YONI yana leta nagona
Hida Yoni yana leta nagona badi tovetumagana melala tulina tulina Esiya ana fafaliya himiyami-ma agaidiya giꞋetoladina. Yoni givesilakai ada Efeso againe gimiyami tu giꞋetoladi.
Bana Yoni yana inuba luhei. SaꞋeyana ma tovetumagana giluꞋageyedi be Yaubada Tauna kadu Natuna Yesu Keliso agaidiya hinamiyaveꞋavina. Yaubada againe hinuwanuwa lakahina amine, meda gilubodadi be tobohiyadiyao agaidiya hidanuwanuwa lakahina. Kadu yana inuba anavelu ma vehawala veꞋalololona faꞋina giꞋagoꞋabiyedi. Badi toveꞋalololo higahe vaita wowoda gaitoma koyona. Kaliva wowoda koyona yana abaga faꞋina Keliso keke velemona ada nuya gidaꞋoseni be gidavekaliva. Yana miyami vaita kaliva amine tu keke velemona wawowona kadu keke velemona Yaubada Natuna. Kadu higahe vaita nuwahuya nuwanuwa hawahawahegena gitubutagona ada dewa yegayegana keke hidanuwenuweni. Au hidedemi badi Keliso nibaineyao hivehawala faꞋina, Yoni nuwanuwana yadi fwaya nuwanuwa velemoꞋena againe ginayawelina, ada Yesu yana vekaliva kadu veꞋahawahawahega faꞋina gigahevagadona. Leta dobona hidede amine.
Leta ana nuwanuwa nafona. 1:1-4
Mahalina ana dewa tulina, uyuyu ana dewa tulina ma. 1:5-2:17
Keliso nibaineyao yadi fwaya faꞋina giꞋagoꞋabiyedi. 2:18-29
Yaubada natuneyao kadu Setani natuneyao adi nuwaveꞋuveꞋu faꞋina. 3:1-4:6
Yaubada yana nuwanuwa hawahawahegana faꞋina veꞋahawahawahega natuneyao adi lauboda. 4:7-5:5
Yesu Keliso inubana ana tohawavemogatala kadu yawai-vagata faꞋina. 5:6-21
1
Tomiya-vagata ana egana Bona, higa Yesu Keliso faꞋina
Yoni gilukahihi.
Keke gavana faꞋina tu Bana Bona yawai-vagata velemoꞋena inubana ma faꞋine ime afositolo avenuwaꞋata. Boi tuwai-moꞋena babi ana abaveꞋinuba ana toveya, Bana Bonai-nadi gimiyamiya-vagata, ada muliya kaliva-moꞋena yana gahe ime anogalina, kadu taumeyao matameya aꞋitana, kadu taumeyao nimameya aꞋabina. E, kaliva ana egana Yawai-vagata velemoꞋena Tauna giꞋivemogatalina be ime aꞋitana. Ada gavaimi aꞋitana amine aꞋawatalatalainemi kadu avenuwaꞋatami. Ada Bana Yawai-vagata amanadi boi tuwai-moꞋena Tamada buye himiyamiya-vagata, ada muliya ime agaimeya Tauna giꞋivemogatalina. Ada ime Bana Yawai-vagata velemoꞋena aꞋitana kadu yana gahe anogalina, ada Bana faꞋine avenuwaꞋatami. Au hidedemi avenuwaꞋatami be higa imeꞋeyao Badi Tamada kadu Natuna Yesu Keliso buye avevido avedayaga amine, meda kadu omiꞋiyao mena vevido-nadi wanaꞋayaꞋayaunena. Ada keke gavana faꞋina tu omi agaimiya gaꞋetoladi be higa moyaꞋaida kanavevido kanavedayaga yo kanavemwamwala-moꞋa. Yo 1:1-2,4 Yo 1:14
Mahalina againe kananunudadana.
Tu hida gahe Yaubada Natuna againe anogalina ada omi avenuwaꞋatami, higa Yaubada Bana mahamahalinaga. Uyuyu keke tamo Bana againe gidamiyami, keke. KaꞋi kanagahe kanagayo, “Iya BanaꞋe buye avevido,” kaꞋi hidede amine kanagahe tu nuwanuwa uyuꞋuyuyuna againe kanunudadana, au kafwaya kadu keke nuwanuwa velemoꞋena amine kadahuluhuluva. Tu Yaubada mahalina againe gimiyamiya-vagata. KaꞋi ide tovetumagana Bana amine mahalina againe kanunudadana, au imeꞋeyao kadu omiꞋiyao moyaꞋaida ada ayauna kadu yada nuwanuwa saꞋeyana kamimiyami, ada Yaubada Natuna Yesu dayagina gimadu-ma againe aseꞋaseda gikolakolana be yada nuwanuwa koyona moyaꞋaina givaihegena.
KaꞋi ide kanagahe kanagayo, “Keke nuwanuwa koyona aseꞋasekuya gidadauda,” au taudeyao agaideya kaveꞋalololo kadu Yaubada yana nuwanuwa velemoꞋena keke nuwahinagedeya gidadauda. KaꞋi yada dewa koyona Yaubada matane kanayauyauna, au Bana giwonadabadaba amine ginafaisewa kadu yana nuwanuwa tunutunugina amine ginahuluva, higa yada dewa koyona ginayawelina kadu aseꞋaseda ana nuwanuwa koyona moyaꞋaina ginakolahegehegena. 10 KaꞋi ide kanagahe kanagayo, “Keke tamo dewa koyona gadafaisewani,” au vaita kadagahe kadagayo, “Bana Yaubada tofwaya,” faꞋina BanaꞋe kaliva faꞋideya ahe gigahe vaita moyaꞋaida tokoyona. E, kaꞋi yada dewa koyona kanahawavekemena digo, Bana bonana keke aseꞋasedeya gidadauda. 1Ti 6:16, Ye 1:17 1Yn 2:4 Hi 9:14, Ha 7:14

1:4: Yo 1:1-2,4 Yo 1:14

1:10: 1Ti 6:16, Ye 1:17 1Yn 2:4 Hi 9:14, Ha 7:14