Korinita
Lenji Leta Theghewoniye
Pol Le Rorori
Utu iviva
Pol le vaghɨliya theghetoniye e tɨne vambe i yaku Epesas tɨne, iyava i roriya Korinita lenji leta iviva, kaiwae vuyowo na mevatharɨ vavana va ina ekelesiyako e tɨne. Ko iyemaeŋge othembe vama i roriya letako iyako na i variye weŋgi, mevatharɨko iyako vambe ina weŋgi. Iya kaiwae ghayamoyamo ŋgoreiye Pol va mbowo i wa weŋgi na ve yaku mbaŋa ubotu amba i njoghava Epesas. E le wako iyako e tɨne weiyaŋgiya gharɨgharɨ thɨ vegaithɨ wanaŋgi na i vakatha ghamɨghamɨna vuyowo e ghanjilughawoghawo (wako iyako utuniye iya iŋake, “mbaŋaniye va ya ghaona” 2 Korinita 2:1 e tɨne na tembe i govambwarava 13:2 e tɨne.) Mbaŋa i njogha Epesas na e ghereiye, amba i roriya Korinita lenji leta regha na i giya utu vurɨgheghe vavana weŋgi na i vathanavuŋgi. Letako iyako ma ina weinda, ko iyemaeŋge utuniye Pol i govambwara 2 Korinita 2:3,4,9 na 7:8-12 e tɨnenji. Letako iyako Taitus va i li.
Mbaŋa Pol i roiteta Epesas na i wa Masedoniya ele valɨvaŋga, amba ve vaidiya Taitus gheke i njoghama Korinita (2 Korinita 2:12-13 na 7:5-6). Taitus i giya Pol yanawae raloŋweloŋweghathɨ lemoyo Korinita e tɨne thɨ warari Pol kaiwae, ko iyemaeŋge vavana mbe inanjiwe thɨ vakavakatha thanavu raraitharɨ. Tembe ŋgoreiyeva, ravavaghare kwanɨkwan vavana mbe inanjiwe. Thiye thɨ yaŋgiwana Pol le kaiwo na thɨŋava Pol iye ma ghalɨŋae gharaghambɨ ŋgoreiye, mbe thiye eŋge. Iya kaiwae Pol i roriya letake iyake, i giya weya Taitus na tembe i njoghava Korinita na ve ligiya weŋgi.
E letake iyake tɨne Pol tembe ghamberegha i utuŋa yawaliye na le kaiwo utuniye (2 Korinita 2:126:13). Amalaghɨniye le gharethovu Korinita kaiwanji na le warari thiye lenji gharethovuwe i govambwara. Ravavaghare kwanɨkwan na lenji yoŋgi tembe i thombeva (Vaŋgothiye 10–12). Pol i govambwara weŋgi amalaghɨniye tembe nuwaiyava i wa weŋgi na ve thuweŋgi, ko iyemaeŋge nuwaiya mevatharɨko iya e tɨnenji wo thɨ vanamwe ko amba muyai ve vutha gheko (ŋgoreiya 12:20,21; 13:1-3). Tembe i utuŋava weŋgi na thɨ vivatharaweya mwaewo raloŋweloŋweghathɨ inanji Judiya e tɨne, thiye mbinyembinyeŋgu kaiwanji na mbala amalaghɨniye i bigi na ve giya weŋgi (Vaŋgothiye 8 na 9).
1
Ghino Pol, Loi le renuwaŋa e tɨne ya tabo Jisas ghalɨŋae gharaghambɨ. Weiŋgu ghaghanda Timoti wo roriya letake iyake na wo variye i ghaona e ghemi, ghemi ekelesiya Korinita weŋga, weimiyaŋgiya raloŋweloŋweghathɨ inanji Akaiya ele valɨvaŋga tɨne.
Wo naŋgo weya Loi Ramanda na ghanda Giya Jisas Krais gharenji weŋga na lenji gharemalɨlɨ i riyevanjara gharemina.
Pol i vata ago weya Loi le thalavu kaiwae
Ra tarawe weya Loi na ghanda Giya Jisas Krais Ramae. Iye Ramanda ragharevɨrɨ, na iye ragogonja nuwanda e bigibigike wolaghɨye tɨne. Iye mbaŋake wolaghɨye i gonja nuwame mbaŋa wo vaidiya vuyowo, na mbala ghime valɨkaiwame, thavala tomethi e ghanjivuyowo, thalavuko iya i giyako weime tembe wo gonjava nuwanjiwe. Wo vaidiya vuyowoke, kaiwae wo loŋweghathɨ Krais, na mbaŋa vuyowoke i tabo na laghɨye, Loi i gonja nuwame, na le thalavuko weime i tabo na laghɨye. Mbaŋa ghime wo vaidiya vuyowo, iyako ghemi ghamithalavu na ghamivamoru kaiwae. Na mbaŋa Loi i thalavuime na i gonja nuwame, iyako ghamithalavu kaiwae iya i vakatha na valɨkaiwami hu ghataŋaghathɨ vuyowoke iya ghime wo vaidike. Lama gharematuwo kaiwami i ndeghathɨ vurɨgheghe kaiwae wo ghareghare mbaŋa hu vaidiya vɨrɨke iyava ghime wo vaidike, ko ambane hu wo thalavuko iyava ghime wo woko.
