PILLIMONO
Pollone Ye PILLIMONO Pepá Topa Sirimu Bokumu
Pollone I Pepá Topa Sirimumunga Ungu-Pulu Mare
Pollo kinia yuni pepá topa sirimumanga ungu-pulu mare inia yakondo gomo 676 molemo.
‘I pepámo Romo ka-ulkana pepale torumu.’ ningu pilielemele. ‘Epesasi kinia Pillipai kinia Kollosi kinia aku taonomanga yombomanga pepáma yu ka-ulka seluna pepale torumula.’ ningu pilielemele.
Pillimono yu ye-awili molopa yombo mare yunga kongono we sendeko méle kalolima naa lili yomboma nokopa molorumu. Yunga kongono we sendeli ye se, Onesimasi nili se, kowa pumba Romo purumu kinia Pollonga ungumu pilipa konopu topele topa ‘Karasi sika.’ nimba kuru mondorumu. Pe yuni Pollo nokorumu.
Kongono we sendeli yomboma kowa pulimili kinia Romo-gapomanomonga ungu-mane sene nimbale: ‘Aku siku mongo lingímunga “Pundu tangi.” ningu toko kondangi.’ nimba perimu. Aku-sipa na-kolo Pollone Onesimasi konopu mondopa Pillimono pepá topa sipa nimbale: ‘Yu kelko ulkana liku “Ano.” ningu taka leko nokani.’ nirimu. Aku-na-kolo Pollone Pillimono aku sipa mele mawa sembando sumbi sipa naa nimba u ungu mare we nirimumunga ungu marenga ungu-pulumu kála sepo pilielemolo. Kowa purumu ye Onesimasinga imbimu kolomongo-kanga 10 pulu polopa nimba, pepámo topa pora simbando kamu ungu se mawa serimu.
Ya ungu-pulumu pora nikimu.
1
1-25 pali
Pillimononga Kongono We Sendeli Kendemande-Yemo U Talopa Lepa Purumu, Aku Yemo Pe Konopu Topele Topa Karasinga Yemo Molorumu Kinia Pollone Pillimono Molorumuna Kelepa Lipa Mundorumumunga Ungumu
1-3
Pollone Pepámo Tombando Pulu Polopa Torumu Ungumu
1-2 Na Pollo, Karasi Yesusinga kongono sendeliomonga ka-ulkana pelio yemo, na kinia olionga genu Timoti pea molopole i pepámo topo sikiru.
Oltonga paa pulu lemó ye Pillimono, tapu topo kongono selemolo yemo, nu kinia, olionga kemulu Apia keme, olio pea kopu sepo opa seli ye Akipasi keme, Karasinga yombo talape Pillimono nunga ulkana maku tolemele yomboma kinia, ono i pepámo topo sikiru.
Olionga Lapa Pulu Yemo kinia Ye-Awili Yesusi Karasitolone ono we kondo kolko, ‘Ono konopu pe nipili taka leko molangi.’ niengili.
4-7
Pillimono Ungu Peangama Sepa Molorumu Mele Pilipale Pollone Konopu Sipa Pulu Yemo-Kinia “Ange.” Nirimu Semanemo
4-5 Nanga pulu lemó ye ⸤Pillimono⸥, nu Ye-Awili Yesusi ⸤molopa, olionga nimba senderimu mele sendelemo akumu⸥ ‘Sika.’ ningu kuru mondoko, Pulu Yemonga yomboma pali konopu mondoko moleno mele pilipuli Pulu Yemo-kinia ungu nimbúndu alieli nunga mawa sendepo, nanga Pulu Yemo-kinia “Ange.” niliu. Pulu Yemo-kinia nunga mawa sendepole, ‘Nu kinia olio ‘⸤Yesusi Karasi⸥ sika.’ nimbu kuru mondolemolomonga konopu seluna pupili kopu sepo molemolo ulumuni nu paa pilipa kondolimu sipili. Aku pilipa kondolimu pemba kinia Karasinga méle peanga olio silimú limulúma kamu tondolo munduku piliani.’ niliu. Ango, nuni Pulu Yemonga yomboma konopu mondokole konopu peanga pepili molonge unguma senderinu mele pilipuli na konopu sipu konopu paa tondolo pupili molio.
8-22
Pollone Pillimonondo “Onesimasi Kelko Sukundu Likuli ‘Nunga Kandi-Genu Mele Molopili.’ Ni.” Nirimu Ungumu
Nane nu ungu se ‘sei.’ nimbu mawa sembó sekero akumu nu kinia olto Karasinga yetolo molembolomonga ‘Nu paa sika sei.’ nimbu tondolo mundupu manda nilka-na-kolo ⸤nuni seleno mele nikiru aku siku molko Pulu Yemonga yomboma kondo kolko seleno⸥ akumunga ⸤aku sipu naa nimbú⸥. Konopu mondoli ulumuni olto lipa sere lendepa ‘Seluna molambili.’ nilimú-na aku sipu molembolomonga nane ⸤‘Nu i-siku sei.’ nimbu tondolo mundupu naa nimbu, ‘Ungu se sani.’ nimbu⸥ nu taka lepo mawa sembó sekero. Sika na Pollo, na ye-andamo, Karasi Yesusinga kongono sendeliomonga ka-ulkana pelio, na aku sipu yemo moliomonga 10 nanga malo Onesimasinga mawa sendepole ‘nuni yu seko kondani.’ nikiru. Na ka-ulkana pepole yu mane sirindu kinia yu ⸤konopu topele topa⸥ ‘Sika.’ nimba kuru mondopa ⸤Karasinga yemo⸥ molorumu mele molemomonga kiniá yu nanga malo ⸤mele⸥, na yunga lapamo molio. 11 U sika yuni nunga kongono peanga se mimi sipa naa senderimu-na-kolo kiniá nu kinia olto pea yuni mimi sipa lipa tapondopa kongono sendemba yemo molemo.
