19
Kolomongo Awili 15 Yemboma Kinie Kamu Umbune Pemba Mele Angello Yepoko Pakerane Mele Yepoko Pakera Ambolko Angilieringimenga Temanemo
Kolomongo Awili 16 Pulu Yemonga Mumindili Kololi Ulume Mingi Yepoko Pakera Sukundu Perimu Temanemo (Te 16:1, te 16:3, te 16:4, te 16:8, te 16:10, te 16:12, te 16:17.)
Kolomongo Awili 17 Ambo Waporamonga Temanemo
Kolomongo Awili 18 Kolea Awili Bepillono Kamu Keri Lierimu Temanemo
19:1-10 Pulu Yemo Kapi Ninge Ungume
19:1-5 Kolea Bepillono Kamu Keri Lierimumunge Yemboma Konopu Siku Pulu Yemo Kapi Ninge Temanemo
1-2 Aku ulume pora nirimu kinie pe pilierindu kinie mulu koleana yembo awisili ungu nilimele mele ungu te wendo orumu pilierindu. Akumene ru ningulie ningendo:
“Pulu Yemone ulume pali
paa sike sumbi sipe apurupe telemo.
Wapora topa imbi paa ola mololi ambomo yuni
wapora toli ulume terimumuni
ma koleana yemboma ‘molko kenjengi!’ nirimumunge
aku ulu terimume Pulu Yemone pilipe apurupe
‘Yu mindili nopili.’ nirimu.
Aku ambomone Pulu Yemonga kendemandema
topa kondorumu akumenga mememanga
Pulu Yemone pundu tondopa mindili sirimu akumunge
yu kapi nimbu imbi lipu ola mundundemili!
Mindili nolemela aulkena
lipe tapondopa wendo lipe
yu-kinie molko kondonge aulkena
lipe mondolemo ulumu* bokumunge alsena anjokondo “21. kisim bek”. yu-kinie pepa,
yunge imbi paa olandopa molopa,
tondolo pa telimu yu-kinie pepa
yu melema pali nokomba nambamo kinie
engemo-selo pelemo yemo.”
niringi.
3 Altoko ru ningulie ningendo:
“Yuni yu topa kalomumunge ilie
alieli omba mindi pelemomonga
Pulu Yemo kapi nimbu
imbi lipu ola mundundemili!”
niringi.† inie yakondo 4:11.
4 Ye nomi wane paono po‡ tokapu telu (24) kanumu; inie yakondo 4:4 kananila. kinie, mele konde mololi kise kinie, eno ye nomi kingi polona molemo Pulu Yemonga kumbikerena manie puku tamalu peko, yu kapi ningu imbi liku ola mundundukulie ningendo:
“Aku sipe tepili.
Pulu Yemo kapi nimbu
imbi lipu ola mundundemili!”
niringi.
5 Kanu kinie ungu te ye nomi kingi polona wendo ombalie nimbendo:
“Eno yunge kongono yembo kendemande
molemelema pali,
‘Nu olionga ye awilimu.’ ningu
pipili kolko yunge ungumu taka liku
pilku telemele yembo awilime kepe
imbi naa mololime kepe
enone olionga Pulu Yemo kapi ningu
imbi liku ola mundundengi.”
niringi.
19:6-10 Kongi Sipisipi Walomo Ambo Limbemo Langi Awili Teko Koyonge Temanemo (19:1-10 pali kanani.)
6 Pe kelepo pilierindu kinie ungu te, yembo awisilini ungu panjilimele mele ungu te, no awili topalie ungu nilimo mele molo mulú tondolo kilkala nilimo mele ungu te pilierindu. Akumene ru ningulie ningendo:
“Olionga Pulu Ye Awili Tondolo Pepa
Namba Awili Olandopamo Lemo Yemo
kamu ye nomi kingimu molopa
melema pali nokolemomonga
yu kapi nimbu imbi lipu ola mundundemili!
7 Sipisipi Walomo§ 9 bokumunge alsena anjokondo “44.3. Pikinini Sipsip Bilong God”. ambo limbe walemo
kamu wendo okomo.
Yu ambo limbemone ‘Na omba limbe.’ nimbe
nokopa molemomonga
olio konopu peanga pepili konopu sipu
‘Papu terimu.’ nimbu imbi lipe ola mundundemili!
8 Pulu Yemone
‘Mulumbale paa peanga tondolo pa tepa
kake telime pakopili.’ nimbe simu.”
niringi. (Mulumbale peangamanga pulumu Pulu Yemonga yembomane ulu peanga telemele ulume yuni kanopa ‘ulu sumbi nilime’ nimbe kanolemo ulume.)
9 Kanu kinie angellomone nando nimbendo: “Ungu nimbomo pepána imbi tani: ‘Sipisipi Walomo ambo limbe langi koyongena Pulu Yemone yembomando ‘Wangi.’ nimbé yemboma eno malo.’ aku mele pepána tou.” nirimu. Aku nimbelie kelepa ungu te pea nimbendo: “I ungume paa sike Pulu Yemonga ungu sikema.” nirimu. 10 Aku nirimu kinie pilipulie angellomonga kumbikerena tamalu pepo kapi nimbo terindu nalo yuni nando nimbendo: “Nu aku siku naa tei! Nunge angenalimene Yesusinge ungume yemboma ningu silimelema kinie nu kinie na kinie olio pali Pulu Yemonga kendemandema molopo kongono tendelemolo kene nuni Pulu Yemo mindi popo toko kapi nieni. Pulu Yemonga ungu nimbu silimolo akumunge pulumu Yesusinge ungume nimbu silimolo ulumu akumunge ‘nu kinie angenali kinie na kinie olio peama yunge kendemandema molemolo.’ nikiru.” nirimu.
