2
Urgun idu ya
1 Pentikos nal idu, agog ilo rumok adi fidian dupalug, kisaek mi dutumanig dumado dugo, 2 liliŋan ta nek ibol tim tubun geig ifure dak igo woŋ ab lo dumado dan ilon lo isaldug ilon igane itau. 3 Agog mel ta yai balen wei mi igo woŋ dufurak diaug tamol a dumado yan gurmad fo ided ided yau dugo dile ya. 4 Tamolpein fidian Urgun ilod iŋanefuteg an lo Urgun dabai ipidinai an fom iŋ anen anen tamolpein sen ak sad muroud ru funfun lo diŋiŋeŋ se ya.
5 Aria, saen an lo Juda tamolpein gob sad tan fidian lo dumado dugo, ante Anut ubou an dile na yan tan an fidian dibiseig Pasova tumanek san anaŋ diani wo Jerusalem na diaug dilasag dumado se ya. 6 Saen liliŋan an duloŋ man, Juda tamolpein wei mi dususag dutumani a. Fidian dupalu yan anen anen iŋsiganed muroud ru lo aposel adi diŋiŋeŋ dugo duloŋ se ya, ago man iŋ fidian durut saian geig a. 7-8 Ago dugo dumasa saian go sed nug dusumiani, “Tamol diŋiŋeŋ dan fidian Galili tamol ak gug, en dugo woŋ dugo id fidian idsad muroud ru anen anen taloŋ dak i? 9-11 Id fidian tan asau ak sensen lo tupalu ya. Gug Anut mel tutubun igane yak id anen anen idsiganed muroud ru lo dubol dugo taloŋ da. Id aenkadi Patia, Media, Ilam na, agod aenkadi Mesopotemia, Judea, Kapadosia na tupalu ya. Aenkadi Pontas, Esia na, agod aenkadi Frisia, Pamfilia na dupalu ya. Aenkadi Igipta na, agod Libia san tan kilaken aenta Sairini giraŋen na, agod aenkadi Rom na dupalu ya. Aenkadi Juda mok, go aenkadi man Juda tia gug Juda sad ubou lo diau da. Agod aenkadi Krit na, aenkadi Arebia na dupalu ya. Id a fidian tupalu yan idsed awad anen anen taloŋ da.” 12 Iŋ fidian dumasa saian go ilod weiwei geig se ya, ago dugo sed nug dusumiani, “Kulob en san fun mok dugo mok ak i?”
13 Gug aenkadi aposel adi kukok ad diganeg dubol, “Tamol en nag wain tubun mi duluk boi.”
Pita tamolpein malan tubun ak ru irupidai a
14 Ago dugo Pita aposel 11 dida dumado yak imasag, awan tubun mi awad yabig ibol, “Aŋ Juda tamolpein, agod aŋ fidian Jerusalem na amado dan, kudom agure uyanan pe, mel en fun ŋufulale dop aloŋ a. 15 Tamol emaiak wain duluk abol den ta duluk na ya. Tia, gamu man 9 klok tidom lo mi a. 16 Ak niŋen o kankan agane. Abaŋ e ale den wagam profet Joel igo ibol:
17 “Anut ibol, ‘Saen wadan ipalu wo sumeik dop,
ŋai ŋaineg Urgun tamolpein fidian sad tinid fo ŋuwali idup diŋane wa.
Nanuk tamol ak, iŋ nanuk pein ak dam profet ru dubol ilasa wa.
Aŋanem pinein foudi ak malad ŋutun dile wa.
Aŋanem tamol busumadi ak ŋioŋ lo ŋioŋamin diŋane wa.
18 Saen an lo dop ŋaisag urat pein, urat tamol dam, tinid fo
ŋaineg Ur ŋuwali idup diŋane wa.
An lo dop iŋ dam profet ru dubol ilasa wa.
19 Ŋai keit lo kulob girager naon sensen ŋigane wan ŋukubiai ale wa.
Ago dop tan na dam kulob tutubun sensen ak kob igo woŋ ŋigane dop ale wa.
An man dar, yai, agod yaikas malan bilkas nuŋon ak ilasa wa.
20 Ad iŋsan naon ibilisap tidom oŋ ilasa dop,
kalam dam malan ibilisap, daran pe dar oŋ ilasa dugup,
Tubun en san nal tubun ak girager anda idu wa.
21 Ago dop tamolpein ensauta a gadiŋ lo Tubun en ibinawai o duwagiŋ dan,
iŋ tamolpein an fidian patud ipasi wa.’
22 “O Isrel tamolpein, kudom agure! Anut aŋ naom na ikubiaig ale yak, iŋ Nasaret tamol Jesus an uyan ipani a. An dugo woŋ i? Anut sen kulob girager agod urat dababai funfun kob igo woŋ tamol an lo idiri dugo ale na ya. Melmel an aŋ luluŋam lo tamol an tuon lo dilasa dugo aŋ an fidian aloŋ a. 23 Wagam mok Anut iloŋ uyanan ak, Jesus aŋ banim lo yau a. Aŋsem tamol saiadi ak dida atumanaig aŋ iŋsad binawek da Jesus aigim fo abali a. An aŋ mitep ago agane wo yan Anut wagam mi iloŋ uyanan a, man dugo, iŋ ilon nek ago yen a. 24 Gug mateŋ Jesus yabituani san tia tag Anut iŋ ifufunig, fon kumaen imasag mateŋ san madai tuon lo ipasi a. 25 Wagam mi Dawid sen dam Jesus niŋen o igo ibol,
‘Tubun ak pempem mi ŋai naog na itur da, an ŋai ŋile da.
