FITA yana leta nagona
Hida leta Fita tovetumagana fafali tulina tulina agaidiya vaita hawahawala amine himiyami-ma agaidiya giꞋetoladina. Fafali-dina adi egana giyakahina. (1 Fita 1:1) Tu Fita tauna melala saꞋeyana givewagana Babiloni ma againe gimiyami tu giꞋetoladi. Melala-moꞋena Loma tu Loma kabemani kalivadi Kelisitiyani hiveꞋumagigiyedi faꞋina, mena melala kikaiwabuna egana sevasevauyana amine giyakahina. (I Fita 5:13)
Badi tovetumagana vita tulina tulina Keliso ana muliya faꞋina hinuhagana, ada Fita nuwanuwana aseꞋasedi ginakivevatuna be higa yadi wavemwamwala hinaꞋatuvefaꞋila. Adi kibababala ana nuwanuwa kadu Yesu yana atuvefaꞋila vita agaidiya ada yana yewaꞋela faꞋina nuwadi gitalafolefolena be medema ana nuwa-nunauya againe faiwala hinanuhagana. Kadu giluꞋageyedi be dewa mahamahalina Keliso ana tomuliya gilubodadi-ma amine hinahuluhuluva. Leta dobona hidede amine.
Lusiule. 1:1-2
Yaubada yana kibababala faꞋina nuwadi gitalafolena. 1:3-12
Dewa mahamahalina faꞋina giluꞋageyedi. 1:13-2:10
BonaꞋabi tovetumagana adi lauboda, kabemani agaidiya 2:11-17, toveꞋagetoga yadi tovehimeya agaidiya 2:18-25, vevine moganediyao agaidiya. 3:1-7
Keliso ana muliya faꞋina veꞋumagigi ana nauhaga ma. 3:8-4:19
ToꞋekelesiya adi lauꞋage tulina tulina. 5:1-11
Lukafoi tulina tulina. 5:12-14
1
1 Yo siule omi Yaubada giluwafami be hida babi againe hawahawala amine wamimiyami-ma kalivai-mina. Iya Fita Yesu Keliso yana kabu gavaina be gaveꞋafositolo-ma yami leta gaꞋetoladina be wanaꞋitana. Badi Yesu againe hivenibaina-ma hiwavimi be mali fafali agaidiya waꞋabinauna, fafali-dina Fonitasi, Galesiya, Fafadosiya, Esiya kadu Bidiniya. 2 Tuwai-lokalokana Yaubada Tamada giluwafami kadu givegide-vagahimi ada AluꞋaluwa Mahalina yana ihagihagi againe mahamahalimiyao wamimiyami. Hidedemi giluwafami be higa Yesu Keliso bonana wanaꞋabiꞋabina ada Bana dayagine ami bwanene ginakolana.
Yaubada yana nuwadoga kadu yana aseniwalova ana ayauna againe wanatutuveguvegulami. 2Te 2:13, Ef 1:4, Hi 12:24
Yesu Keliso againe kanavetumaganadona yo
ada kibababala kananuhagana.
3-4 Keke gavana faꞋina tu Yaubada Bana yada Kaiwabu Yesu Keliso Tamana ana egana kanakilakahina, kanakilakahi-moꞋena Yaubada gihinekalikaliyeda faꞋina, Yesu Keliso alikeya gisivemididini-yo katubuga-havagi be yawaida ivaguna kanuhagana. E, yada abaluveꞋavina miyamiya-vagahina kavaina, ada Yaubada ada duꞋu gikidewedewena be lobameya giꞋitaꞋitaveꞋavina. Mena duꞋu-nadi ana ita yamumunaga, keke ginakoyo kadu keke ginahavaini. 5 Yesu Keliso wavetumaganena faꞋina Yaubada yana faiwaleya giyavayavami ada ginanunauwena tu gaitoma moyaꞋaidi koyodi agaidiya ginakibababaleda. Ada ahe gikidewadewa-vagata be aimo tova ana abalauyabu againe kibababalai-nadi ginaꞋivemogatalina. 6 Medema faꞋina wanavemwamwala lakahina. Tova hidevama kaꞋi gilubodami be badi Yesu hivenibainena-ma yadi veꞋumagigi ana vita tulina tulina agaidiya aseꞋuꞋaulolo waꞋayaꞋayaunena. Tu mena vitai-dina keke hinaduva-vagata. Tova hidevama waꞋaseꞋuꞋaulolo nonogana ami duꞋu Yaubada gikidewedewena be walulubodena-ma faꞋina wavemwamwala. 