19:11-21 Ye Te Kongi Ote Kurumulúmunge
11 Kanorundu kinie mulu koleamo nangape toli lierimu kanorundu kinie kongi ote kurumulú te angilierimu, akumunge bulu mingine ola ye te molorumu, akumu imbi leko ‘Kongono Ambolopa Nokopa Kondopa Konopu Alowa Naa Teli Yemo’ ningu, ‘Ungu Sikema Mindi Pelemo Yemo’ nilimele. Yu kote pilipe sumbi sipe apurupe we naa lipe tapondolemo.* Wanetoko sisitame naa telemo. Yu we ‘Opa teambo.’ nimbe naa telemo. Ungu pulu te pelemo kinie pilipelie telemo. 12 Yunge mongoselo tepe mele tondolo pa tepa, ye nomi kingime wanie kiraono pakolemele mele wanie kiraono awisili yunge pengena pakolemo. Yunge kangine imbi te molemo, aku imbimu yuyu pilimo yembo tene lupe naa pilimele. 13 Yu mulumbale meme kaloli sulu te pakolemo. Yunge imbimu Pulu Yemonga Ungumu.† Jono 1:1, Jono Kumbi Lepamo 1:1. 14 Mulu koleana amime kongi ote kurumulúmenga molko yu lombili punge puringi, akume mulumbale kake paa peanga mare, kalaro naa mololime pakoringi. 15 Yunge kerena ma koleana yembo talapema pali tomba opa teli lou-pulse paa nee noli te pelemo.‡ ya 19:21, inie yakondo 1:16.
‘Yu yembomanga pali ye awilimu molopa
yemboma paa tondolo mundupe
nokopa molomba.’§ Konana 2:9.
Pulu Ye Olandopa Tondolomonga mumindili paa olandopa kololi ulumu pelemo waene mongoma kimbuni kambilipe nakele-makele telemo. 16 Yunge mulumbale sulu akune kinie yunge porona kinie imbi te molemo, akumu isipe:
YE NOMI KINGIMENGA YU YE NOMI KINGI PAA OLANDOPAMO;
YE AWILIMENGA YU YE PAA AWILI OLANDOPAMO.
nimbe molemo.
17 Kanorundu kinie enana sukundu angello te angilierimu, akumuni mulune mangoko andoringi keramando tondolo ru nimbelie nimbendo: “Pulu Yemone langi awili koyomumu nangi waa.” nirimu. 18 “Ye nomi kingimenga onoma kepe, amimenga ye nomimenga onoma kepe, ye enge nilimenga onoma kepe, otema kinie enonga bulu mingine ola molko andolemele yema kinie enonga onoma kepe, yembomanga pali we molemele yemboma kepe, kongonoma we tendeko mele kaloli naa limele kendemandemanga kepe, imbi naa mololime kepe, imbi mololime kepe, enonga onomanga míndime nangi waa.” nirimu.
19 Kelepo kanorundu kinie mele-takeramo kinie mana ye nomi kingime kinie ‘Kongi ote bulu mingine ola molemo yemo kinie yunge amime kinie opa teamili.’ ningu maku toringi. 20 Nalo Pulu Yemone ungu umbu tondorumume naa pilipe ungumu we kolo topa yando nimbe sirimu ye kanumu mele-takeramone lipe tapondorumu-ne ulu tondolo awisili terimu akumu kinie, mele-takeramo kinie, elo ka siringi. Ou ulu tondolo terimu ulumene yembo mele-takeramonga makomo ‘kalune molopili.’ ningu,* inie yakondo 13:16. yu none teli te teko mimi teko anjeringimu popo toko kapi niringi kanu yemboma kondi torumu. Yu kinie mele-takeramo kinie ka sikulie, kou sallapa† inie yakondo 9:17*. tepe nomba kondopa perimu muru‡ Giriki ungune kinie Ingillisi ungune “nomú” nikimu nalo akune no naa molorumu, tepe mindi molorumu. 9:1, 20:1 “muru” nilimo mele lupe. Inie anjokondo 20:10, 21:8 kananila. paa awiline liku manie mundoringi. 21 Kongi ote bulu mingine ola molorumu yemonga kerena opa teli lou-pulse perimumuni wema pali topa kondorumu, kanu kinie enonga onomanga míndime keramane ongo nongo eno olone koloringi.
*19:1-2: bokumunge alsena anjokondo “21. kisim bek”.
†19:3: inie yakondo 4:11.
‡19:4: tokapu telu (24) kanumu; inie yakondo 4:4 kananila.
§19:7: 9 bokumunge alsena anjokondo “44.3. Pikinini Sipsip Bilong God”.
*19:11: Wanetoko sisitame naa telemo.
†19:13: Jono 1:1, Jono Kumbi Lepamo 1:1.
‡19:15: ya 19:21, inie yakondo 1:16.
§19:15: Konana 2:9.
*19:20: inie yakondo 13:16.
†19:20: inie yakondo 9:17*.
‡19:20: Giriki ungune kinie Ingillisi ungune “nomú” nikimu nalo akune no naa molorumu, tepe mindi molorumu. 9:1, 20:1 “muru” nilimo mele lupe. Inie anjokondo 20:10, 21:8 kananila.