12 Kiniá yu nu molenona “Kelko pu.” nikiru-na-kolo pukumu kinia na paa konopu umbuna sekemo. 13-14 Nane semane peangamo topo silipu andorundumunga ka siringi ka-ulkana pelio kinia Onesimasini nunga kolali sepa “Na liku tapondoko ka-ulkana nokani molou.” nilka na-kolo ‘nuni paa sika na liku tapondani kene nu molenona yu u naa opili. Yu pipi sipu nunga nimba na lipa tapondopili.’ nimbu we ta nimbu naa nimbú. ‘Nu nunu konopumuni pilkuli sani.’ nimbu ‘nu molenona yu opili.’ nikiru. ⸤Nu molenona ombá kinia yu pe molopa sembá mele nu nunu piliani.⸥
15 Pe nu molonina kelepa sukundu omba nu-kinia kamu-alieli molombando Onesimasi u wallo-kolte nu molenona mundupa kelepa kolea senga purumunje. 16 Aku-sipa na-kolo aku liemu yu nunga kongono we sendeli kendemande-yemo mindi molombando aku sipa ulumu wendo naa orumu. Yu sika nunga kongono we sendeli yemo molemo-na-kolo kiniá akumu mindi mólo. Kiniá nunga gena kepe molomba kinia nuni yu paa konopu mondonimunga aku sipa mele ulumu wendo orumunje. Nane Onesimasi paa konopu mondopo ‘Yu nanga paa sika kandi-genunje.’ konopu lelio. Pe yu kinia nu pea Ye-Awilimunga genungulutolo molongelemonga kepe, yu nunga gena molopa kendemande-kongonomo sendepa kondombamonga kepe, ‘nuni Onesimasi yu konopu mondoni mele olandopamo, nane yu konopu mondolio mele maniandopa.’ konopu lekero.
17 Akumunga, ‘Na nu kinia pea Karasinga kongonomo kopu-sepo selembolo.’ konopu leno liemu na olka kinia “Pea molambili ou.” nilina mele yu ombá kinia “Pea molambili ou.” nieni. 18 Yuni nu-kinia ungu se sepa kinjerimu liemu, molo yunga pundu se nu-kinia gilierimu liemu akuma Onesimasindu “Pundu tou.” naa ningu, siye kolani. Aku punduma pali nane tombo kene nanga imbi tondani. 19 Na Pollo, nanu aku punduma tombomonga nanga kimuni nanga imbimu i pepána tokoro. Aku-sipa na-kolo nu na-kinia pundu se gilimú, ‘aku pundumu naa nindu liemu nu we pilku moleno.’ konopu lekero. Nu na kinia pundu gilimú akumu, nane nu lipu tapondorundumunga nu konde molko kondoko mindi puni ungumu nu kinia pelemo kanumu. 20 Ano, ‘Ye-Awilimunga kongono se sendambo.’ ningu na liku tapondoko ungu peanga se sani. Olto Karasinga yetolo molembolomonga nuni na konopu peanga pepili ungu se sani.
21 Na paa mimi sipu pilkiru: ‘Nane “Sei.” nikiru ungumu nu paa pilku liku sení.’ konopu lepole i pepámo nu topo sikiru. ‘Nane nu “⸤Onesimasi kinia⸥ sani.” nimbu mawa sekero akumu nuni paa olandopa yu liku tapondoko sení.’ konopu lekero.
22 Na ungu se pea mawa sekerola: Na pilkirumu, ‘Onone Pulu Yemo kinia mawa selemele mele yuni pilipale ‘Na ono molemelena wambo.’ nimbá.’ konopu lekero. Akumunga ‘na nunga ulkana ombo pembo kene suluminia se seko wamoko taltondani.’ ⸤nimbu mawa sekero⸥.
23-25
Pollone Pepá Topa Pora Sipale “Molou.” Nirimu Unguma
23 Epaparas, yu Karasi Yesusinga kongono senderimumunga yu ka siringi, kiniá olto pea ka-ulkana kopu sepo pelembolomo, yuni “Nu manda molenoye?” nimba, nimba mundukumu. 24 Na kinia pea kopu sepo kongono selemolo ye Mako kinia Arisitakas kinia Dimasi kinia LLuku kinia onone “Nu manda molenoye?” nikimilila.
25 Ye-Awili Yesusi Karasini ononga minima we kondo kolopa molopili molangi.
 
⸤Aku pea nikiru.⸥