PAULO ENA URIURI TITO ENANA
1
Hari dubu hari dubu, itaitawataidi eo woeawoeaidi lauheatana.
Paulo, Eaubada ena heaheari tauna, eo Iesu Keriso ena aposotolo, Eaubada ena hinehineri tataodi edi sunuma bena ea sagulaei, eo mamohoina edi itaitalobaina hinage, arinai Eaubada ta nanabuei, mauri i lau e nige nosina ta sunsunumaei wa, doha Eaubada ia taba nige i boraida, ia ede i ribahesunumaedao, mumuga eai i laoma ina; abotai, iabom ena huia eai, ena riba i hemasaraha, iaede se leama eau bena tauhemasarahana, doha Eaubada Tauhemaurida i lauhesomgu ta;
Tito enam ina, natugu mamohoi e, eda sunuma esegana ede:
Ainauia eo loni enam, Eaubada arinai i laoma, eo Keriso Iesu Tauhemaurida hinage.
Kerete eai ea laugabaem paana ede ina, ginauri headi metai se abihedeha, oa bena u heduduraidi, eo babadayao bena u tauribaedi, hari eanua hari eanua eai, doha am paisoa ea hetorom; aitea tau nige edi aba‐hegiruna, sine esega mo monena, nanatunayao hinage se awaabi eo taba nige se hegirudi si ene se hemanabara e se miamia gaibu. Paana Tau‐woeawoea tabu edi aba‐hegiruna, ia Eaubada ena ginauri tauhepahepaisoaina, bena nige i tanuagauioi, nige i ouyalayala heula, nige taunomnomdaoi, nige i aiaipidiri, taba nige moni biibiina arinai se hegadolesa. Na ena laulau mo tatao i haihaitalaidi, ia abilolo taugadosisiena, eo iabom ena gadosisi abina i ata i tanuagaedi, ena abi se dudurai, tau tabuna, miamia lolo taunanabuena. Riba mamohoina se heatada wa i sogohididini, arinai abo abina i ata lauheata mamohoi i laulauheata, eo ena riba tauheuio edi riba i hemaisadi to se italobai. 10 Paana tauawayagara se gamagari, tauribariba gaibu, tauboraborasom, tauperitome pelena wa boeana eai se gamagari ariri; 11 bena ta oihemonoudi, isi numa headi taumiaidi maudoidi se heasibuidi, ginauri nige i lolo se ribaribaedi iaede se laulauheata, moni biibiina debana eai. 12 Doha isi edi eanua tauna i ribaei, isibom edi peroveta wa, ena riba i ene, “Kerete tataodi kamanidi se boraborasom, sarai baaeadi isi, se miamia gaibu, se aiaisom.” 13 Ina riba sanapu ta mamohoi. Arinai u ribasuuidi, u riba adidiri, bena sunuma ta se abi‐mamohoiei, 14 tabu Iudea edi piripiridae se ataatai‐lau aridi eai, e tatao dobila mamohoi se tausuaraeyao edi riba‐hesom se awaabiedi. 15 Tau‐nuaaa arinai ginauri gamagaridi se aa mo, na tatao nuadi se hebiidio, eo nige se awaawamamohoi, isi matadi eai nige ginauri esau i aa; nuadi eo nuatu aba‐heduduraina nuaboeadi eai, se bii gogo. 16 Edi riba si ene Eaubada abina se ata, na edi paipaisoa eai ia se harerei; isi taukabakabaleadi, tauawayagara, nige gonoadi paisoa lolona esau se ginauri.