Iŋ ŋai siŋireg na imado dugo dabai ipanag dan lo,
tamolpein ŋai dimiriranag san tia ya.
26 Ak niŋen o ŋai ilog tubun mi uyan dugo ŋai awag, ru ilo uyan san ibol ilasa da.
Ŋai tinig dam oŋ binawag an mala nouk lo mi ititiano imado da.
27 Man dugo, oŋ ŋaisag ŋutug Ades lo biseip ante ta yen na wa.
Oŋ oŋane Tamol Gun ak ulefuni dop ta igan na wa.
28 Oŋ ŋai kumaen san dal kubiai panag a.
Oŋ ŋai da tumado wak lo ŋai uyasusai dam panag pe tinig iŋanefute wa.’ ”
29 “O teig muroug, aŋ aloŋ ak ru e ŋurupaiaŋ den ru rumok, id tubud baged Dawid imat go disare ya. Agod iŋsan mutou yen dan pempem tile da. 30 Gug Dawid man profet ta. An niŋen o iŋ iloŋ ak, Anut ru lak na geig nam promis ipani an lo, mitep iŋsan malan kubulan ta kiŋ iganep, iŋsan aben iŋane wa. 31 Anut mitep dugo igane wan Dawid iloŋ tag, Kristus mitep fon kumaen imasa wak niŋen o ibol. Fun an lo dam ibol, Anut Kristus Ades lo ibiseig ta imado na ya, ago dugo tinin dam ta igan na ya. 32 Anut Tubun ak Jesus nek amaiak mateŋ lo ifufunig, kumaen imasa da ya. Agod mel an maŋ fidian sema malama lo mile ya. 33 Anut Jesus iŋaneg yaŋan tubun geig anda giraŋen won ak lo imado da. Anut gubak mi iŋanen Awan Urgun Jesus ipani wo promis ru ipani a. Aria, gamu promis an nuŋon ilasag Urgun iŋane ya. Ago dugo Jesus sen Urgun an maŋ tinima fo iwali idu ya, ago dugo aŋ mel en ale dugo kududom iloŋ a. 34 Aŋ aloŋ ak Dawid iŋsen kumaen panu na ta isuda na ya. Ago bo man iŋ igo ibol,
‘Tubud ŋaisag Tubun en irupei:
giraŋeg won ak lo masip, mado dugup,
35 oŋsa ager adi oŋ ŋie paen na ŋidirai a.’ ”
36 “Ago yak niŋen o tamolpein fidian Isrel ilon lo yak kuai tem ŋurupaiaŋ da, ru rumok e ŋurupaiaŋ den aŋ ilom lo rumok o yan amoi san fun man tia ya. Jesus nek a afunig aigim fo abali an, Anut ipilianig iŋ Kristus agod Tubun ak dam igane ilasa ya.”
37 Saen tamolpein ago duloŋ dugo, ru an bubed isue saian geig a, ago tag Pita aposel aenkadi dida dusumianaig dubol, “O teim taoma, maŋ dugo mok migane wak i?”
38 Agog Pita awad yabig ibol, “Fidian aŋanem aupasek anen anen patum apanip, apalup Jesus Kristus yaŋan lo suguek aŋane wa. Ago tap Anut aŋanem aupasek fidian ipare idup Awan Urgun ipanaŋ a. Urgun man iŋsan lou panek, an kawan naon an tia aŋane wa. 39 Promis e Urgun niŋen o yan man aŋsami, aŋanem malam kubulam sadi, agod tamolpein asau asau fidian iŋsad dam mi a. Awo, tamolpein a fidian idsad Tubud Anut igiai an promis an san nuŋon diŋane wa.”
40 Pita ru tubun mok ibol go ru kagin wei mi irupidai se ya. Iŋ ilod dibilisa wo dabai geig iganeg ibol, “Aŋ sem patum apasi. Kabelan tamol saiadi Jesus dufuni ak sad naon panek ipalu dan aŋ dam aŋane banau.” 41 Agog tamolpein wei mi Pita san ru ilod lo rumok go suguek diŋane se ya. Nal an lo tamolpein 3 tausen igo woŋ ilo rumok adi luad disa ya.
Kris sad naok naok
42 Kris foudi an aposel adi sad ru duloŋ o diau se ya. Jesus ilod isou san niŋen o kisaek mi dutumanig, dumado dugo, anaŋ dam kisaek mi diani dop dugudani se ya. 43 Aposel adi Anut san dabai lo kulob girager funfun digane se ya. Ago dugo tamolpein fidian durut saian geig a. 44 Ilo rumok adi fidian sad kankan kisaek mi a. Ta mel dugon tia dugo ta aman da man, turan mel lo katuk an ibinawi se ya. 45 Aenta iŋaned tan kilaken, melmel aenta dam didaeŋ lo didirig, san moni diŋaneg, tamolpein melmel lo katuk adi an dipidinaig sed ibinawai a. 46 Iŋ fidian ilod kisaek mi nal fidian gudanek digane wo tempel lo dutumani se ya. Iŋsiganed ab ate tet mi dutumanig yousai lo agod ilod kisaek lo dam anaŋ diani se ya. 47 Anut yaŋan diabisa dugo tamolpein ilo rumok adi sad kagin dileg yaŋad diabisa se ya. Agog Tubun en nal pempem tamolpein a patu pasek ipidinai dan ilo rumok adi luad te idirai se ya.