai.
10 Ema tataoyao e, ea awanorimiu ta eda Guiau Iesu Keriso esana debana eai, riba esega au ribaribaei, omi tabu peimiu udoi udoi, na nuamiu eai au heoiesegaimiu, eo emi nuanuatu esega. 11 Ehaguyao e, Keloe helena taumia tataodi wasamiu se heribagu, si ene au haihaiawayagarauioimiu. 12 Omi arimiu eai esau i ene, “Eau Paulo pelena,” e “Eau Apolo enana,” e “Eau Kipasi ena pele,” e “Eau Keriso enana.” 13 Keriso se peiudoiei, wa? Paulo debamiu eai se hesatauro, wa? E Paulo esana debana eai se hebapatisoimiu? 14 Agu eamoisa omi nige ea hebapatisoimiu, na Kiripa eo Gaio isibom. 15 Ata headi edi nuatu si ene eaubom esagu eai ea hebapatisoimiu. 16 (Setepano ena numa tataodi hinage ea hebapatisoidi, taiede nuana nige arimiu eai tau esau ea hebapatisoi.) 17 Paana Keriso nige i hetamarigu bena ea hebahebapatiso, na evanelia mo bena ea guguiai; hinage nige ribariba sonoga eai, ata Keriso ena satauro gigiborina aniona i tauyamui.
18 Paana satauro ribana isi taumatemate nuadi eai ginauri eauyaure, na ita taumaurio ta ene Eaubada ena gigibori ede. 19 Si uriyao si ene,
“Tatao sonoga edi sonoga abo ea hetatagorigoridi, eo tatao sibasiba edi sibasiba abo ea taugudui.” (Is. 29.14.)
20 Tau sonoga ia haedi? Tauuriuri haedi? Teina tanoubu ribadi tau‐ribaribaedi haedi isi ede? Tanoubu sonogana Eaubada matana eai i hemala eauyaure, e nige’e? 21 Tanoubu ena sonoga eai Eaubada nige se italobai, Eaubada ena sonoga meta; Eaubada i ene i lolo guguia eauyaurena debana eai isi tauataiena se mauri. 22 Paana Iudea tataodi heiheinoi se henua, eo Heleni tataodi sonoga se eooi, 23 na ai Keriso se hesatauro ai guguiai ede, Iudea tataodi edi aba‐alabesibesi, eo Heleni tataodi si ene riba eauyaure. 24 Na isi wa se eogahaidi, Iudea eo Heleni, iaede Keriso Eaubada ena gigibori, eo Eaubada ena sonoga. 25 Paana Eaubada ena riba eauyaure tatao edi sonoga i saetawatawai, eo Eaubada ena beruberu tatao edi adidiri i saetawatawai.
Tauataatai Korinito, isi nige sonoga tataodi.
26 Egu tataoyao e, se eogahaimiu wa hage au ita, tatao sonoga buluma sonogana eai gamagaridi nige se eogaidi, eo nige tatao adidiri‐daoidi, nige wasawasa gamagaridi se eogaidi; 27 na Eaubada teina tanoubu ginauri eauyauredi i hineridi, aridi eai sonoga i hetatagorigoridi, eo Eaubada teina tanoubu ginauri beruberudi i hineridi, aridi eai ginauri adidiri‐daoidi i hetaumaeamaeadi. 28 Teina tanoubu ginauri baaeadi, eo ginauri se isugaraedi isi ede Eaubada i hineridi, eo ginauri sora nige se tubu ginauri miamiadi abo se helautomdi, 29 arinai taba nige tau esau Eaubada matana eai i ribapasipasi. 30 Emi mauri paana ede ia, Keriso Iesu boeana eai, ia Eaubada i abi i hemala eda sonoga, eda laulau‐dudurai, aba‐hetabuuioida eo abihemauri; 31 arinai doha se uriyao si ene, “Ia tauribapasipasi, taba Guiau mo i ribapasipasiei.” (Jer. 9.24; 2 Kor. 10.17.)