7 Yaubada mena vitai-dina agaidiya gihawahegemi be higa yami vetumagana ana galuvaluva againe kaꞋi velemoꞋena o kaꞋi keke ma ginahalamanena. (WaꞋita, kaliva gola babiya hiyalana digo wayogona buye hivetagovina be giꞋulafuwana againe gola-moꞋena avaekeya gida tu momolu hihegena.) Gola ana kaiwabu lakahina tu gaitoma havahavaina. Kaliva gola ai againe hiveꞋalaveꞋuveꞋuna amine, meda Yaubada yami vetumagana gola gikaiwabuhegena-ma vita agaidiya gigaluvaluvana kaꞋi velemoꞋena ma kabuꞋavane ginalakayemu. Ada aimo Yesu yana yewaꞋela ana toveya yami vetumaganadona faꞋina Bana Yaubada ginahawaveyamumuyemi kadu ami egana ginakilakahina kadu ginakivekaiwabumi. 8 Boi Yesu Keliso keke wadaꞋitani nonogana nuwanuwami lakahina BanaꞋe. Kadu tova adamoya keke wadaꞋitaꞋitani nonogana Bana againe wavetumagana kadu wavemwamwala-moꞋa, yami vemwamwala giꞋiveꞋalikami be keke tamo gavadi amifaiweya wanagaheyeni. 9 Gavadi-yo wavemwamwala-moꞋa? Me yami vetumagana guwana higa aluꞋaluwami ana kibababala wanunuhagana. 1Fi 1:23, Kl 1:12 Kl 3:3-4, Af 20:32 1Fi 5:10, Yob 23:10, Ye 1:2-3 Yo 20:29
Yaubada bonana ana toꞋawatalatalaina Keliso
yana kibababala faꞋina higaheye-vagahina.
10 Tuwai-moꞋena Yaubada bonana ana toꞋawatalatalaina mena ami kibababala ana nuwanuwa faꞋina yadi waꞋidibumuhiga hilele-hagihagiyena, ada Yaubada yana nuwadoga muliya ginavelemi-ma faꞋina higaheye-vagahina. 11 Keliso AluꞋaluwana giluvaiyedi-yo gihawaveleveledi gigayo, “Aimo Yaubada yana Tovegida vita tulina tulina ginanuhagana tu muliya ginakaiwabu-moꞋa.” Ada badi toꞋawatalatalaina gava tova kadu gavaiyaꞋamine mena gaitomai-dina ginayemu-ma ana halamana hilelelena. 12 Yaubada badi agaidiya gihawavemogatala keke vaita taudiyao adi veluga au omi ami veluga faꞋina hiꞋawatalatalaina. Ada gaitomai-dina faꞋina higaheye-vagahina amanadi valeyana kibababala ana VenuwaꞋata Yamumuna ana tolaumamala agaidiya wanogalina. Yaubada AluꞋaluwa Mahalina giꞋiveninisena, lobama amine gihobuꞋela be badi tolaumamala giluvaiyedi-yo agaimiya hiꞋawatalatalaina. Badi Yaubada yana tovenuwaꞋata lobameya himimiyami nonogana ami kibababala ana nuwanuwa faꞋina halamana hilelele-hagihagiyena tu higa-wayoga. Ais 53:1-12 Lu 24:26-27 Md 13:16-17, Ef 3:10
Yaubada mahamahalina faꞋina, omi kaliva mahamahalimiyao
amine wanahuluva.
13 Tu omi kibababala ana nuwanuwa ahe wahalamanena be yawaimi ivaguna wanuhagana faꞋina, nuwami wanakidewedewena be wanavanevanenega. Kadu taumiyao yami nuwanuwa wanahawatana. Bana Yaubada yana nuwadoga againe wanaluluveꞋavina-moꞋa aimo Yesu Keliso ginayewaꞋela ana toveya ginavelemi-ma nuwadogai-nadi. 14 Tuwaina Yaubada keke wadahalamaneni au fanifanimiyao wamimiyami be nuwanuwa itaꞋitaluvadigana agaidiya wahawahegemi. Tu tova adamoya Yaubada wahalamanena faꞋina, keke mena nuwanuwa koyodi amine wanahuluhuluva au weꞋoweꞋo dibudibumuhigidiyao amine Tamami faꞋine wanahawahegemi. 15 E, Bana giluwafami-ma kaliva mahamahalina amine, gilubodami be yami dewa moyaꞋaina agaidiya mahamahalimiyao wanahuluhuluva. 16 Meda tuwaina Veyao Tuwaina ana bukiya Yaubada gigahe gigayo,
Iya mahamahaliku faꞋina, gilubodami be omi mahamahalimiyao wanahuluva.