Lama bodaboda, nuwameke nuwaiya hu ghareghare vuyowoko wo vaidi valɨvaŋga Eisiya e tɨne. Va wo vaidiya vuyowo laghɨye moli na i rovarivarime na lama vurɨgheghe mava valɨkaiwae, na wo renuwaŋa mbema emunjoru ne wo mare. Emunjoru e gharemeke lama renuwaŋa va woŋa emunjoru ne wo mare. Ko iyemaeŋge vakathako iyako va i yomara weime na i vakathaime thava wo vareminjeime ghamamberegha, ko mbe Loi eŋgevara, iye i vaŋguthuweiruŋgiya ramaremare, ghamberegha ra vareminje. 10 Vuyowoko iyava wo vaidiŋgiko valɨkaiwae moli wo mareŋa, ko iyemaeŋge amalaghɨniye va i vamoruimewe, na tembe ŋgoreiyeva mbaŋako iya e ghamwameko tembe ne i vamoruimeweva. Iye ghamberegha wo vareminje, iye ne i vamoruimeva. 11 Na ghemi e lemi naŋgona ne hu thalavuime. Mbaŋa lemoyo thɨ naŋgo weya Loi ghime kaiwame, amba lemoyo ne thɨ vata ago weya Loi mbaŋa iye weiye le thovuye i vamoruimeva.
Pol le renuwaŋa le wa Korinita kaiwae
12 Lama ghamba sirari iyake: e gharemeke tɨne maya moli wo ghareghare ghamathanavu weŋgiya gharɨgharɨ i rumwaru na i emunjoru Loi e marae. Ma wo goru weya thimba i mena e yambaneke, ko iyemaeŋge lama vurɨgheghe i mena Loi le thovuye e tɨne. Ghamathanavu ŋgoreiyevarako weŋgiya gharɨgharɨke wolaghɨye e yambaneke, na ghamathanavu weŋga ŋgoreiye molivara iyako. 13-14 Lemi letana e tɨnenji, utuutuko iya hu vaona na hu ghareghare ghanjirumwaru iya wo roriŋgiya na e ghemi. Ma gharumwaru reghava ina weŋgi. Lo gharematuwo iyake: Hu ghareghare wo wagiyawe mbala hu ghareghare lemi ghamba sirari ghime ŋgoreiye lama ghamba sirariya ghemi mbaŋa ne Giya Jisas i njoghama. 15 Kaiwae emunjoru ya munje ghino lemi ghamba sirari, ya vakatha lo renuwaŋa na yaŋa iviva wone wo ghaona e ghemi, na iyako kaiwae mbala mbaŋaiwo vara hu vaidiya thalavu. 16 Lo renuwaŋa va nuwaŋguiya wo lavutha e ghemi mbaŋa ne wo wa Masedoniya na tembe ŋgoreiyeva ne wo njoghama, mbala hu lagiya thalavu e ghime lama ghɨnagha Judiya kaiwae. 17 Ŋgoroŋga? Hu renuwaŋa mbema ya utu bwagabwagaeŋge na ya mwanavɨmwanavɨ lo renuwaŋa ŋgoreiya yambaneke gharɨgharɨniye ghanjithanavu, na e ghaeŋguke njimwa ya varae yaŋa, “Mbwana,” na e ghareŋguke ya botewo yaŋa, “Nandere.”? Ma ŋgoreiye! 18 Loi iye rautuutu emunjoru mbaŋake wolaghɨye, na tembe ŋgoreiyeva lama utuutu e ghemi i emunjoru, na ma e ghaemeke njimwa woŋa, “Ŋgoreiye,” na e lama renuwaŋa tɨne woŋa, “Nandere.” 19 Kaiwae Loi Nariye Jisas Krais, iyava weiŋguyaŋgiya Sailas na Timoti wo vavaghareŋa e ghemi, iye ma “Ŋgoreiye,” na mbaŋara vara weiye “Nandere.” Ko iyemaeŋge amalaghɨniye valɨkaiwae ra vareminje, iye mbe “Ŋgoreiye” eŋge. 20 Ra ghareghare emunjoru Loi le dagerawe wolaghɨye i vamboromboro weya Krais. Krais e tɨne thiye “Ŋgoreiye.” Na Krais e tɨne raŋa “Mbwana Ŋgoreiye!” na ra tarawe weya Loi. 21 Loi ghamberegha i vavurɨghegheŋainda ghemi na ghime na ra ndeghathɨ vurɨgheghe weya Krais. Amalaghɨniye va i tuthinda, 22 na tembe ŋgoreiyeva i giya Nyao Boboma weinda i yaku e gharendake, iyake le nono ghinda le gharɨgharɨ. Kaiwae Nyao Bobomako iyako kaerova ra wo, ra ghareghare bigibigike wolaghɨye iya Loi va i dageraweko kaiwanda nevole tembe vara wova.
23 Loi e marae ya dage emunjoru e ghemi lo rɨghe na ma ya ghaona e ghemi Korinita e tɨne iyake: ma nuwaŋguiya tembe ya vakathava ghamivuyowo mbaŋa ne ya ghaona na ya goviya ghamwami. 24 Ma ŋgoreiye nuwameiya wo mbaroŋaŋga na ghamithanavu ŋgoreiye wo dage weŋga. Iyemaeŋge weimaŋgiya ghemi ra kaiwo na regha lemi warari kaiwae, kaiwae wo ghareghare e lemi loŋweghathɨna hu ndeghathɨ vurɨgheghe.