17 KaduꞋe, Yaubada waveꞋoꞋolena againe BanaꞋe wahawavetamanena, ada Bana kaliva moyaꞋaida yada dewa faꞋina ginavedewayaugida ada yana laufata leleleya. KaꞋi hagihagina digo, kadu hagihagina. KaꞋi koyona digo, kadu koyona. Medema faꞋina hidei babiya aimo hawahawala amine wanamiyami ana aituheya tova moyaꞋaina yami wamatauta BanaꞋe Tamami wanaveꞋamohimohinena. Lo 12:2 Lo 6:19, Ef 4:17-18 2Ko 6:16-18, 7:1 1Veh 19:2 2Veh 10:17
18-19 Tuwaina dewa uyuꞋuyuyuna keke waguwana bwanenemiyao hiꞋalavedavedamami-ma wamuliyena. Ada dewai-nadi faꞋina yogoyogonimiyao wamiyami tu ahe wahalamanena Yaubada mena dewai-nadi againe gitutuvehobumi, ada fata gisena-ma keke gaitoma havahavaina vaita lokolokofou o mani amine. Au Keliso dayagina gaitoma kikaiwabuna againe gitutuvehobumi. Sifi kabiꞋona wowona tubuyamuyamumuna keke tamo ana kiꞋona abaveyao faꞋina hisena amine, meda Keliso mahamahalinaga dayagine gitutuvehobumi. 20 Yaubada aimo babi keke gidabubuni tu Bana Keliso ami kibababala faꞋina givegide-vagahina, tu tova adamoya higa hida tova havahavaina againe omi faꞋimiya giꞋivemogatalina. 21 Bana amihinafeya gihobuꞋela faꞋina Yaubada againe yami nuwaveꞋavina wasena, Bana alikeya gisivemididina be gikivekaiwabuna amanadi, ada au Yaubada againe wavetumagana kadu waluluveꞋavina.
22 Au Yaubada yana nuwanuwa velemoꞋena waꞋidibumuhigena faꞋina, aluꞋaluwami ana bwanene wakola-yo badi Yesu yana yoꞋogaga agaidiya buye wavetobohiyana-ma agaidiya yami nuwanuwa wasedonena. Medema faꞋina yami waꞋasehawahega velemoꞋena buye wanaveꞋahawahawahega lakahina. 23 FaꞋina Yaubada bonana miyamiya-vagahina againe watubuga-havagi ada yawaimi ivaguna bonai-nadi againe giveꞋinuba. Tamamiyao hiꞋivetubugimi-ma havahavaidiyao tu Tamami bonana againe yawaimi ivaguna wavaina medema miyamiya-vagahina.
24-25 Meda gahe saꞋeyana Yaubada bonana miyamiya-vagahina faꞋina Veyao Tuwaina ana bukiya gidadauda gigayo,
Kaliva moyaꞋaidi vaita isisiꞋu amine,
yadi kaiwabu vaita ana falafalawasi
yadi kaiwabu amine.
IsisiꞋu giboubou kadu ana falafalawasi giꞋaꞋakukuwana,
atu Kaiwabu bonana giduva-vagata.
Ada mena bonai-nadi Yaubada yana kaliva agaimiya gilumamalena. 1Ko 6:20, Yo 1:29 Yo 13:34 Yo 1:13, Hi 4:12 Ais 40:6-8
1:2: 2Te 2:13, Ef 1:4, Hi 12:24
1:9: 1Fi 1:23, Kl 1:12 Kl 3:3-4, Af 20:32
1:9: 1Fi 5:10, Yob 23:10, Ye 1:2-3 Yo 20:29
1:12: Ais 53:1-12 Lu 24:26-27 Md 13:16-17, Ef 3:10
1:17: Lo 12:2 Lo 6:19, Ef 4:17-18 2Ko 6:16-18, 7:1
1:17: 1Veh 19:2 2Veh 10:17
1:24-25: 1Ko 6:20, Yo 1:29 Yo 13:34 Yo 1:13, Hi 4:12
1:24-25: Ais 40:6-8